Pôa Đinh Quốc Tuấn, Kăn hnê ngăn Hdroâng kuăn ngo kong pơlê Kon Tum ai tối, rơtế ƀă mơnhông pêi cheăng kâ - rêh ối pơlê pơla tung kơpong hdroâng kuăn ngo ki iâ mơngế, hnoăng cheăng rak vế ƀă mơnhông, pơtối mơdêk ki kơnía túa lĕm tro tiô khôi hmâ a kong pơlê, tung mê, ai tá tơdroăng rak vế chêng koăng đi đo châ  kong pơlê tŏng gum, tơveăng, pơkâ pêi pro hên tơdroăng cheăng ki ai pơxúa păng ‘nâng.

Troh nôkố, hiăng ai 2.500 kơtum chêng koăng hiăng châ mâu hdroâng kuăn ngo tung kong pơlê kring vế, rak ngăn, pơtối mơdêk ki kơnía; ki rơhêng vâ tối cho tơdroăng ki rak vế, djâ xúa chêng koăng tung hên tơdroăng cheăng ‘na túa lĕm tro - cheăng kal kí dêi kong pơlê. Kố cho roh ki vâ mâu vâi krâ-nhŏng o pêi pro, vêh mơnhên túa ki mơđah tôu chêng koăng, gum ăm rơxông nếo nôkố ‘na ki kơnía git dêi chêng koăng, kơhnhon xuăng ƀă pôu râng hnoăng cheăng tung kring vế, rak ngăn, pơtối mơdêk ki kơnía dêi túa lĕm tro mê.

Veăng tung “Kơmăng ro chêng koăng, kơhnhon xuăng mâu hdroâng kuăn ngo a Kon Tum” ai 170 ngế vâi krâ dêi 8 khu. Tung mê, ai 7 khu teăng mâ ăm 7 hdroâng kuăn ngo dêi kong pơlê, ai: Rơteăng, Bơhnéa, Jêh-Triêng, Jarai, Brâu, Rơ Măm ƀă Hrê. Tung roh po xah ro mê, mâu vâi krâ hiăng mơdoh hên chôu phut trâm mâ, tơpui tơno mâu túa ki lĕm tro, ki krih tơviah dêi kuăn pơlê pin ƀă lối 245 ngế teăng mâ veăng hôp a Hneăng hôp kân mâu hdroâng kuăn ngo ki iâ mơngế a kong pơlê Kon Tum roh má 4. Nâ Ri Ang, hdroâng kuăn ngo Rơteăng, pơlê Kon Vơng Kia, pơlê kân Mang Deang, tơring Kon Plông tối ăm ‘nâi:

“Khu tôu chêng koăng ngin ai 17 ngế chu akố vâ mơđah tôu chêng tôu koăng vâ koh hâk Hneăng hop kân mâu hdroâng kuăn ngo ki iâ mơngế. Tơdroăng ki ngin mơđah mê cho pơtroh ăm rêm ngế tơmâng tơdrá chêng koăng, kơhnhon xuăng Hâk phiu pơlê pơla pơhlêh nếo. Á tâ  hơniâp ro ó khât, châ trâm mâ, tơpui tơno, tôu chêng koăng pơla mâu hdroâng kuăn ngo a kong pơlê Kon Tum. Á ‘ló hâk tơngăm păng ‘nâng”.

Mâu tơdroăng ki mơđah tơbleăng a kơmăng xah hêi ro, môi tiah: Tôu chêng koăng, kơhnhon xuăng “Hơniâp ro hâi xah hêi” dêi mâu vâi krâ-nhŏng ki hdroâng Bơhnéa, tơring Đăk Hà; Tơdroăng ki mơđah tôu chêng koăng “Koh mơnê Đảng, Pôa Hồ”, hdroâng kuăn ngo Jêh-Triêng, tơring Đăk Glei; Rêi têng nêng “Rak ngăn chiâk” dêi hdroâng Brâu, tơring Ngọc Hồi; “Phiu hâi ro pơlê”, dêi hdroâng Bơhnéa, pơlê kong kơdrâm Kon Tum... hiăng pro ăm “Kơmăng ro tôu Chêng koăng Idrâp Xơtó Xiâm rêi-Tơrŭm mâu hdroâng kuăn ngo dêi kong pơlê Kon Tum”. Ngê̆ sih ưu tŭ Phạm Văn Hân, Kăn pơkuâ ngăn tíu xiâm túa lĕm tro-ngê̆ thuât kong pơlê Kon Tum tối ăm ‘nâi, kố pơrá cho mâu tơdroăng ki mơđah ro rih, cho tơmeăm khoăng ki kơnía dêi mâu vâi krâ-nhŏng o 7 hdroâng kuăn ngo dêi kong pơlê ối châ rak vế:

“Mâu tơdroăng ki mơđah kố cho mâu tơdroăng ki hiăng lĕm tro má môi, teăng mâ ăm roh ki mơhno tối túa lĕm tro dêi tơrêm hdroâng kuăn ngo pin. Môi tiah tơdroăng ki lông, rơnguâ, tôu chêng koăng, kơhnhon xuăng, tơdah tơmối lơ mâu tơdroăng ki vêh po, mơdĭng dêi tơrêm hdroâng kuăn ngo. Kơmăng ki xah hêi ro mê cho vâ mơhno tối tơdroăng tơrŭm pơla mâu hdroâng kuăn ngo a kong pơlê Kon Tum”.

Ngê̆ nhân ưu tŭ A Thút ối a cheăm Mường Hoong, tơring Sa Thầy mơhno tối tơdroăng ki hơniâp ro drêng châ ngăn mâu tơdroăng ki mơđah chêng koăng ki hơniâp ro ing kơmăng ki po leh mơdĭng mê. Ki rơhêng vâ tối, pôa hâk ro drêng tung khu ki tôu chêng koăng mê ai mâu vâi rơtăm, vâi muăn phô̆m vâ xông kân, mơđah rơkê khât mâu túa prôa. Tơdroăng mê mơhno tối tơdroăng ki pơtối rak vế, hriâm tâp dêi rêm khu rơxông hơnăm ối nếo ƀă túa ƀă khôi túa tôu chêng koăng, kơhnhon xuăng dêi mâu hdroâng kuăn ngo akố; veăng gum pơtối rak vế, mơdêk ki kơnía túa lĕm tro mâ hdroâng kuăn ngo ki iâ mơngế a Kon Tum.

Kơmăng xah hêi ro cho roh ki vâ mâu khu rơxông ngê̆ nhân trâm mâ, tơpui tơno, thăm mơdêk tơdroăng ki tơrŭm pơlê pơla, tơdrêng amê, hnối veăng gum mơdêk hiâm mơno, khên tơnôu hdroâng mơngế ƀă hlê plĕng tung tơdroăng kring vế, pơtối mơdêk khôi túa, vêa vong dêi hdroâng kuăn ngo.