Sap ing kơneăng têa Ƀuôn K’Li A (bêng Đạt Hiếu, pơlê kong krâm Ƀuôn Hồ, kong pơlê Dak Lak) châ ‘mâi  pro nếo, mơhế hngêi hiăng ai têa klôh la nâ H’En Niê xuân ối lăm a kó hnêng têa. H’En châ nôu ga hnê pro rế pế drôu xiâm. Nâ H’En thăm ro tâ drêng ‘nâi pơlê tơná nếo mơjiâng khu pêi cheăng tơrŭm pêi chiâk hmâ pro mâu tơmeăm tiô chal ton nah, tung mê pế drôu xiâm.

Nôkố drôu xiâm OCOP Ƀuôn K’Li A ôh tá xê to têk ôu tung mâu rôh ai tơdroăng xah ro dêi pơlê, hâi mơdĭng dêi pơlê mê ối têk ăm tơmối ki troh lăm ôm hyô, ƀă tơbleăng troh lâp lu tơnêi têa.

“A púi vâ rêm râ kăn pro tơ’lêi hlâu vâ po mâu lâm hnê ăm vâi hdrêng  tung Ƀuôn K’Li A châ hriâm tơdroăng cheăng ton nah dêi kuăn ngo tơná. Kuăn kơdrâi hriâm teăn hmôu, pế drôu; kuăn kơnốu hriâm teăn kơtum kơtŏn ki kố ki mê, hriâm rêi têng nêng, tŏn chêng. Ai tiah mê ‘nôi nếo kâi rak krá túa lĕm tro dêi kuăn ngo”.

Tơdroăng rêh ối dêi kuăn pơlê Rơđế a Ƀuôn K’Li A ki hên kơnôm to pêi chiâk, ƀă pêt kơphế, tiu, sầu riêng. Kot mâ ƀă xông kân a tơnêi ki kố, pôa Y Chép Mlô hlo môi tiah hiăng pơhlêh mơnhông tơƀrê tơrêm hngêi tung pơlê; Cheăng kâ rế xông há, ôh pá ai xếo rơpŏng xâu kơklêa, ôh tá ai ếo sâp. La pôa Y Chép Mlô xuân ối rơrêk tung hiâm mơno drêng pâ troh mâu hâi ki ton ti na nah, ƀă tơdroăng rơhêng hmâ hơ’muăn, hêng hmâ idrâp chêng, idrâp đing buôt lơ idrâp drâi pêi báu... Tâi tâng mê bú ối tung ngôa tơmiât troh ton tĭn nah kơdrâ môi tiah tơbâ, mơhno nếo. Pôa Y Chep Mlô phiu ro:

“Tâi tâng rêm ngế tung pơlê xuân hmâng tiô krâ pơlê ƀă kăn pơlê hnê, kơhnâ pêi cheăng kâ vâ mơnhông dêi rơpŏng hngêi, hngêi ki lâi xuân ‘măn kơdĭng dêi tơmeăm. Hên rơpŏng hngêi hiăng mơjiâng pro hngêi lĕm, rôe tơmeăm ki kơnâ lĕm nôkố xua tung rơpŏng hngêi. Nôkố ngin hiăng tơmâng khât tơdroăng pơtối rak túa lĕm tro dêi kuăn ngo tơná”.

Pôa Y Ngia Mlô, Kăn hnê ngăn chi ƀô̆ Ƀuôn K’Li A ăm ‘nâi tung kơxô̆ 277 rơpŏng dêi pơlê ki ối tung pơlê bu ai 13 rơpŏng kơtiê, ai troh 43 rơpŏng kro mơdrŏng. Nôkố pơlê ki kố xuân ối 40 toăng hngêi trá xŏn ton nah. Ai 5 rơpŏng hiăng ‘mâi pro, krâ ‘măn tơ’nôm mâu tơmeăm vâ xúa a hngêi trá xŏn dêi tơná vâ pro tíu lăm rêh ối ƀă pơchên kế kâ têk ăm tơmối. Chi ƀô̆ nếo tơ’mot 2 ngế đảng viên, pro kơxô̆ mơngế mot đảng viên dêi chi ƀô̆ tâk 17 ngế. Kố cho mâu ngế ki xiâm tung mơnhông cheăng kâ; tah lôi túa tơlá ôh tá tro, pơtối rak túa lĕm tro dêi mơngế Rơđế.

