Ƀă mơngế Tây Nguyên, mơhé hâi môi hdroh châ trâm Pôa Hồ la tung hiâm mơno rêm ngế mê um Pôa Hồ ƀă mâu tơdroăng hơ’muăn ‘na Pôa xuân đi đo chôu pâ tung tuăn ngôa. A kơpong kăch măng Krông Bông, mâu rơkong tơpui tối, tơdroăng cheăng pêi dêi Pôa đi đo rak vế pêi xúa tung rêh ối rêm hâi. Ngoh Y Phang Ƀyă, ối a cheăm Ea Trul, tơring Krông Bông ăm ‘nâi:

   “A kot mâ ƀă xông kân drêng tơnêi têa hiăng hơniâp lĕm, a hâi châ trâm Pôa Hồ, la tung tơdroăng rêh ối mê a  tơmiât pâ nhoăm kơ Pôa, xua Pôa Hồ cho mơngế kăn ki rơkê. Xua Vâ hriâm ƀă pêi pro tiô Pôa  mê têm tơdroăng cheăng pêi rêm hâi xuân môi tiah tung tơdroăng tơpui kâ ƀă kuăn pơlê, á xuân mơ-eăm hriâm tiô Pôa ing tơdroăng pêi ki kŭn má môi, mơ-eăm mơnhông cheăng kâ dêi rơpŏng hngêi, veăng ‘no hnoăng mơjiâng pơlê, kum mâu ngế ki pá puât tung pơlê’’.

Rơtế ƀă kuăn pơlê tung lâp tơnêi têa tơdah Têt tơniăn krê, tung mâu hâi kố, kuăn pơlê Bơhnéa a lâp lu pơlê achê hơngế a kong pơlê Gia Lai pêng păm tơdroăng khiú pâ Pôa Hồ, pôa hiăng djâ tơniăn krê ăm hdroâng mơngế Việt Nam. Krâ pơlê Yơu pơlê Ktu, cheăm Kon Gang, tơring Đăk Đoa, tối:

“Tối ‘na Pôa, sap mâu vâi hdrêng troh mâu vâi ki kân kơbố xuân ‘nâi. Pôa Hồ cho ai troăng tơmiât kân môi ngế ki tơ’lêi hlâu, cho môi ngế kăn ki kân dêi tơnêi têa pin. Mơhé tá hâi môi xôh trâm, tung hiâm mơno ngin đi đo tâ ai Pôa achê, ai Pôa hnê djâ rêm tơdroăng pêi cheăng. Ing mê, xuân mơ-eăm hriâm tâp, pêi tiô tơdroăng ki lĕm dêi Pôa, đi đo pâ vế rơkong pơchân dêi Pôa ‘na thăm mơdêk pêi chiâk deăng. Ing mê, mơjiâng ivá tung tơ’noăng pâ nhuô̆m tơnêi têa ƀă mâu tơdroăng pêi ki nhên môi tiah pêi báu klâng péa rơnó, pêt kơphế mơdêk pêi lo liăn ngân, nhŏng o tơrŭm môi hiâm mơno… Ƀă rêm hơnăm ngin xuân tơkŭm tơdjâ pêt loăng plâi “Troh tá ah khíu pâ Pôa Hồ’’.