Tơkâ luâ 35 hơnăm mơjiâng ƀă mơnhông, Kâu lak ƀô̆ Xup um dêi ngế kơdrâi Hải Âu cho hngêi ối tơdjuôm dêi mâu ngê̆ sih xup um ki rơkê ƀă châ vâi loi tung khu ngê̆ thuât hiăng hdró tơdroăng ƀă mâu tơdroăng ki rơkê lĕm, hên ngế pêi cheăng châ kâ hên inâi ki kơnía tung kơvâ cheăng xup um Việt Nam ƀă kong têa ê. Drêng tơbâ 35 hơnăm mơjiâng, Kâu lak ƀô̆ Hải Âu pơxiâm mơhno mâ kơxop mơ-éa um ai inâi: “Mơhno lĕm ro ‘na rêh ối” mâu hdroâng kuăn ngo Việt Nam”.

54 to kơtâ um ki lĕm xup rơkê má môi châ mơđah tơbleăng a rôh mơđah rôh kố cho mâu um ki châ rah xo sap ing 298 kơtâ um dêi 25 ngế ki tơrŭm tung inâi um “Mơhno lĕm tro ‘na rêh ối mâu hdroâng kuăn ngo Việt Nam”. Jâ Nguyễn Hồng Nga, Ngế cheăng tung Khu pơkuâ Hô̆i ngê̆ thuât xup um Việt Nam, phŏ kăn hnê ngăn Hô̆i xup um Pơlê kong kân Hồ Chí Minh, Phŏ kăn pơkuâ xup um Kâu lak ƀô̆ Hải Âu ăm ‘nâi:

“Vâ ai mâu um ƀă mâu um in tung inâi “Mơhno lĕm ro ‘na rêh ối mâu hdroâng kuăn ngo Việt Nam: Kâu lak ƀô̆ ngin hiăng tơbleăng xup tung pơla 2 hơnăm ƀă rah xo nhên sap ing lối rơpâu to kơtâ um, vâ rah xo mâu um ki lĕm ‘mot tung inâi ƀă mơđah tơbleăng. Kố cho đề tài ki xơpá, rôh kố ai 36 hdroâng kuăn ngo ngin ăm mâu um kố ‘mot tung inâi cho môi tơdroăng ki mơ-eăm kân khât. Xua tung rêm hdroâng kuăn ngo mê ai hên kơvâ, ngin púi vâ ăm tâi tâng mâu hdroâng kuăn ngo sap ing Kơnhŏng troh peăng Hdroh, sap ing kơpong Tây Nguyên, tơbăng troh kơpong hơngế hơngo, mâu tíu ki ngin hiăng prôk troh tung plâ 35 hơnăm”.

Lăm ngăn rôh mơđah tơbleăng kố, kuăn pơlê châ ngăn ki lĕm dêi kong kế, kuăn mơngế ƀă túa lĕm tro tung lâp kơpong tơnêi têa ing víu ngăn ki ƀriê tung hiâm mơno ƀă hên ngê̆ thuât dêi mâu vâi kơdrâi ki xup um kâu lak ƀô̆ Hải Âu. Pôa Nguyễn Trùng Nhị, Pơlê kong kân Hồ Chí Minh, tối:

“Víu ngăn dêi mâu nâ o kâu lak ƀô̆ xup um Hải Âu ăm hlo ai mâu tơdroăng mơnhên tối, túa tơmiât ‘na hdroâng kuăn ngo gá ro, chiâng vâ nhuô̆m, gá djâ troh túa ki lĕm, krê dêi rêm hdroâng kuăn ngo túa lĕm tro tơdjuôm dêi Việt Nam”.

O Trà My, sinh viên hngêi trung Đăi hok Rmit, ăm ‘nâi:

“Troh a rôh mơđah tơbleăng um hâi kố, á hâk vâ khât cho môi mơngiơk, tâi tâng mâu kơtâ um pơrá rơ-eăng lĕm. Kuăn mơngế châ chêh ‘mot tung tíu ki ‘măm um, kuăn mơngế tung kong kế ƀă kuăn mơngế tung pơla ki vâi kot mâ”.

Pakĭng tơdroăng ki mơđah tơbleăng, Kâu lak ƀô̆ Hải Âu ối xo môi iâ liăn ki châ xo ing tơdroăng ki tê um, tê mơ-éa um ƀă mơđah tơbleăng vâ tơkŭm liăn tŏng gum mâu xơpá, tơdjuôm ivá gum mâu ngế ki ôh tá mơhúa, malối cho mâu ngế ki tro trếo ‘mêi dioxin. Mơđah tơbleăng “Mơhno lĕm ro ‘na rêh ối mâu hdroâng kuăn ngo Việt Nam” lôu péa ôh tá ai hâi chôu pơkâ a Tíu ‘măn rak tơmeăm Vâi kơdrâi Việt Nam troh tâi hâi lơ 15/10.