Thế rak ngăn dêi kơdrum reăng a ngiâ hngêi, nâ Y Doan tối ăm ‘nâi, hbrâ roh leh Hâi mơjiâng tơnêi têa lơ 2/9, mơngế Rơteăng a Kon Jong hiăng hbrâ mâu tơmeăm vâ tơdah tơmối. Sap ing tơdjêp mơjiâng Khu tơrŭm cheăng Pêi chiâk deăng mơdró, ôm hyô Ngọk Réo, kuăn pơlê hiăng ‘nâi rak kơdrum kong kế, mơnhông khôi túa lĕm tro môi tiah chêng koăng, rơhdruê, rơngêi, ting ting, mơnhông tơdroăng pế drôu, teăn ếo pơtâk, pế mâu kơchâi kâ hdroâng kuăn ngo tơná...pế vâ ăm tơmối kâ. Nâ Y Doan hâk ro tối:

“Ngin hiăng hbrâ tŭm tâi tâng ‘na drôu xiâm, mâu kơchâi kâ tiô khôi vâi krâ nah, drôu xiâm ăm tơmối ôm hyô vâ ôu. Ngin hbrâ pêi tŭm vâ tơmối châ xah hêi phiu ro tŭm tâi tâng tung hâi leh Hâi mơjiâng tơnêi têa 2/9 ro păng ‘nâng, vâ la ngiâ tơmối pâ troh ngin, tơmối hiăng troh a kố môi xôh, kô troh a kố roh má péa, roh má pái nếo...’’

Tơdah phiu tơmối, nâ Y Hoa rơtế mâu nâ o tung thôn hiăng rơnuâ tíu tơbâ a tíu ôm hyô têa krông Đăk Lôi. A kố ai hên tơmeăm OCOP dêi pơlê, cheăm, môi tiah têa xot, tơpăng khăng, kơphế ƀă hía hé... ƀă ki má lối cho drôu xiâm tiô khôi vâi krâ nah – môi tơmeăm ki kơhiâm a Kon Jong. Nâ Y Hoa tối ăm ‘nâi, apoăng nâ pế drôu xiâm vâ tê ăm kuăn pơlê tung kơpong.

Kơ’nâi mê rế hên ngế kok rôe ing măng pơlê pơla, klêi mê tíu ôm hyô po, pế drô chiâng môi tơdroăng ki tăng liăn ăm hên ngế vâi kơdrâi tung pơlê. Nâ Y Hoa, tôh trương tôh tơrŭm pế drôu xiâm Kon Jong, phiu ro tơbleăng: drôu xiâm ing ‘nhiăn prăng xua kuăn pơlê pêt xua kuăn pơlê pêt, xúa pló kong, xú kơhiâm lĕm phá tơ-ê pro mơngế ôu hâk vâ ôu:

“Vâ gum tro tâ ăm ôm hyô, á pế drôu xiâm tiô troăng prôk rế rak vế ki lĕm dêi khôi hmâ, rế rak tơniăn krúa kế tơmeăm mâ, ai inâi tem, tơdrong tâ lĕm mơnâ. Sap ing pế drôu xiâm á hlo gá ôh ti xê pro pơxúa ‘na liăn ngân, ing mê ối tơ’mot mâu vâi nâ o tung thôn rơtế pế drôu xiâm. Ngin hiăng po tơ’nôm ƀăng tơnêi pêt ‘nhiăn prăng vâ pế drôu xiâm tê ăm tơmối ôm hyô”.

Kơpong têa krông Đăk Lôi, cheăm Ngọc Réo, ai hên hmốu ki ka kân, péa pâ kĭng cho loăng kong tâi tâng tâ xâp rơngiâp, hyôh krúa rơngiâp lĕm pâ hơnăm, tơnêi tơníu krip tơdrŏm. Tíu kố hiăng châ kăn pơkuâ cheăm pơkâ pro chiâng tíu ôm hyô pơlê pơla. Ƀă tơdroăng ki tŏng gum dêi tơnêi têa, vâi krâ kuăn pơlê ối rơtế ƀă dêi rơpó mơjiâng Khu pêi cheăng tơrŭm Pêi chiâk tê mơdró, ôm hyô Ngọc Réo, mơjiâng  pro lối chât to hơpăm ƀă mâu kế ki ai hlâu, po tíu mơđah tơbleăng tơmeăm ăm tơmối. Ngoh A Thảo, kăn pơkuâ Chi ƀô̆ thôn Kon Jong, ăm ‘nâi, ôm hyô pơlê pơla dế po troăng prôk nếo ăm mơngế Rơteăng.

Nôkố Kăn pơkuâ Khu pêi cheăng tơrŭm Pêi chiâk tê mơdró, ôm hyô Ngọc Réo, ngoh A Thảo tối: ƀlêi chiâng kân má môi cho sap ing túa pêi kố hiăng gum kuăn pơlê rế hía rế pơhlêh túa tơmiât, túa pêi, sap ing tơdroăng rêh ối rêm hâi troh tơdroăng pêi cheăng kâ.

“Ki nhên môi tiah tung pơlê kố, á tơkŭm mơdâ hdrê loăng, vâ pro ăm xâp rơngiâp ƀă hbru ăm tơrêm rơpŏng vâ pêt drô troăng ƀă pro ăm gá lĕm tung rơpŏng hngêi hlối. A têa krông Đăk Lôi xuân rak đi đo tơdroăng ki mơgrúa lĕm, pêt loăng, pro hơpăm ƀă pâ thế râ kơpêng tŏng gum liăn vâ pro troăng krông. Troh nôkố vâi krâ kuăn pơlê tung thôn veăng tung khu pêi cheăng tơrŭm pro ôm hyô têa plông Đăk Lôi hiăng tâk troh 20 ngế veăng tơrŭm pêi”.

Troh a tíu ôm hyô pơlê pơla têa plông Đăk Lôi rôh kố, tơmối châ ngăn kong kế ki lĕm, túa lĕm tro, kế kâ chal krâ dêi hdroâng kuăn ngo Rơteăng. Kong kế lĕm rơngiâp ƀă khôi túa lĕm tro ki lĕm krê dế gum ăm mơngế Rơteăng a Kon Jong, Ngọc Réo, Quảng Ngãi, rế hía rế phâi hơtôu.