Drêng troh hâi xối tơbâ Pơtáu Hùng hâi lơ 10 khế 3 âm lịch riên tiô mâ khế hơnăm kố cho chuồ Tháp Kỳ Quang, a cheăm  Đăk Mar, tơring Đăk Hà, kong pơlê Kon Tum. Kuăn pơlê kuăn ngo Rơteăng, Bơhnéa... tung kơpong kơhnâ veăng ing tơdroăng hbrâ. Tơdrêng ƀă veăng kum Khu tơkŭm po ‘na pơchên kế kâ, tơdah tơmối hên mâu droh rơtăm ối veăng tơ’noăng ivá mê cho tơ’noăng trut loăng, hrot kơxái, hếo loăng ki pik rơmâ....

Tung hâi xối tơbâ, tơdrêng ƀă pleăng mâu tơmeăm ki kal, tơmeăm ki kơhiâm xua tơná pin pêi pế dêi, mê cho tơxông, kơphế, plâi kâ... pleăng ăm Pơtáu Hùng, kuăn pơlê ối tŏn chêng, kơ’râu xuăng vâ mơhno ki sôk ro mơnê khât kơ khu Pơtáu Hùng ƀă mâu jâ pôa hiăng ai hnoăng mơjiâng tơnêi têa, rak tơnêi têa. Ngoh A Thiếk, pơlê Kon Klốc, cheăm Đăk Mar, tơring Đăk Hà, ăm ‘nâi:

“Rêm hơnăm, troh hâi xối tơbâ Pơtáu Hùng, thôn Kon Klốc ngin đi đo tơkŭm mâu hiăng krâ, mâu hơnăm ối nếo tơkŭm tŏn chêng, xuăng hơdruê vâ pâ troh hâi xối tơbâ.  Tơdroăng tơkŭm po mê ôh tá xê to châ trâm  dêi rơpó mê ối kal vâ mơdêk tơrŭm môi tuăn tung thôn pơlê. Rêm thôn pơlê ai mơdĭng, lơ a mâu hâi mơdĭng kân dêi tơnêi têa mê ôh tá la lâi lối chêng koăng, kơ’râu xuăng, hơdruê, rơngêi, ting ting. Pâ hâi xối Pơtáu Hùng, ngin ôh tá xê to tơkŭm tung môi pơlê mê mâu pơlê ki ê xuân tơkŭm po, trâm mâ  dêi rơpó vâ hnê ăm mâu rơxông nếo hlê tơdroăng ki lĕm ton nah “Khoh niân tiah hâi kố kơnôm hnoăng vâi krâ nah”, pâ mâu ai hnoăng, pâ troh mâu Pơtáu Hùng hiăng ai hnoăng mơjiâng tơnêi têa, kơnôm ing mê, pin ai tơdroăng rêh ối phâi tơtô, hơniâp ro môi tiah hâi kố”.