Koăng Prăk vâi pro mơjiâng ing meăm hlái tơvât iâ ƀă hâu, ga phá tâ tâng vâ pơchông ngăn ƀă chêng tiah hmâ. Tơnâng chêng koăng ki kố ga ai 3 kơtâ, ki kân dêi rêm kơtâ koăng mê sap ing 15 troh a 20 cm, mơngiơk hlái ki prá prăng iâ xua hiăng phôk chôu ‘măn hiăng ton. Idrâp chuât dêi Koăng Prăk ga hleăng, chuât xơtó trối prôa tơnĭng, hmốu tơnĭng, chuât prông, krip ro trối idrâp chêng “Yau”, ing mê, chiâng idrâp chuât ki ro tơniâ pá kâi tối; ai drêng ‘nâ nếo tôu ga chuât mơngối, hleăng chhâk xơtó troh kong kế, ngo ngối, ai drêng ‘nâ chuât xơtó, rơdêi, pro mơngế ki hmâng mê tâ ‘nâi nhên tơdroăng ki krih tơviah dêi chêng koăng ƀă tiah hmâ.

Vâ ai tơnâng Koăng Prăk kố, mơngế M’Nông athế pơhlêh hên kơpôu, ro ƀă mơngế kong têa Lếo lơ Kul, ai kơtum chêng ki kơnâ tê kơnâ troh a chât to kơpôu ki kân. Xua ti mê, Koăng Prăk châ ngăn cho kế tơmeăm ki kơnía, bu ai to mâu rơpŏng ki kro tê ki ai, ki hên tơmeăm khoăng châ xúa ƀă chôu ‘măn ing rơxông hdrối troh rơxông kơ’nâi.

Jâ Thị Mai, ối a pơlê Bu Njranglu, cheăm Đức An, kong pơlê Lâm Đồng, môi tung preăng ai rơpŏng hngêi ki ối rak vế tơnâng chêng koăng Prăk, ai tối tiah kố:

“Nốkố u ối iâ mơngế ki chiâng tôu koăng ki kố. A pơlê ngin kố, khu tôu chêng bu ai 3- 4 ngế ki chiâng tôu. Koăng Prăk cho tơmeăm ki kơnía hiăng châ rak vế ing chal vâi krâ roh nah troh a chal ngin nôkố. Ôh tá xê pơtối chôu ‘măn ăm rơxông kơ’nâi, mê ngin ối pơtối hnê túa ki tôu chêng koăng túa ki vâ tôu chêng koăng. Á kơnôm dêi pâ hnê, nôkố, á pơtối hnê ăm dêi kuăn, ăm rơxông kơ’nâi, vâ ‘nâi plĕng ki kơnía ƀă ai pơxúa kân khât dêi koăng tung rêm hdroh vâ xúa”.

Ƀă hdrông mơngế M’Nông, kố cho koăng ki ai klo, chêng cho chêng tơbăng, ôh tá ai klo. Koăng Prăk, hdrối vâ tôu, vâi krâ ki rơkê mê athế rơkâu xối xeăng ƀă drôu xiâm ƀă í hmong vâ mơhno tối hiâm mơno koh nhoăm. Túa ki tôu koăng kố xuân phá krê xêh: mâu vâi krâ ki tôu koăng kố athế kơtúa koăng a’ngêi, kât ƀă kơxái, kŏng ki pá hơvá tôu chêng tôu drăng klo koăng, ing mê, ga ai idrâp ki chuât xơtó, chhâk hơngế. Jâ Thị Mai tối ăm ‘nâi tơ’nôm:

“Ga phá tơ-ê ƀă chêng ki pin hmâ hlo, Koăng Prăk ga bu châ ‘no tung mâu roh ki leh mơdĭng kân tung pơlê pơla, leh mơdĭng a mâu rơnó kâ plâ hơnăm ôu plâ khế, leh ki mơjiâng pro pơlê nếo lơ tĭng rơkâu pơlê. Ahdrối vâ tôu koăng ki kố, vâi krâ-nhŏng o pơrá rơkâu xối xeăng ăm koăng ki mê. Túa rơkâu xối kố vâ mơhno tối tơdroăng ki koh nhoăm kơ koăng”.

Dế nôkố, tung pơlê pơla dêi hdrông mơngế M’Nông bu ối iâ tê ai tơnâng chêng koăng Prăk. Vâi krâ ki rơkê tôu koăng Prăk kố xuân iâ mơngế, ki hên cho mâu ngế ki hơnăm hiăng krâ. Rêm xoh vâi ‘no koăng Prăk kố châ tôu tung mâu hâi leh mơdĭng mê, ôh tá xê to idrâp chuât dêi chêng koăng, mê ối cho idrâp chuât dêi mơhúa jâ noâ pin roh nah, cho tơmeăm khoăng ki kơnía git ó pa kâi tối. Ngê̆ nhân Thị Dơn, ngế ki ối tung khu tôu chêng koăng dêi pơlê Bu Njranglu, cheăm Đức An, kong pơlê Lâm Đồng ai tối tiah kố:

“Kố cho Koăng Prăk ki kơnía git, rêm xoh ai roh leh mơdĭng ki kal nếo mơ’no vâ tôu. Drêng tôu Koăng Prăk mê, á hlo môi tiah idrâp tơpui dêi mơhúa jâ nôa. Ngin kô kơdo mơ-eăm rak vế ngăn ƀă mơhno tối, hnê ‘măn ăm rơxông kơ’nâi”.

Rêm tơdrá, rêm idrâp Koăng Prăk hiăng châ mơhno tối ki krê, tơtro ƀă tơrêm xoh leh mơdĭng, cho tơdroăng ki vâ tơpui tơno pơla kuăn mơngế ƀă kuăn mơngế, kuăn mơngế ƀă khu xeăng, kuăn mơngế ƀă kong kế, ngo ngối. Ƀă hdrôâng mơngế M’Nông, chêng koăng tối tơdjuôm cho tơmeăm ki vâ mơhno tối rơpŏng hngêi ki kro mơdrŏng, ƀă rơpŏng hngêi, hdrông hdrê ki châ kuăn pơlê loi tơngah. Krê ƀă Koăng Prăk kố, mê cho tơmeăm ki bu ai to mâu rơpŏng hngei ki kro mơdrŏng nếo ai tơmeăm vâ pơhlêh, ƀă châ ngăn cho tơmeăm ki kal vâ pơtối rak vế troh rơxông ki pơtối ah nếo.