Nâ Nguyễn Thuý Linh, kăn pơkuâ tíu tê mơdró Coffee&homestay Hoa Sứ a thôn Hữu Đức, cheăm Phước Hữu, kong pơlê Khánh Hòa hiăng pro tơ’nôm 2 kơbong ối ăm tơmối ôm hyô tung roh leh hô̆i Katê. Tíu tê mơđah tơbleăng tơ’nôm mâu tơmeăm ki phá tơ-ê dêi cheăm, môi tiah: Têa măm, drôu vang hơmu, hơ’nêh kơpôu têk 1 hâi, í kơ’nêi kơdrum ƀă mâu tơmeăm ing ếo pơtâk hdroâng kuăn ngo Chăm cho kơtong ki pâ, kơtong ki râng a kŏng, ếo xâp...

Vâ mơjiâng tơdroăng phiu ro ăm hâi xah hêi ro Katê, cheăm Phước Hữu hiăng mơhnhôk vâ chê pái hrĭng hok tro, droh rơtăm ƀă kơdrâi pôa troh ing mâu thôn tung cheăm veăng mâu tơdroăng axoâng pơlê pơla. Mơhé kong prâi ôh tá tơniăn laga tơdroăng pơtâp a plông kơtú ƀalong Hữu Đức xuân đi đo kơdrâm phiu ro ƀă  tá hiêm mơno. Nâ Nguyễn Thuý Linh tối ăm ‘nâi:

‘’Tung mâu hâi hiăng hluâ, mâu nâ o vâi kơdrâi tung thôn tơkŭm pêi mơgrúa kong prâi a mâu troăng kân tung pơlê, ƀă kuăn ‘nĕng mâu vâi o hok tro mê vêh rơnêu i tơniăn tơdroăng hriâm vâ kơxê vêh veăng pơtâp rơhdruê xoâng, vâ troh hâi Katê veăng khu axoâng tơdah Y Trang. Ƀă a rêm rơpŏng xuân mơgrúa lĕm,  rơnuâ hngêi trăng, hbrâ kơƀăn, ki má lối cho kơƀăn tiô khôi vâi krâ nah dêi mơngế Chăm. Pakĭng mê, hlo hên pơlê Chăm ki ê xuân pơtâp khu axoâng pơlê pơla, tung mê ai tơdroăng mơ’no liăn pro nếo mâu tơdroăng rơhdruê axoâng, ngăn hlo hay ‘nâng. Mâu hơnăm hdrối bu ai to lâi pơlê pêi, hơnăm kố pêi tơdrêng tâi tâng hlối’’.

Rơtế ƀă pơtâp rơhdruê xoâng, mâu hâi hiăng hluâ, mâu ngế cheăng dêi Khu tơrŭm cheăng Gốm Chăm Bàu Trúc tơkŭm hên vâ pro hên tơmeăm ki meăn ƀă tơnêi hneăn teăm tơdrêng tê ăm tơmối tung rơnó Katê kố.

Pôa Phú Hữu Minh Thuần, Kăn pơkuâ Khu tơrŭm cheăng cheăm Gốm Chăm Bàu Trúc, cheăm Ninh Phước, kong pơlê Khánh Hòa tối ăm ‘nâi, nôkố tơdâng rêm hâi ai lối 1.000 roh tơmói troh pơlê meăn tơmeăm ƀă tơnêi hneăng Bàu Trúc lăm ngăn, châ hlo ƀă rôe. Hơnăm kố, khu tơrŭm cheăng hiăng khên tơnôu mơ’no liăn cheăng mơjiâng tơ’nôm kơpong mơđah tơbleăng tơmeăm meăm ƀă tơnêi hneăng Chăm Bàu Trúc. Tơmeăm ôh tá xê to tíu tơbleăng ki lĕm ki lĕm tơdroăng cheăng meăn pro tơmeăm ƀă tơnêi hneăn  tiô khôi vâi krâ nah mê ối cho tíu khôi túa lĕm tro Chăm ki má môi, tơdjêp mơđah tơbleăng prôa hdroâng kuăn ngo,  rơhdruê xoâng tiô khôi vâi krâ nah, kum tơmối hlê plĕng hên tâ ‘na tơdroăng rêh ối, khôi túa vêa vong ƀă mơ-eăm rak khôi túa lĕm tro dêi mơngế Chăm. Pôa Thuần tối ăm ‘nâi tơ’nôm:

