kuăn pơlê hiăng mơnhên tối cho ai khât păng ‘nâng tiah mê, kố cho pri mơhá ki tơxâng ki kân ó khât ki Đảng, Tơnêi têa hiăng diâp ăm pôa Nguyễn Phú Trọng ƀă mâu hnoăng cheăng ki kân, ki tơviah a hên mâu hnoăng pêi pro pơkuâ cheăng dêi Kăn xiâm pơkuâ hnê ngăn ƀă tơdroăng ki mơjiâng hnoăng cheăng kăch măng dêi Đảng, Tơnêi têa ƀă dêi tơnêi têa pin.

Phŏ Yăo sư-Tiê̆n sih Nguyễn Trọng Phúc, Kăn xiâm ngăn ‘na Viện Lịch sử Đảng, Học viện Chính trị Quốc gia Hồ Chí Minh tối nhên, tơkâ luâ to lâi hơnăm cheăng châ Đảng, Tơnêi têa pơcháu hnoăng cheăng pro pơkuâ hên tơdroăng cheăng ki kal kân ‘na tơdroăng tơpui lý luận, lơ mâu tơdroăng cheăng ki tiah hmâ rêm hâi, pôa Nguyễn Phú Trọng, Kăn xiâm pơkuâ hnê ngăn xuân hiăng ai hên hnoăng ki pleăng dêi tơdroăng cheăng ki rơkê kơnía păng ‘nâng, tơdroăng kố hiăng châ tâi tâng Đảng, tâi tâng kuăn pơlê, ta mâu vâi pú lâp plâi tơnêi vêh mơnhên tối, hiăng hlo nhên khât:

“Kố cho Mê dai ki hiăng ai ing rơxông Việt Nam Yân chuh Kŏng hoa, Mê dai Hơlŏng trĭng châ mơjiâng cho vâ diâp ăm mơngế ki ai hnoăng kân kĕng, ki tơviah má môi ƀă hnoăng cheăng Kăch măng dêi Đảng, Tơnêi têa ki hiăng ai hên hnoăng pleăng tung tơdroăng cheăng, ki mơngế krê ki lối kơ rơkê pơkuâ ngăn, mơnhên tối mâu hnoăng ki kân kĕng ki Kăn xiâm pơkuâ hnê ngăn hiăng veăng gum ăm tơdroăng rêh ối, pêi cheăng ki kân dêi Tơnêi têa pin”.

Vêh mơnhên tối hiâm mơno ki tơrŭm pơla hdroâng mơngế ƀă tơdroăng loi tơngah ki păng ‘nâng hnoăng pơkuâ ngăn dêi Đảng Kŏng san Việt Nam, ki ối a ko cho pôa Nguyễn Phú Trọng, Kăn xiâm pơkuâ hnê ngăn dêi kơdrâm kơdrĕng kuăn pơlê tung lâp tơnêi têa pơla hdrối mê hía nah, jâ Bùi Thị An, Kăn hnê ngăn Khu vâi kơdrâi ki rơkê dêi Hà Nội, Ngế pơkuâ Kâu lăk ƀô̆ vâi kơdrâi hriăn ngăn ‘na khoa hok dêi Khu tơrŭm pêi cheăng pơlê kong kân Hà Nội ai tối, drêng châ tâng tơdroăng ki pôa Nguyễn Phú Trọng, Kăn xiâm pơkuâ hnê ngăn tơdah xo Mê dái Hơlŏng trĭng, xua ing mâu chêh hlá tơbeăng chêh tối:

“Mê dai Hơlŏng trĭng cho tơmeăm ki kơnía git má môi dêi tơnêi têa Việt Nam, drêng diâp ăm pôa Nguyễn Phú Trọng, Kăn xiâm pơkuâ hnê ngăn cho vâ mơhno tối tơdroăng ki koh mơnê kân khât dêi tâi tâng Đảng, tâi tâng kuăn pơlê, tâi tâng khu lêng ƀă Kăn xiâm pơkuâ hnê ngăn”.

Ai hên tơdroăng, hên rơkong ki tối mơnhên, tung 3 hneăng hiăng luâ, ing Hneăng 11 hơnăm 2011 troh nôkố, pôa Nguyễn Phú Trọng hiăng ai hên hnoăng cheăng kâ kĕng ƀă hneăng ki mơnhông tơnêi têa, ki rơhêng vâ tối cho tung pơla thăm mơdêk pêi cheăng ƀă kơmăi kơmok, tơdroăng cheăng kâ rêh ối tiô chal nếo, tơrŭm ƀă mâu kong têa vâi ê tung lâp plâi tơnêi, rak vế, pêi pro hnoăng cheăng kân, ton xŏn krá tơniăn tung kring vế, rak ngăn Tơnêi têa tung chal nếo. Ki rơhêng vâ tối, Kăn xiâm pơkuâ hnê ngăn hiăng ai hnoăng kân ‘na tơpui lý luận, ƀă tơdroăng ki chêh tối hên, hbo tung khu kơxop hlá mơ-éa klêi kơ’nâi to lâi chât hơnăm hriăn plĕng ƀă hiăng châ hlo ai tơdroăng ki nếo, mê cho “Mâu tơdroăng ki tơpui lý luận ƀă ki păng’nâng ‘na chuh ngiah xah hô̆i ƀă troăng prôk tiô troăng chuh ngiah xah hô̆i a Việt Nam”. Kố cho tơdroăng ki mơgêi tung pơla pơhlêh nếo, pêi adrêng ƀă troăng hơlâ xah hô̆i chuh ngiah ki Pôa Hồ hiăng rah xo. Xua ti mê, mê dai ki kơnía má môi dêi Đảng ƀă Tơnêi têa hiăng diâp ăm pôa Nguyễn Phú Trọng cho vâ mơnê ƀă séa mơnhên kân kĕng ó khât hnoăng ki hiăng pleăng dêi Kăn xiâm pơkuâ hnê ngăn, ing mâu kơvâ cheăng dêi tơná. Pôa Đào Duy Quát - Phŏ Yăo sư - Tiê̆n sih, Kăn xiâm phŏ hnê mơhno cheăng kal kí xiâm tơnêi têa ai tối:

