Hâi lơ 19/7, a pơlê kong kơdrâm Ƀuôn Ma Thuột, Kăn xiâm teăng mâ tơpui kâ kong têa Hà Lan tơrŭm rơtế Tíu chôu ‘măn tơmeăm khoăng lâp plâi tơnêi Kơphế tơkŭm po pơxiâm po mơđah tơbleăng um, kế tơmeăm “Krá tơniăn – Mâu tơdroăng ‘na vâi kơdrâi pơtâng ăm hâk vâ pêi ăm tơdroăng hơ’lêh”.

Kố cho tơdroăng ối tung tơdroăng leh tơbâ 50 hơnăm tơrŭm tơpui kâ pơla Hà Lan – Việt Nam. Tơkŭm po sap ing kố troh tâi hâi lơ 19/8 la ngiâ, Mơđah tơbleăng mâu tơmeăm ngê̆ thuât dêi 17 ngế xup um a 13 kong têa, ƀă tơdroăng xiâm cho mâu tơdroăng djâ troh troăng ngăn trâu hơngế ‘na um méa mâu vâi kơdrâi tung lâp plâi tơnêi hiăng tơkâ hluâ pơloăng mơnúa, tơdroăng rêh ối pá puât.

Mâu tơmeăm mơđah tơbleăng hiăng châ kâ pri kân tung roh mơđah tơbleăng châ tơkŭm po a kong têa Hà Lan hơnăm 2021, pro tơdjâk rơdêi troh kuăn pơlê a kong têa reăng Tulip, mơhno tơdroăng ki nhuô̆m mâu tơdroăng veăng kum dêi vâi kơdrâi ƀă mơhno hiêm mơno nhuô̆m ƀă tơdroăng ki krá rơdêi dêi vâi.

 Tung tơdroăng mơđah tơbleăng xuân hiăng tơkŭm po roh tơpui tơno ƀă mâu nhŏng o ki châ krếo ki má môi mơtiah Droh hơduăng lĕm Việt Nam H’ Hen Niê ƀă mâu vâi kơdrâi tê mơdró châ tơƀrê tung mâu kơvâ cheăng. Vâi hiăng tối mâu tơdroăng krê dêi tơná pêng tơdroăng ki hâk vâ pêi ‘na tơdroăng krá rơdêi rơtế troăng prôk tơkâ hluâ pá puât, pơloăng mơnúa vâ châ tơƀrê ƀă tíu cheăng ối tung pơlê pơla.