‘’Hơnăm kố tơmối troh kơdrâm, xua mê Khu tơrŭm cheăng mơ’no liăn cheăng pro tơ’nôm hngêi mơđah tơbleăng vâ tơdah tơmối tung rơnó Katê kố. Tâng khu tơmối ai tơdroăng kal vâ mê xuân kô ai khu ngế ki tơpui tối tơbleăng a tíu mê, châ tâ châ hlo xuân môi tiah mơđah tơbleăng prôa vâi krâ nah dêi mơngế Chăm vâ tơdah ăm tơmối ngăn. Drêng kong pơlê Khánh Hòa nếo châ mơjiâng mê mơni kơxô̆ tơmối kô tâk, xua khôi túa vâi krâ nah gá tơdjêp ƀă kong pơlê Ninh Thuận ton ƀă kong pơlê Khánh Hòa nếo, xua mê ki troh lâp lu gá rơdâ tâ’’.

Ƀă a kong pơlê Lâm Đồng, mâu hâi kố, mâu tíu tơbâ kế tơmeăm khoăng ton nah môi tiah: Hngêi tơbâ Pô Nít a cheăm Bắc Bình, hngêi tơbâ Pô Klaong Mơ-nai a cheăm Lương Sơn, Hnôu po Hdroâng pơtáu Chăm a cheăm Hồng Thái, kuăn pơlê hiăng pêi pro mơgrúa kong prâi ƀă kơtúa hlá cơ Tơnêi têa a rơpŏng. Ki rơhêng vâ tối, a thôt Pô Sah Inư a bêng Phú Thuỷ, kong pơlê Lâm Đồng kô veăng dêi 9 cheăm ai kơdrâm kuăn pơlê Chăm ƀă hên tơdroăng mơhno khôi túa lĕm tro châ tơkŭm po, ai: Mơđah tơbleăng rơvŏng Saranai, mê pêi báu, mê khu tơ’noăng têa tơkâ hluâ tơmeăm ki tât, tơdroăng xah hêi kât mâ pâm niêu ƀă mơđah tơbleăng tơdroăng cheăng meăn pro tơmeăm ƀă tơnêi hneăn tiô khôi vâi krâ nah, teăn ếo pơtâk Chăm, ki rơhêng vâ tối mơđah tơbleăng kơchâi kâ Chăm.

Pôa Trần Đức Dũng, Kăn pơkuâ Khu pơkuâ tíu chô tơmeăm khoăng ron ton nah thôt Pô Sah Inư tối ăm ‘nâi:

‘’Tơdroăng hbrâ nôkố xuân châ pêi pro tŭm. Hơnăm 2025 cho hơnăm apoăng ki leh hô̆i Katê châ tơkŭm po klêi kơ’nâi kong pơlê Lâm Đồng nếo châ mơjiâng. Mâu tơdroăng pêi ki ê dêi leh hô̆i ‘na ki xiâm tiô troăng khôi túa lĕm tro ƀă tiô khôp dêi kuăn pơlê mơngế Chăm, hiăng vêh pro ƀă tơkŭm po sap ing nah troh nôkố a tíu chô ‘măn tơmeăm roh ton nah a thôt Pô Sah Inư. Pakĭng mê, ngin xuân tơkŭm po mâu tơdroăng ki má môi cho tơdroăng ki xah hêi vâ tơdah tơmối troh lăm ngăn, châ tâ châ hlo’’.

Katê cho leh hô̆i tiô khôi vâi krâ nah rêm hơnăm dêi kuăn pơlê Chăm. Kố ôh tá xê to roh vâ mơngế Chăm mơhno hiêm mơno pâ mơnê jâ pôa, pơ-ôu mâu xeăng, mê ối cho um ki ai ti lâi mơhno tiah mê dêi tơdroăng rêh ối khôi túa lĕm tro, tơdroăng loi tĭng tiô khôp ƀă hiêm mơno tơrŭm môi tuăn pơlê pơla. Ing rêm rơnó leh hô̆i, mâu ki kơnâ khôi túa lĕm tro Chăm ki má môi pơtối châ rak, troh lâp lu, veăng kum pro tơ’nôm um méa khôi túa lĕm tro hên mơngiơk dêi kong pơlê Khánh Hòa ƀă Lâm Đồng. Kố xuân cho roh tơ’lêi vâ mơđah tơbleăng khôi túa lĕm tro Chăm troh ƀă tơmối tung tơnêi têa ƀă kong têa ê, kum mơnhông kơvâ ôm hyô dêi mâu kong pơlê krá tơniăn lĕm./.