Pôa pơchâu inâi Y Phi Mjâo, ƀuôn A1, cheăm Ea Sup kong pơlê Dak Lak tối ăm ngin ‘nâi, tiô khôi túa vêa vong sap ing chal vâi krâ roh nah, klêi kơ’nâi hiăng xuâ dêi báu, krí dêi kơphế, rêm ngế tung pơlê rơtế tơkŭm dêi pó tơkŭm po tơdroăng leh mơdĭng mê. Tơdroăng mơdĭng kố cho vâ mơhno tối hiâm tuăn koh mơnê ‘na tơdroăng ki tơbrê klêi kơ’nâi môi hơnăm pêi cheăng, rơkâu pâ môi hơnăm nếo tơniăn lĕm, châ hên kế tơmeăm ki pêt mơjiâng, kuăn pơlê mo lĕm châ, tơrŭm tơrôa.

Tung tơdroăng loi tơngah dêi mơngế Jarai, mâu khu xeăng đi đo cho tơdroăng ki krih tơviah ƀă kring vế ăm pơlê pơla, ki málối cho xeăng têa, xeăng kong. Méluâ mâu khôi túa, vêa vong chal vâi krâ ton nah hiăng kơdroh lôi tiô hâi khế, laga, tơdroăng rơkâu xối xuân ối châ rak vế, ngăn mê cho tíu ki tơdjêp pơla kuăn mơngế ƀă tơnêi, ƀă kong, mơhno tối tuăn mơno ki ‘nâi koh mơnê ƀă tuăn loi tơngah kơ khu xeăng kô tơveăng gum ăm pơlê pơla, cheăm bêng tơniăn lĕm, kế tơmeăm dâi lĕm rơbê rơbuâ. Pôa Y Phi Mjâo, pôa pơchâu ai tối tiah kố:

“Rơkâu xối xeăng cho vâ rơkâu gum ăm pơlê châ tơniăn lĕm, ai ivá mo rơdêi têi ‘răng. Kơ’nâi mê, xeăng ki rak ngăn pơlê cheăm kô rak vế ngăn pin, klêi mê ngin rơkâu xối xeăng têa, rơkâu xối ƀă mâu tơmeăm hdroăng trối chu, kơpôu ro ăm ga i chiâng dâi lĕm, ôh tá tro pơreăng, tĭng rơkâu xối kố ngin pro tiô hdrông mơngế Lếo. Ngin rơkâu xối xeăng rak ngăn pơlê cho vâ rêm ngế pơrá châ hơniâp ro, sôk suâ”.

Ahdrối vâ rơkâu xối xeăng, krâ pơlê hmâ tơkŭm hôp pơlê vâ xing xoăng hnoăng cheăng. Mâu vâi rơtăm ki ai ivá mo rơdêi kô mot tung kong lăm tăng ko phêa, kơlá, vâ rơnuâ pro kâng. Kâng châ ngăn cho tơmeăm xiâm vâ tơdjêp ƀă khu xeăng, gum kuăn pơlê châ tơpui tơno, achê ƀă khu xeăng. Tung chôu phut ki mê, vâi kơdrâi a hngêi pêi báu, pế drôu xiâm ƀă hbrâ mâu kế kâ tiô khôi hmâ. Pôa Y Nô Ksơr, ối a buôn A1, cheăm Ea Sup, kong pơlê Dak Lak tối ăm ngin ‘nâi:

“Apoăng hơnăm ngin hmâ tơkum rơkâu xối xeăng têa kroăng, xeăng ngo, rơkâu xối Khẩu hó. A hâi má 29 Têt, tơkéa vâ tối chôu phut ki vâ tơklâ hơnăm ton lo hơnăm nếo, ngin kô rơkâu xối. Hâi kố, tâi tâng mâu pơlê cheăm hmâ tơkŭm troh ối akố,ai ƀuôn A1, A2 kô tơkŭm pro tơdjuôm, rêm hơnăm pơla hmâ pêi pro tiah mê”.

Klêi kơ’nâi rơkâu xối xeăng pơlê, mê vâi krâ-nhŏng o tung pơlê pơtối lăm krếo pôa pơchâu ki ê vâ rơkâu, pêi pro mâu tơdroăng rơkâu xối xeăng têa. Vâi hmâ rơkâu xối a kĭng kơno têa, cho tíu ki achê ƀă tơdroăng hmâ tơkŭm dêi pơlê pơla. Tung rơkâu xối mê kô ai tơdroăng ki kât prế khêi ăm krâ pơlê, cho môi túa ki vâ pơtroh ăm tơdroăng ki rơkâu tơniăn lĕm, kring vế ƀă tơrŭm tung pơlê pơla.

Tiô pôa Y Duk Ksơr, mơngế kuăn pơlê a ƀuôn B1, cheăm Ea Sup, kong pơlê Dak Lak tối ăm ngin ‘nâi, kố cho khôi túa, vêa vong ki ôh tá păng lôi tung tơdroang ki loi tĭng, tiô khôi dêi kuăn pơlê Jarai, mơhno tối tơdroăng ki achê ƀă kong kế, ngo ngối, tơdrêng amê, hnối tơbâ kuăn cháu athế ‘nâi mơnê nhuô̆m kơnhŏng têa, tơnêi tíu ƀă kong ngo.

“Rơkâu xối xeăng pơlê cho rơkâu xối pâ ai mêi tro tôu ‘ló, châ xo dêi kế tơmeăm, báu phái pêng hnôu pêng hneăm, bê tm kế kâ, rơpŏng hngêi ai ivá mo rơdêi têi ‘răng, pon mơhúa plâ hơnăm, tơmeăm hdroăng mê ki hmâ hlo cho kơpôu. Tĭng rơkâu xối xeăng têa hmâ rơkâu ƀă chu, vâ rêm rơpŏng hngêi pơrá ai tơdroang phâi tơtô, kuăn ‘nĕng cháu cháu krâm kơdrâm, rơpŏng hngêi hơniâp ro, ôh tá ai ngế ki kơklêa, xahpá. Vâ hbrâ ăm tĭng rơkâu xối mê ai kế ki klâi xo djâ kế ki mê, ai ngế ki ‘no dêi phái, ai ngế ‘no dêi í, ai ngế ‘no drôu xiâm, tâi tâng vâi krâ tung pơlê rơtế brôk dêi pó veăng a tĭng rơkâu hâk xua hơnăm nếo, hâk phiu rơnó ki nếo”.

Tĭng rơkâu xối apoăng hơnăm dêi hdông kuăn ngo Jarai ôh tá xê to tơdroăng ki loi tĭng tiô khôp mê ối cho roh ki vâ rêm ngế tung pơlê châ trâm, tơpui tơno, êng tiâ, tơkŭm dêi pó. Mâu khôi túa, vêa vong chal krâ nah châ rak vế,  pơhlêh ki tơtro, gum ăm rơxông nếo hlê plĕng ki kơnía dêi khôi túa lĕm tro, tơdrêng amê, tơdjêp tơrŭm tung pơlê pơla tung tơdroăng rêh ối chal nếo nốkố.