“Đảng, Tơnêi têa pin hiăng tối tơbleăng ƀă pơkâ hnối diâp Mê dai Hơlŏng trĭng ăm pôa Nguyễn Phú Trọng cho môi tơdroăng ki vêh mơnhên tối dêi Đảng, Tơnêi têa ƀă Kuăn pơlê pin ƀă hnoăng cheăng ƀă mâu hnoăng ki veăng mơ’no dêi hnoăng, ivá mơno tơná kân kĕng má môi dêi pôa Nguyễn Phú Trọng ƀă hnoăng cheăng kăch măng ƀă tơdroăng pơhlêh nếo dêi Tơnêi têa pin, hdroâng kuăn ngo pin; ngăn kố cho tơdroăng ki vêh mơnhên hnoăng cheăng, tơdroăng ki pleăng dêi ivá mơno kân kĕng, ki rơkê ó má môi ƀă hnoăng cheăng kăch măng dêi hdroâng mơngế pin”.

Pôa Y Nuel Niê, kăn pơlê ƀuôn Akŏ Dhông, bêng Tân Lợi, pơlê kong kơdrâm Ƀuôn Ma Thuột, kong pơlê Dak Lak phiu ro drêng hiăng châ ‘nâi tơdroăng ki Khu xiâm ngăn cheăng Kal kí hiăng ai pơkâ diâp Mê dai Hơlŏng trĭng ăm pôa Nguyễn Phú Trọng. Pôa Y Nuel Niê ai tối tiah kố:

“Pôa Nguyễn Phú Trọng châ tơdah xo Mê dai Hơlŏng trĭng cho tơxâng khât. Hnoăng ki kân kĕng má môi dêi pôa mê cho tơplâ mơdât kâ kơluâ, kâ hơré, hiăng châ pêi pro ó rơdêi khât, chôu on athế chôu troh a xiâm rêi ga. Troh nôkố, tơdroăng ki tơplâ mơdât kâ kơluâ, kâ kơhveăm hiăng hlo pêi pro châ tơƀrê ƀă kơtăng khât”.

‘Na Khu xiâm ngăn cheăng Kal kí hiăng Pơkâ diâp Mê dai Hơlŏng trĭng diâp ăm pôa Nguyễn Phú Trọng, pôa Trương Duy Cảng, 70 hơnăm, tung mê hiăng 44 hơnăm Đảng, hngêi ối a tôh kơphô̆ 2, bêng Lê Lợi, pơlê kong kơdrâm Kon Tum, kong pơlê Kon Tum tối ăm ‘nâi:

“Tơdroăng ki pôa Nguyễn Phú Trọng châ Tơnêi têa diâp Mê dái Hơlŏng trĭng cho tơxâng ó khât. Hiâm mơno dêi pôa cho hiâm mơno dêi ngế Kŏng san hơ-ui gum kuăn pơlê, xua vâ mơnhông kuăn pơlê. Ki rơhêng vâ tối, tung hnoăng cheăng tơplâ mơdât khu ngế kâ kơluâ, kâ kơhveăm, tiô hnoăng cheăng dêi Đảng ƀă Tơnêi têa, ki xiâm cho ing pôa Nguyễn Phú Trọng, cho Kăn xiâm pơkuâ hnê ngăn tơplâ mơdât kâ kơluâ, kâ kơhveăm, cho hnoăng cheăng dêi Đảng, mê pôa hiăng pơkâ pêi pro kơtăng ó khât, khŏm mơ-eăm, ôh tá ví, ôh tá ai tơdroăng ki pơxúa krê ăm tơná, ôh ta xê tơdroăng mê vâ tăng liăn ngân, tơmeăm khoăng. Pôa pro ti mê, cho vâ ăm kuăn pơlê loi, Đảng loi, tơdroăng pêi cheăng kâ rêh ối tiô troăng xah hô̆i chuh ngiah châ mơnhông rơdêi. Mâu rơxông kăn ƀô̆ ki kơ’nâi pôa kal athế hriâm tâp, djâ troăng tơxâng cho đảng viên, tơxâng cho mâu kăn ƀô̆, tơxâng cho kuăn pơlê dêi tơnêi têa Kŏng hoa xah hô̆i chuh ngiah Việt Nam”.