Ƀă dó inâi ‘’Vâi kơdrâi Kon Tum mơnhông ki kơnía kế tơmeăm khôi túa lĕm tro vâi krâ nah Ếo xŏn’’, a kơmăng mơdĭng, 350 ngế vâi kơdrâi kong pơlê Kon Tum hiăng rơtế mơđah tơbleăng ngê̆ thuât, mơđah tơbleăng 2 khu um ếo xŏn dó inâi ‘’Reăng Pleăng’’ xua Hngêi kơmăi ếo xŏn Ngọc Minh pơchoh chêp ếo ƀă ti tăng pơchoh chếo ếp xŏn ƀă dó inâi ‘’Kơpong tơmeăm kơnía khôi túa lĕm tro’’ dêi ngế ki pơchoh chêp Kim Yến.

Tŭm péa ngế ki pơchoh chêp pơrá cho mơngế Kon Tum, pơxiâm tăng cheăng pêi châ tơƀrê klêi kơ’nâi veăng hneăng hnê mơjiâng tơdroăng pơchoh chêp pro ếo xŏn xua Khu xiâm Khu vâi kơdrâi Việt Nam tơrŭm mâu khu ki pơchoh chêp pro ếo xŏn má môi tung tơnêi têa tơkŭm po.

Roh kố, Khu vâi kơdrâi kong pơlê Kon Tum xuân mơhnhôk Roh tơ’noăng Vâi kơdrâi pơxiâm tăng cheăng pêi hơnăm 2024 ƀă dó inâi: ‘’Vâi kơdrâi Kon Tum pơxiâm tăng cheăng pêi, mơnhông tơmeăm khoăng pơlê ƀă pơhlêh krúa lĕm kong prâi’’. Tung pơla tơdah ƀai tơ’noăng hrá má môi a hâi lơ 30/6/2024. Roh tơ’noăng vâ pơ-ôu pơ-eăng mâu troăng tơmiât pêi rơkê, troăng tơmiât pêi ki má môi dêi vâi kơdrâi Kon Tum tung tơdroăng pơhlêh pêt mơjiâng tơmeăm tung mâu kơvâ cheăng. Ing mê, tŏng kum vâi kơdrâi mơdêk hnoăng cheăng kâ, mơdêk tơdâng tơ’mô pơla kơdrâi kơnốu ƀă mơjiâng rơpŏng hơniâp lĕm.