Jâ Nguyễn Thái Tường, Kăn pơkuâ Kŏng ti Pêi ôm hyô Thái Loan, ai tíu pêi cheăng a kong pơlê Đồng Nai tối ăm ‘nâi, khu tê mơdró châ Khu pơkuâ ‘na Khôi túa lĕm tro, Tơ’noăng ivá ƀă Ôm hyô kong pơlê Lâm Đồng krếo veăng khu séa ngăn mâu tíu ôm hyô, kơdró ‘măn chal nah tơdroăng roh nah – khôi túa lĕm, kơchâi kâ, mơdró phiu ro xah hêi – tơdroăng ki xah hêi ...ô eăng a 3 kơpong: Mũi Né, Đà Lạt ƀă Gia Nghĩa. Ki nhên, khu kăn hiăng séa ngăn loăng pơlái kong kế tơnêi têa Bàu Trắng, Tíu chô ‘măn tơmeăm khoăng roh nah Têa Măm ƀă ngăn tơdroăng (Fis-sờr-mèn Sồu) Fisherman Show (Mũi Né), (Dơ-lai Phark) Delight Park Đà Lạt, XQ Sử quán; tíu ôm hyô Langbiang Land ƀă tơdroăng mơđah tơbleăng ngê̆ thuât ‘’Eăng bâ lĕm kơpong tơnêi khên tơnôu’’ (Đà Lạt); kơpong ôm hyô Tà Đùng, Pơlê loăng pơlái kong kế (I-vờ Viô-lềt) Eva Village, Hngêi mơđah tơbleăng tơdrá ki chuât (Gia Nghĩa), ...Ƀă jâ Vân, mâu tíu kố djâ hên tơdroăng ki châ tâ tŭm tâi tâng:

‘’Peăng Phan Thiết (ton), a hlo tơdroăng Fisherman Show cho hay ‘nâng mê kuăn pơlê Việt Nam ki hên tá hâi ‘nâi troh. Ngin troh Đà Lạt mê xuân ai mâu tíu troh nếo, rế mơjiâng ƀă chiâng tung mâu khế pơla kố nah. Á pói tơngah cho mâu tơdroăng kố kô djâ troh ăm tơmối ôm hyô mâu tơdroăng ki lĕm. Á hiăng pêi tung kơvâ ôm hyô 29 hơnăm xuân châ hlo hên tơdroăng ki lĕm ro ƀă mâu tơdroăng pơla kố nah’’.

Ƀă pôa Hoàng Công Định, Kăn pơkuâ Kŏng ti (Di-ma Thuồ) Dima – tour mơnhên, kong pơlê Lâm Đồng nếo cho môi kong plêng ôm hyô, tơkŭm tŭm mâu tơdroăng môi tiah ngo xŏn, long têa kân rơdâ, rơlố lĕm. Xua mê, inâi ôm hyô kô châ po rơdâ. Hdrối mâu tơmeăm ki ai hlâu mê, mâu khu tê mơdró kô mơjiâng inâi tơdjêp kơpong xua têa tour ki krê. Ki nhên cho mơjiâng pro mâu tơdroăng ôm hyô lăm ngăn a têa kơxĭ, ngo kong kơpong kân rơdâ tơdjêp ƀă pơtê pơla Mũi Né, Phú Quý ƀă châ tâ Đà Lạt, kơpong kân rơdâ ƀă lămngăn mâu tour pơlê pơla a Dak Nông (ton). Mơhé ai hên tơ’lêi hlâu, laga tiô pôa Định, ‘na troăng klông dế cho tíu ki kreăng ăm tơdroăng tơdjêp kơpong pơla Mũi Né, Đà Lạt ƀă Gia Nghĩa.

‘’Sap ing tơmot chiâng môi, ngin hiăng tơkŭm po pơla Mũi Né ƀă Đà Lạt đi đo, laga ối trâm pá tơdroăng djâ Dak Nông (ton) xua troăng klông hơhngế hơhngo ƀă tơmối ôm hyô xuân tá hâi chiâng hâk vâ tơdroăng lăm ing Mũi Né to a Dak Nông châ 10 chô. Pin kô chiâng mơjiâng châ troăng prôk ‘nâng ‘nâi tâ, lơ la ngiâ drêng Mũi Né mơjiâng châ p-ro tơraih tơƀai mê kô djâ tơmối ing Mũi Né to Đà Lạt, ƀă ing Đà Lạt chu Dak Nông kô rĕng tâ’’.

