Leh pơxiâm po kô châ tơkŭm po a plông kuât pơlê Ia Gri, cheăm Chư Đang Ya, tơring Chư Păh, kong pơlê Gia Lai. Ki má môi dêi tơdroăng kal cho tơdroăng ngê̆ thuât rơtế mơđah tơbleăng chêng koăng Tây Nguyên ƀă veăng amê ai vâ chê 400 ngế ngê̆ nhân, diên viên, ka sih ƀă hok tro, vâ pơ-ôu pơ-eăng ki lĕm reăng mâ hâi kong rơtế khôi túa lĕm chêng koăng ki má môi dêi Tây Nguyên.

Pakĭng mê, tơdroăng ối po mơđah tơbleăng ngê̆ thuât pơla âm nhak tiô khôi vâi krâ nah ƀă rơxông nếo. Plâ măng tĭng leh, hên tơdroăng po kô châ tơkŭm po môi tiah tơ’noăng marathon, mơđah tơbleăng ếo pơtâk tiô khôi vâi krâ nah, kơ’nêi pum plum kân, vêh pro leh phiu ro kâ báu nếo, mơđah tơbleăng mâu tơmeăm ki pro ƀă kŏng ƀă tơbleăng tơmeăm ki má môi dêi mơngế Jarai, Bơhnéa tung kong pơlê.