A rôh hôp ai 6 ngế ngê̆ nhân châ Kăn hnê ngăn Vi ƀan kong pơlê Kon Tum diâp Ƀâng khĕn kơdeăn; 23 ngế ngê̆ nhân châ ngế xiâm ngăn Hdroâng kuăn ngo kong pơlê Kon Tum diâp hlá mơ-éa khĕn kơdeăn xua hiăng rơkê kơhnâ tung tơdroăng rak vế  ƀă mơdêk mâu tơdroăng ki kơnía dêi cheăng khôi hmâ dêi mâu hdroâng kuăn ngo akố.

Kong pơlê Kon Tum nôkố ai 43 hdroâng kuăn ngo nhŏng o rơtế rêh ối, tung mê ai 7 hdroâng kuăn akố, mê cho Rơteăng, Jêh - Triêng, Bơhnéa, Jarai, Brâu, Rơ Mâm ƀă Hrê. Tơkâ luâ hâi khế, troh nôkố mâu hdroâng kuăn a kố a kong pơlê Kon Tum xuân ối rak vế hên ki lĕm ‘na mơhno túa lĕm tro khôi hmâ dêi hdroâng kuăn ngo tơná, ki xiâm cho mâu cheăng khôi hmâ môi tiah tĕn ếo pơtâk, tiâm meăm bro mâu chăng vok, bro mâu proâ, bro plong loăng, pong rơgi loăng ƀă hên ki ê bro ai hên tơdroăng ki lĕm tro tung rêh ối ăm kuăn pơlê.