Tơkâ hluâ 80 hơnăm, Rơ’jíu Việt Nam hiăng chiâng ngế pú hmâ achê, hmâ ƀă pơlê Tây Nguyên. Ôh tá xê to djâ troh mâu tơdroăng nếo ai, mâu ƀai rơhdruê xuăng, tơdrá prôa, tơmâng mâu tơdroăng tơpui dêi Rơ’jíu Việt Nam, ối kum kuăn pơlê hlê plĕng ki rơkê pêt tơmeăm, păn mơnăn, gâk ngăn kong, rak tơdroăng khôi túa lĕm tro... Kơnôm ti mê, kuăn pơlê khên tơnôu mơ-eăm mơjiâng tơdroăng rêh ối phâi hơtô, hơniâp lĕm.

Kuăn pơlê mâu hdroâng kuăn ngo Tây Nguyên đi đo ngăn Rơ’jíu môi tiah ngế pú hmâ achê. Krâ pơlê inâi Y Thành 68 hơnăm, cheăm H’Ra, kong pơlê Gia Lai tâ rơrêk tung hiâm mơno.

‘’Ing Rơ’jíu mê á châ tâng rơkong Tơbleăng tơniăn krê dêi Pôa Hồ a hơnăm 1945. Tâ rơrêk tung hiâm mơno! Xuân kơnôm Radio mê hâi lơ 30/4/1975, kuăn pơlê châ ‘nâi Peăng Hdroh tơnêi têa châ tơleăng lĕm. Drêng mê ngin a kơpong đông kăch măng, drêng châ ‘nâi tơdroăng kố tâi tâng kuăn pơlê tung pơlê phiu ro. Má péa nếo, á châ tâng Rơ’jíu Việt Nam ai tơpui nâl Bơhnéa, Jarai, Rơteăng ƀă mâu hdroâng kuăn ngo ki ê... á phiu ro ‘nâng drêng nâl tơpui dêi nôu châ rak, mơ’no tung hyôh. Rơ’jíu ối hnê mơhno ăm kuăn pơlê păn mơnăn mơnôa, pêt tơmeăm, mơjiâng tơdroăng rêh ối nếo. Á đi đo tơmâng klêi mê tối ăm kuăn pơlê mâu tơdroăng ki tro ki á tơmâng ing Rơ’jíu’’.