Mê cho rơkong rơkâu xối dêi pôa Ksor Lol, hmâ krếo Pôa Sơ, Krâ pơlê, xuân cho Ngê̆ nhân ưu tŭ, rơkâu xối a rơpŏng hngêi dêi nôu H’Guan, a pơlê Rbai, cheăm Phú Thiện, kong pơlê Gia Lai. Rơkong ki rơkâu xối mê ai tối nhên xiâm rêi dêi leh mơdĭng, mê cho nâ H’Guăn drêng lo prôk a drô troăng, ôh tá mơhúa tro kơtong, mơhúa nâ tro hyông u ê, xua mê, rơpŏng nâ hiăng rơkâu xối xeăng ƀă môi pŭm í, môi xiâm drôu, pâ phep Xeăng vâ tâng, vâ ‘nâi nhên, djâ troăng ăm mơhúa nâ rĕng prếo vêh mot tung châ nâ.

Rơkâu xối xeăng kố hmâ pro a tơdế leăn hngêi trá, mâu tơmeăm hdroăng mê ai 2 vó drôu xiâm, 1 to í pôh, 2 ‘noăng pôm loăng âp, hiăng hbrâ ‘măn lế lĕm a kơtŏn ki hiăng lêh hlá priât ki ối drêh; pakĭng mê ai ếo ki hiăng ton dêi nâ H’Guăn ki sap drêng nâ trâm xía vâ. Pôa pơchâu mê cho pôa Ksor Lol - Xuân cho krâ pơlê, kŏng rế râng klŏng phêa bêng têa a ngâ vó, rế rơkâu xối kơ xeăng. Drêng têa bêng hiăng pêng a ngâ vó, krâ pơlê râng triăng drôu ăm nâ H’Guăn i ôu. Klêi kơ’nâi ôu tâi môi keăng drôu, nâ H’Guăn dó trối dêi châ tơná châ ai tơ’nôm ivá ki mo rơdêi, ƀă loi tơngah dêi mơhúa hiăng vêh ƀă dêi châ tơná.

“Hâi kố, rơpŏng á tơkŭm po rơkâu xối xeăng vâ mơhúa á ‘nâi kơnó prếo vêh ƀă dêi châ tơná, vêh ối ƀă dêi rơpŏng, tơdrêng amê, hnối rơkâu ăm châ tơná châ hluăn ing tơdroăng ki hgốu, trâm hên tơdroăng pon mơhúa ƀă rêh ối tơniăn.”

Rơkâu xối thế mơhúa prếo vêh ƀă dêi châ ăm Nâ H’Guăn kô ai nôu pâ ƀă mâu ngế tung rơpŏng hngêi. Klêi kơ’nâi tơdroăng rơkâu xối dêi krâ pơlê, jâ Nôu H’Guăn xuân rơkâu xối mơhno tối ‘na tơdroăng ki vâ tơdah mơhúa dêi kuăn kơdrâi châ prếo vêh. Nôu H’Guăn ai tối tiah kố, klêi kơ’nâi kuăn kơdrâi tro trâm xía vâ a drô troăng, sap ing hâi ki mê ga iâ tơpui, tung hiâm mơno ga ôh tá vâ tơpui. Tiô tơdroăng ki hmâ loi dêi mơngế Jarai, mê cho xua mơhúa ga hiăng tro hyông, xua mê, rơpŏng hngêi khoh rơkâu xối xeăng vâ ăm dêi kuăn châ tơniăn vêh ai nếo tơdroăng rêh ối ki hmiân triê̆n.

