*Ing tuăn tơmiât ti lâi mê nâ H’Juel ƀă rơpŏng hngêi chiâng po Kŏng ti Leng Gung hmâ mơđah, tơbleăng tối ăm ‘nâi mâu tơmeăm teăn tiô túa lĕm tro dêi mơngế M’Nông a kong pơlê Dak Nông?

H’Juel: Kơtăn kố 10 hơnăm, drêng mê a nếo xo kơnốu, a hlo kuăn pơlê ối rak hên túa lĕm tro ton nah, malối cho mâu tơdroăng mơdĭng xối xeăng, mê tung mâu hâi mơdĭng ôh tá la lâi lôi drôu xiâm. Ing mê, á hriâm ing ngế nôu dêi kơnốu hnê túa pế pro pông drôu pế drôu ƀă pro pló tiô túa ton nah, apoăng pế pro pông drôu 1 troh 2 xiâm drôu vâ rơpŏng hngêi ôu lơ vâ têk ôu tung hâi mơdĭng ki kŭn dêi rơpŏng hngêi, klêi mê chôa pế hên tâ ôh tá xê to vâ têk ôu tung mâu hâi mơdĭng dêi pơlê mê ối vâ tơbleăng ăm hên ngế ‘nâi drôu xiâm pế tiô túa dêi mơngế M’Nông, tơbleăng ăm tơmối lâp lu ‘nâi ƀă nôkố drôu xiâm a hiăng ai hên ngế vâ rôe.

Pakĭng mê, á ối hâk vâ tơbleăng mâu ếo pơtâk teăn dêi kuăn ngo tơná, mâu um rơneăm rơnuâ a ếo pơtâk xuân ai 1 tơdroăng hơ’muăn, 1 tơdroăng ki pơxúa krê xêh tung tơdroăng rêh ối rêm hâi, mâu um ki rơneăm pro mê cho kloăng plôi, kloăng tơ-uâ,  tơkâ, chêm, um mơngế ƀă hên ki ê... ngăn lĕm rơneăm pro môi tiah khât. Mê á hiăng tơmiât thế tơbleăng ăm hên ngế ‘nâi tơ’nôm ‘na túa lĕm tro dêi kuăn ngo tơná, ing mê Kŏng ti pêi cheăng tiô rơnó Leng Gung dêi a châ mơjiâng a hơnăm 2022.

*Tê mơdró mâu tơmeăm teăn ‘na túa lĕm tro gá ai tơdroăng phá klâi ƀă mâu tơmeăm ki ê ƀă tung mê pin thế tơmâng hên tâ tơdroăng ki klâi?

H’Juel: Tê mơdró mâu tơmeăm pê lo tiô túa ton nah dêi kuăn ngo môi tiah drôu xiâm, ếo pơtâk, mâu tơmeăm teăng ƀă rái, kơlá, phêa,  rơchiâ, tơmeăm teăn tê ăm vâi rôe vâ tơbâ pro pơlê xiâm ing tơmeăm teăn, tơmeăm teăn ƀă rái, phêa... ai hên ki phá tơ ê xêh ƀă pá ‘nâng tâng vâ pơchông ƀă tê mơdró tơmeăm ki ê, xua mâu tơmeăm ki mê iâ mơngế vâ rôe, xua mê, vâ tơ’mot tơmối vâ rôe ngin thế teăng tiô kơchơ tê mơdró, pro hên tơmeăm ki hmâ xúa rêm hâi ing buông ki teăn ‘măn lôi hdrối, pôe teăn pro kơtong kŭn tâ liăn, chêp pro kơtong piăng, kep xâk, chêng yep, mâu tơmeăm ki vâ ‘măn tơbâ vâ teăm ai tiô tơdroăng púi vâ dêi tơmối ƀă vâ  mơnhông túa lĕm tro ton nah dêi kuăn ngo tơná ăm hên ngế ‘nâi.

*Mâu tơmeăm teăn tiô khôi hmâ ton nah, tơmeăm teăn ƀă rái, lơ pơlái phêa, kơlá lơ pế drôu xiâm dêi H’Juel tê ăm tơmối, mê hôm ai tơmối vâ rôe há, kơchơ tê mơdró nôkố ti lâi, tơdroăng tê mơdró hôm pá klâi há?

