Tơdroăng leh mơdĭng ki tơviah kố tơkŭm lối 100 ngê̆ sih ƀă 17  rôh mơđah kô ton ta troh hâi lơ 17/3 . Leh mơdĭng ‘na hơdruê xuăng tiô chal ton nah xua Kŏng ti veăng tơlo liăn peăng leh mơdĭng Việt Nam tơkŭm po vâ môi tuăn ƀă tơdroăng po leh kân dêi Đà Lạt chêh inâi ‘mot tung pơlê kong kơdrâm hriăn plĕng tơdroăng ki nếo dêi UNESCO tung kơvâ ‘na tơdrá hơdruê xuăng.

Tơdroăng mê po a 4 tíu a Đà Lạt vâ mâu ngế ki hâk vâ hơdruê xuăng, tơdrá hơdruê tiô chal ton nah ƀă tơmối ai rôh ngăn, hmâng tơdrá hơniâp ro ton nah. Pơxiâm po rôh mơđah leh mơdĭng hơdruê xuăng, kơxo hâi lơ 10/3, tơdroăng mơđah idrâp hlŭm khiê̆n hlái po a Tíu mơđah hơdruê xuăng ki apoăng a kơphô̆ kong ngo Đà Lạt hiăng tơ’mot hên kuăn pơlê veăng ngăn, têa kŏng tríu hâk.

Hên ƀai rêi prôa, hlŭm khiê̆n hiăng kum ăm mơngế ki hmâng, ngăn hmâ tơdrá ton nah ing tuăn tâng ki nêó, hlối tơkŭm ƀă ki pơxúa ‘na tơdroăng mơđah tiô chal ton nah ƀă hlối vâ mơnúa ngăn mơđah tiô chal nếo nôkố há.