“Ngin đi đo rak túa lĕm tro dêi mơngế Rơđế, mê cho: Mơdĭng kleăng têa, mơdĭng rơkâu ivá mo lĕm ăm vâi krâ nhŏng o ê tung pơlê. Vâi krâ nhŏng o xuân pế drôu xiâm, rak hngêi trá xŏn, ƀă mâu prôa, malối cho chêng’’.

Jâ Nguyễn Thị Trúc, Kăn hnê ngăn Đảng ủy bêng Đạt Hiếu ăm ‘nâi: Tơdroăng tơkêa bro: “Mơnhông ôm hyô tung kuăn pơlê ƀă pơtối rak ki kơnía pơxúa lĕm tro dêi chêng, mơnhông tơdroăng pế drôu xiâm chiâng tơmeăm OCOP” ai ki môi tuăn dêi rêm ngế a Ƀuôn K’Li A . Đảng ủy hiăng pơcháu ăm khu grup, khu tơrŭm cheăng kal kí dêi bêng pêi pro. Jâ Nguyẽn Thị Trúc tối:

“Pơtối rak vế pêi pro ki kơnía túa lĕm tro ƀă mơnhông ôm hyô. Pơkâ mơnhông ôm hyô tung pơlê xuân môi tiah pơtối rak ki pơxúa túa lĕm tro tŏn chêng. Pơtối mơnhông tơdroăng cheăng pế drôu xiâm vâ chiâng môi tơmeăm OCOP vâ têk ôu drêng ai tơmối troh ôm”.

Vâ gum khu pêi cheăng tơrŭm teăn hmôu Ƀuôn K’Li A pơtối pêi cheăng teăn, Khu ngăn vâi kơdrâi pơlê krâm Ƀuôn Hồ hiăng tơrŭm ƀă Tiú tơkŭm hnê cheăng pêi po lâm hnê teăn hmôu, hlối ăm vâi nâ o dêi pơlê 3 to mâu loăng kế vâ teăn. Jâ Nguyễn Phạm Minh Tiết, Kăn hnê ngăn Khu vâi kơdrâi pơlê kong krâm Ƀuôn Hồ tơchê̆ng tô tuăn hên: kal pro ki klâi vâ tê mâu hmôu jiâ, ếo pơtâk teăn mê vâ tơniăn ăm mâu ngế tung khu pêi cheăng châ xo tơ’mot liăn” Vâi châ vâ rêh ƀă tơdroăng cheăng teăn hmôu mê tơdroăng cheăng teăn pơtối ối châ rak’’.

“Pakĭng ăm liăn vâ pêi cheăng, hnê tơdroăng cheăng mê mâu ngế tung khu pêi cheăng tơrŭm mê thế ai pơkâ troăng rơhlâ tê mơdró tơƀrê vâ tơmeăm vâi teăng ôh tá xê to vâ tơbleăng tê mê ối châ troh ƀă kuăn pơlê ki rôe xúa. Thế ai tuăn mơ-eăm ƀă pơtối pêi cheăng tâi ivá tơná tung tơdroăng pơtối rak túa lĕm troh dêi hdroâng kuăn ngo’’.

Hnê têa hngíu rơngiâp ing têa mŏng lo ing tơnêi, dêa a xiâm drôu hiăng kât a xiâm trăng. Kŏng râng triăng ki tâp a xiâm drôu, xú pro hêng ôu ing drông xăng ngeăm lĕm. Idrâp chêng chuât xtó ing mâu kuâ hngêi trá xŏn, pơ eăng troh lâp lu mâu kơdrung kơphế ngiêt lĕm dêi buôn K’Li A, bêng Đạt Hiếu, pơlê kong krâm Buôn Hồ./.