H’Juel: Drôu xiâm xuân môi tiah mâu tơmeăm teăn ƀă rái, phêa, tơmeăm bung, ếo, pơtâk dêi kong ti ngin nôkố hiăng ai hên ngế ‘nâi ƀă chêh inâi vâ rôe ... ôh tá xê to ai tiô tơmối tung kong pơlê Dak Nông vâ rôe mê ối châ hên tơmối a Pơlê kong kân Hồ Chí Minh, Hà Nội krếo vâ rôe, nôkố tơdroăng tê mơdró mâu tơmeăm ki mê xuân tơ’lêi hlâu ai ngế vâ rôe.

*Tơkéa vâ tối kơvâ cheăng tê mơdró dêi rơpŏng hngêi H’Juel dế châ hên mâu kơchơ hơ’lêh mâu tơmeăm ing tê tơmeăm tiô túa lĕm tro ton nah. Tơdroăng tê mơdró mê mơni kô dế veăng ‘no hnoăng kum ăm kuăn pơlê ai cheăng pêi, mơdêk pê kuăn pơlê ki ối a pơlê châ pê lo liăn?

H’Juel: A phiu ro xua mâu tơmeăm teăn tiô túa ton nah dêi kuăn ngo tơná ai hên ngế ‘nâi, ƀă kum mâu ngế ki rơkê teăm tơmeăm ƀă rái kơlá, phêa, mâu ki rơkê teăng buông ếo pơtâk kuăn ngo, mâu ngế rơkê pế drôu xiâm châ xo tơ’mot tơ’nôm kơxô̆ liăn pê lo vâ ai liăn xúa tung rêh ối, djâ tơdroăng cheăng tiô túa ton nah dêi kuăn ngo tơná xông tơƀrê nếo hlo xúa tung rêh ối chal nếo nôkố vâ hên ngế ‘nâi túa lĕm tro dêi M’Nông Preh, Prâng, Nong... troh ƀă hên ngế tâ.

*H’Juel hlối rơkê cheăng chêh hlá tơbeăng, hlối cho ngế tơpui pơchuât tung Rơ’jíu, hlối rơtế ƀă on veăng rơpŏng hngêi rak ngăn kŏng ti, péa tơdroăng cheăng mê hôm ai tơdroăng cheăng ki lâi veăng kơjo kum há lơ ôh?

H’Juel: Ƀă tơdroăng cheăng xiâm cho ngế chêh hlá tơbeăng, hlối cho ngế tơpui pơchuât nâl M’Nông tung um tơvi, hlối rak ngăn tơdroăng cheăng dêi Kŏng ti pêi cheăng tiô rơnó Leng Gung mê xuân tơ’lêi hlâu... Drêng mơđah um a xâp ếo kuăn ngo dêi Kŏng ti Leng Gung teăn mê hlối tơbleăng tơmeăm khoăng hlối hnê kuăn pơlê pơtối rak túa lĕm tro dêi kuăn ngo tơná. Ƀă xuân ing tơdroăng cheăng chêh hlá tơbeăng, tơpui pơchuât tung um tơvi mê inâi drôu xiâm dêi á châ tê hên, ƀă hên ngế ‘nâi krếo vâ rôe. A hlo kố cho môi tơdroăng ki mơhúa ƀă hlối hlâu há ƀă á. 

*H’Juel ai tơmiât klâi, pơkâ tơdroăng klâi nếo ‘na tơdroăng cheăng tơná, malối cho tơdroăng pơtối rak vế túa lĕm tro ton nah? Hôm ai tơdroăng hnê tối ti lâi H’Juel vâ tối ăm vâi pú hơnăm ối nếo, vâ hnê tối ăm kuăn pơlê tung pơlê há?

H’Juel: A vâ pro klêi 1 toăng hngêi trá xŏn tiô chal ton nah dêi kuăn ngo M’Nông vâ ai môi tíu tơbleăng, pơtối rak vế tơmeăm khoăng ton nah dêi kuăn ngo tơná. Pakĭng mê, á ối tơmiât vâ tơrŭm ƀă Kŏng ti ôm hyô a kong pơlê kố ƀă kong pơlê ki ê vâ tơbleăng tơ’nôm tơmeăm khoăng dêi M’Nông Preh, Prâng, Nong... a kong pơlê Dak Nông. Á xuân púi vâ mâu rơxông nếo mơngế M’Nông mơ-eăm pơtối rak túa lĕm tro, vêa vong dêi kuăn ngo tơná, pôi tá ăm piu lôi.

*Mơnê kơ H’Juel!