Po troh tâi hâi lơ 31/12/2023, Tơdroăng kố cho vâ tơbleăng troh tơmối ôm hyô tâ tá kơbong rơpâu to kế tơmeăm ton nah, kế xúa, chăng, vok, ‘nêk xúa tung pêi cheăng dêi hdroâng kuăn ngo Tây Nguyên xua ngế ki tăng tơkŭm kế tơmeăm ton Đặng Minh Tâm hriăn, tơkŭm. Mâu kế tơmeăm ki ton kố châ mơđah tơbleăng bro 6 khu mê cho: Mâu prôa, mâu mơnĕng ƀă kế ki xúa tung tơdroăng ki lăm lúa kuăn kiâ, kế ki tĕn, kế ki xối pleăng, ƀă mâu kế tơmeăm ki ê xúa tung tơdroăng rêh ối dêi kuăn pơlê hdroâng kuăn ngo Tây Nguyên.

Mâu kế tơmeăm ki châ mơđah tơbleăng tiô troăng tíu ‘măn rak kế tơmeăm, tơmối ôm hyô châ ngăn, châ pêi ƀă mâu kế tơmeăm ki kơnía git kố. Xuân tung pơla po tơdroăng, mâu kế tơmeăm kố kô châ ‘mot tơ’nôm pro ki nếo sap ing tơdroăng ki tăng tơkŭm châ lối 30 rơpâu to kế tơmeăm ton nah Tây Nguyên dêi ngế ki tơkŭm kế tơmeăm ton nah Đặng Minh Tâm.