Tiah mê, Leh tơbleăng Reăng Ƀan Điện Biên 2024 hiăng châ tơkŭm po hnối tơdjêp ƀă roh pơxiâm po Hơnăm Ôm hyô Tơnêi têa - Điện Biên ƀă dó inâi “Vêh troh kơpong Reăng Ƀan”. Kố châ ngăn cho hneăng ki vâ tơbleăng mơhno tơdroăng ôm hyô Việt Nam tối tơdjuôm ƀă kong pơlê Điện Biên tối krê, veăng kum rak vế, pêi pro hnoăng cheăng ki xiâm tung mơjiâng Điện Biên chiâng tíu ki tơmối rơhêng vâ troh mot ôm hyô ki hơniâp ro dêi kơpong Peăng tơdế kong ngo pá kơnhŏng a hơnăm 2025.

Tơdrêng amê, kố cho tơdroăng ki kơhnâ khât vâ koh Tơbâ 70 hơnăm hâi Plâ Ƀlêi trâng Điện Biên Phủ (01/05/1954 - 07/05/2024). Tiô Khu xiâm hnê mơhno tối, tơdroăng kố kô châ mơjiâng hên mâu tơdroăng ngê̆ thuât ki rơkê, ki plĕng, mơhno tối mâu tơdroăng ki kơnía git tung túa lĕm tro, tơmeăm khoăng ƀă kế tơmeăm ki kơnía ‘na kơvâ ôm hyô dêi tơnêi tíu, kuăn mơngế Điện Biên - Tây Bắc.