“Rơpŏng hngêi tơkŭm po tĭng rơkâu xối pâ mơhúa ăm muăn. Pơla hdrối kố nah, muăn kơto rơxế kơtong rơxế, tiô khôi tơlá dêi kuăn ngo mê pơkal athế ai tĭng ki rơkâu xối va tah lôi tơdroăng i hơgốu, ƀă hnối krếo mơdrêo dêi mơhúa i vêh, xâu mơhúa ối prôk hyông ukố umê, ôh tá hâi teăm prếo vêh mot ối tung châ chăn tơná. Ngin hiăng krếo pôa pơchâu troh a kố vâ rơkâu xối, krếo thế mơhúa vêh mot ối dêi tung châ ngế muăn ki mê, vâ muăn pơtối ai ivá mo rơdêi, tơniăn lĕm.”

Pôa Nay Wih, ối krếo cho Pâ H’Guăn tối ăm ngin ‘nâi, Tĭng rơkâu xối mơhúa prếo vêh cho khôi hmâ dêi mơngế Jarai, hiăng ai sap ing chal vâi krâ ton nah. Tĭng rơkâu kố châ po pro kân lơ kŭn ngăn tiô kơ tơdroăng ki ngế ki mê tro. Tâng bu kơtong lơ tro tơlêa iâ êt, mê rơpŏng hngêi hmâ tơkŭm rơkâu xối iâ tê, ai môi to í ƀă môi xiâm drôu. La tâng tung rơpŏng ai mơngế ki tro xía vâ kân, mê vâi kô po kân tâ, kô pôh 1 to pu pái lơ 1 to chu. Vâi hmâ djâ 1 to pu pái a kĭng têa kroăng vâ rơkâu, cho vâ mơhno tối troh tah lôi mâu tơdroăng ki hgốu, tơdroăng hơdrâi. Tâng ôh, ai mâu ngế ki ‘nâ vâi pôh 1 to chu kriếo ƀă drôu xiâm rơkâu xối xeăng a hngêi vâ rơkâu pâ ai ivá mo dâi lĕm, tơniăn ăm ngế ki trâm xía vâ mê.

“Rơkâu xối krếo mơhúa vêh mê cho vâ krếo kơ mơhúa vêh mot tung dêi châ, vêh ƀă rơpŏng hngêi. Khôi tơlá ki kố hiăng ai sap ing chal vâi krâ roh nah, pơtroh ăm kuăn ‘nĕng, cháu chái tung chal nếo nôkố. Tiô khôi túa, vêa vong kố, drêng ai ngế ki lâi ‘lo ôh tá mơhúa tro kơtong rơxế lơ trâm tơdroăng xâu xiá ki ê, mê nôu pâ, rơpŏng hngêi kô po rơkâu xối xeăng vâ krếo mơhúa châ vêh dêi a hngêi, ôh tá ăm mơhúa tro hyông a tơdế troăng, tung kong kế, rĕng prếo vêh ƀă dêi rơpong hngêi. Kố cho khôi túa ki hiăng ai sap ing nah dêi hdrông mơngế Jarai, ing hên chal hdrối mê hía nah.”

Tĭng rơkâu xối krếo mơhúa dêi mơngế Jarai mê cho tơdroăng loi tĭng, vâ krếo thế mơhúa prếo vêh ƀă dêi châ chăn, hơlêm mơhnhôk i hiâm mơno dêi ngế ki tro xía vâ mê. Rêm xoh rơkâu xối pơrá ai tuăn loi khât tung pơla mơhúa ƀă châ chăn, pơla rơpŏng hngêi ƀă khu xeăng, pơla kuăn mơnguế ƀă kong kế, ngo ngối.

Nôkố, pakĭng tơdroăng ki djâ mơngế ki tro trâm xía vâ mê lăm khăm pơlât a hngêi pơkeăng, klêi mê, mơngế Jarai a Phú Thỉện, kong pơlê Gia Lai xuân ối hmâ rak vế dêi tĭng rơkâu xối mơhúa prếo vêh, kố châ ngăn cho tơdroăng ki vâ mơhnhôk, hơlêm ăm tuăn i hiâm thăm rế hmiân, tơniăn tuăn drêng ai tơdroăng ki xía vâ tung rêh ối.