A Gia Lai, tơdroăng xối tơbâ Pơtáu Hùng châ tơkŭm po a tíu xối tơbâ Pơtáu Hùng a Kŏng viên Đồng Xanh, pơlê kong kơdrâm Plei Ku, tơ’mot hên kuăn pơlê ƀă tơmối troh chôu tâp tơbâ mâu hnoăng pơtáu. Mơdĭng tơbâ mê mơhno hiâm mơno tuăn loi, “Khoh niân tiah hâi kố kơnôm hnoăng vâi krâ nah” pâ kơ mâu ai hnoăng  dêi mâu ngế a tơnêi Gia Lai ƀă mâu pơtáu Hùng tung hâi Xối tơbâ Pơtáu Hùng ki tĭng. Ƀă mơngế Jarai a Gia Lai, tơdrêng ƀă pâ hnoăng dêi mâu Pơtáu Hùng, kuăn pơlê ối loi tĭng xối xeăng, ƀă tuăn loi ‘’Tơmeăm kuăn kiâ pơrá ai xeăng”, mê cho mâu xeăng ngo, xeăng têa, xeăng kong...

Pôa Rơ Ô Phung, krâ pơlê ối a ƀuôn Gum Góp, cheăm Ea Rmok, tơring Krông Pa ăm ‘nâi,a khế 4  rêm hơnăm, mơngế Jarai xuân tơkŭm po mơdĭng xối pơtáu On rơkâu pâ kong mêi tro tô ‘ló, báu alâi châ xo hên.

“Ƀă  mơngế Jarai, sap ing nah troh nôkố, kuăn pơlê xuân pơtối rak vế tơdroăng ton nah nhoăm pâ kơmâu Pơtáu, tung mê ai Pơtáu On. Xua kố cho ngế ki tơmâng khât troh tơdroăng rêh ối dêi kuăn pơlê, púi vâ tơdroăng rêh ối dêi kuăn pơlê thăm rế phâi tơtô, kong mêi tro tô ‘ló, malối a rơnó tô mơdrăng má môi tung hơnăm mê kố cho ngế teăng mâ ăm kuăn pơlê pêi pro mâu tơdroăng xối rơkâu pâ kong mêi, kố xuân cho rôh vâ kuăn pơlê mơhno ki tơrŭm môi tuăn kum dêi rơpó, tơkâ luâ tơdroăng pá. Nôkố mâu kăn kong pơlê xuân tơmâng khât vâ ngin pơtối châ po mơdĭng rơkâu pâ kong mêi, ƀă xuân vâ kuăn pơlê ki achê hơngế ‘nâi troh xối rơkâu pâ ƀă xuân cho vâ pơtối rak túa lĕm tro ton nah dêi kuăn ngo Jarai”.