Tơkŭm po sap ing kố troh tâi hâi lơ 15/4 la ngiâ a Tíu chôu ‘măn tơmeăm khoăng ton nah kong pơlê Dak Lak, mơđah tơbleăng 120 ƀai xup um ƀă tơdjêp ƀă tơdroăng mơđah tơbleăng tơdroăng ki ai khât ‘na mô đô̆i gâk tơkăng kong. Kố cho mâu um châ rah xo ing mâu roh prôk ki păng ‘nâng chêh xo, mâu roh lăm pêi cheăng tíu gâk tơkăng kong dêi mâu ngế chêh hlá tơbeăng ƀă mâu ngế xup um, xup mâu um mô đô̆i gâk tơkăng kong Việt Nam tối tơdjuôm ƀă kong pơlê Dak Lak tối krê.

Ing mê tơbleăng, pơtâng tối ‘na tơdroăng 65 hơnăm mơjiâng ƀă mơnhông dêi Mô đô̆i gâk tơkăng kong Việt Nam, Mô đô̆i gâk tơkăng kong Dak Lak; chêh tối mâu tơdroăng ki lĕm dêi kăn ƀô̆, mô đô̆i gâk tơkăng kong tung tơdroăng pêi pro hnoăng cheăng gâk kring hnoăng pơkuâ gâk kring tơkăng kong, gâk kring tâi tâng kuăn pơlê ƀă hnoăng pơkuâ tơnêi tơníu tơnêi têa.