Ƀă ki tơ’lêi hlâu kong kế, tơmeăm kơnía hên hĭn, kong pơlê Lâm Đồng dế mơnhên tíu ối cho tíu troh kro mơdrŏng hên tơmeăm ƀă ki phá tơ-ê. Laga, vâ tơdjêp mâu tơmeăm, mơdró, tíu troh ôm hyô a mâu tíu chiâng tơmeăm ki dâi lĕm, ki má môi, ai tơdroăng ki tơxup tơbriêt hên cho tơdroăng pơkâ ăm khu pơkuâ ƀă mâu ngế pêi ôm hyô. Phŏ yăo sư, tiên sih Phạm Thị Huyền – Đăi hok Kinh tê̆ Quô̆k yân Hà Nội pơtó: ‘’Lâm Đồng nôkố ôh tá xê ai 1 lơ 2 rơnó, mê ai troh 4 rơnó’’. Pro ti lâi vâ ti tăng môi tíu ki rơdêi, tíu ki tơdjuôm, vâ drêng tơmối troh ƀă Lâm Đồng ai tơdroăng ki châ tâ tŭm.

‘’Tơdroăng ki Lâm Đồng (nếo) kô thế pêi mê cho tơkŭm châ tâi tâng mâu tơdroăng ki pin ai tung môi tơdroăng pơtâng hnê tối vâ tơbleăng troh tơmối ôm hyô. Tiô á hngêi trăng troăng klông nôkố dêi Lâm Đồng tá hâi châ tơdjêp krá tơniăn ƀă dêi pó, pro ăm ivá tơdjêp ôm hyô pơla 3 kong pơlê ton tá hâi rơdêi. Thế pêi ti lâi vâ ai môi Lâm Đồng tê, teăng xua ai 3 Lâm Đồng môi tiah nôkố’’.

Vâ pro tơniăn tơdroăng troăng klông tơdjêp mâu kơpong ôm hyô tung kong pơlê, Lâm Đồng dế pâ thế Tơnêi têa djâ tung pơkâ pro troăng kân ăm phêp rơxế kơtâu têi Peăng mâ hâi Lo – Peăng mâ hâi luô tơdjêp Phan Thiết – Bảo Lộc – Gia Nghĩa. Pôa Phạm Văn Mạnh, Phŏ Kăn pơkuâ Khu mơjiâng tơmeăm kong pơlê tối ăm ‘nâi:

‘’Nôkố, Khu xiâm mơjiâng tơmeăm môi tuăn tơdroăng kố. Krê ‘na rơnêu tá hâi tơdjêp ing Gia Nghĩa lăm Di Linh ƀă Troăng kân tơnêi têa 28B, mê nôkố Troăng kân tơnêi têa 28B dế châ mơ’no liăn rơnêu; troăng kân ing Di Linh vêh Gia Nghĩa dế pơkâ Tơnêi têa mơ’no liăn iâ khế vâ rơnêu bro lĕm. A ngiâ, ngin pơkâ thế kong pơlê xing xoăng kơxô̆ liăn rơnêu vâ tơ’lêi prôk lăm, tơ’lêi ăm tơmối prôk lăm’’.

Rơtế ƀă tơdroăng mơ’no liăn cheăng mơjiâng troăng klông, kơvâ ôm hyô Lâm Đồng xuân dế mơjiâng troăng prôk la ngiâ môi troăng pêi cheăng ton ŏn ôm hyô tâi tâng, krá tơniăn ƀă châ tơƀrê. Pôa Nguyễn Văn Lộc, Kăn pơkuâ Khu pơkuâ ‘na Khôi túa lĕm tro, Tơ’noăng ivá ƀă Ôm hyô kong pơlê Lâm Đồng tối ăm ‘nâi, kơvâ ôm hyô hiăng ai pơkâ xúa tơmeăm ki ai hlâu ƀă mâu tơdroăng ki tơ’lêi hlâu pơchông dêi kong pơlê Lâm Đồng tung lơgât ôm hyô dêi lâp tơnêi têa.

‘’Ngin kô tơkŭm po hên tơdroăng châ tâ châ hlo, môi tíu troh pái kơpong tung Lâm Đồng. Tơdrêng amê mơjiâng mâu tour, troăng ôm hyô nếo vâ tơdjâk pơla 3 kơpong; tơbleăng ăm Viƀan kong pơlê, Khu pơkuâ hnê mơhno cheăng Đảng kong pơlê tơbleăng Tơdroăng pơkâ ‘na mơnhông ôm hyô hneăng hơnăm 2025 – 2030 ƀă tơmiêt pêi troh hơnăm 2045’’.

Mâu troăng prôk tơtro tung pơkâ pro troăng klông, tơdjêp kơpong ƀă mơnhên troăng prôk la ngiâ mơnhông tơmeăm ôm hyô ki phá tơ-ê, ăm hlo tơdroăng khŏm mơ-eăm xông rơdêi dêi kơvâ ôm hyô kong pơlê Lâm Đồng. Ing mê mơnhên tíu cheăng dêi môi tíu troh tơmeăm khoăng ƀă pêi pro tơdroăng ki phá tơ-ê tung rêm troăng prôk châ tâ châ hlo dêi tơmối ôm hyô./.