Pôa Y Dŭ Êban ai tối tiah kố, ôh tá ‘nâi la lâi nah idrâp chêng koăng hiăng mot tung hiâm tuăn tơná. Pôa bú chôu vế tiah kố, tơná hiăng xông kân tung idrâp chêng koăng dêi jâ pôa ki krip ro, tơniâ, tâng vâ tối môi tiah idrâp xí têa hdrok ing ngo rơtok, môi tiah idrâp chêm kơtốu ki chuât tơniâ tung kong. Drêng ối kŭn nah, pôa hiăng châ hmâng hên mâu tơdrá, idrâp chêng pu hung pu hung tung rơnó leh mơdĭng, rơnó ôu kâ plâ rơnó, plâ khế, ƀă hên tá mâu tơdroăng ki rơkê plĕng dêi tơná, mê pôa hiăng hlê nhên, rơbot tŭm mâu ƀai chêng ƀă mâu tơdrá ki rơ-eăng tơniâ ki hơniâp ro mê.

Pôa Y Dŭ Êban

“Á hiăng châ tơmâng hên ƀai chêng drêng tung pơlê ai mâu tơdroăng ki leh mơdĭng ƀă idrâp chêng hiăng mot tung hiâm mơno tơná, xua á đi đo ối achê ƀă vâi krâ ki tŏn chêng tŏn koăng vâ hmâng. Hên mâu vâi rơtăm, vâi meh hiăng tŏn, ing mê, khoh pro á rơhêng rơhú vâ hriâm ƀối. Á hiăng ‘nâi tŏn chêng drêng ối rơtăm nah. Hên mâu vâi krâ hlo á ‘nâi tŏn chêng mê hiăng ăm á mot tung khu ƀă hnối vêh hnê tối mâu vâi ki ê tŏn chêng”.

Sap ing ton tĭn roh na nah, tung mâu leh mơdĭng ƀă tơdroăng ki mơhno túa lĕm tro dêi pơlê pơa, idrâp chêng cho idrâp ki vâ tơdjêp pơla kuăn pơlê ƀă khu xeăng, tơdjêp troh rêm ngế tung pơlê pơla. Xua ti mê, idrâp chêng cho mơhúa dêi pơlê pơla. Drêng hlo túa tŏn chêng koăng dế vâ tro piu hiât, pôa Y Dŭ Êban hiăng mơdoh chôu phut, ivá cheăng vâ po lâm hnê tối ‘na tơdroăng tŏn chêng koăng ăm kuăn cháu tung pơlê. Hên khu vâi hdrêng tung pơlê hiăng ‘nâi tŏn chêng tôu koăng ƀă hmâ lo lăm mơđah hên tíu ki ê. Pôa Y Dŭ Êban ai tối tiah kố:

“Tung pơlê á cho ngế ki ‘mâi rơnêu idrâp chêng, hnê tŏn chêng ăm mâu vâi krâ ki rơkê tŏn chêng, vâ rơtế dêi pó rak vế tơdrá chêng koăng ƀă lăm mơđah hên tíu ki ê, lăm u lâi á xuân rơtế ƀă khu ki tŏn chêng koăng. Á xuân hiăng hnê ăm mâu vâi muăn cháu dâng 15 troh 16 hơnăm ƀă khu tŏn chêng cho vâ vâi hdrêng xuân hiăng lăm mơđah châ 3-4 hdroh”.

Vâ ai mâu tơdroăng ki hơ’lêh, mê pôa Y Dŭ Êban ôh tá trâm xahpá, ôh tá xâu tơbrê, Kơnôm ing tơdroăng ki rơtế ƀă mâu vâi krâ-nhŏng o tung pơlê pơtâp mâu ƀai chêng, kơjo kum hâi khế hnê tối ăm mâu vâi muăn-kuăn cháu, mơdoh a mâu hâi khế pơtê hriâm cho pơla toh chôu má môi vâ hnê hriâm. Pôa ối lăm troh tơrêm toăng hngêi, mơhnhôk mâu nôu pâ ƀă mâu pú vâi muăn-kuăn cháu lăm hriâm i tŭm. Kơnôm ing tơdroăng ki rak vế idrâp chêng koăng, mơ-eăm khât tung tơdroăng ki tơrak vế chêng koăng mê pôa Y Dŭ Êban nếo pro mơjiâng tơdroăng ki tơviah, mê khoh ai hên pú hmâ hơnăm ối nếo hâk git kơ idrâp chêng dêi hdroâng kuăn ngo tơná.

“Lâm ki hriâm chêng ki iâ hơnăm ngin po a péa to lâm, cho lâm A ƀă lâm B. Dế nôkố mâu vâi o vâi muăn lăm hriâm a hngêi trung mê xuân pá há vâ hriâm tro tiô chôu. Á tô tuăn ó khât pro ti lâi vâ vâi hdrêng ‘nâi tŏn chêng tôu koăng, ôh tá mơhía lôi khôi túa, vêa vong dêi hdroâng kuăn ngo tơná. Tung tơdroăng rêh kâ ối dêi pơlê pơla ah kô hía lôi tơdroăng ki lĕm tro. Á pói tơngah tiah kố, drêng pin ối ai ivá mê pin athế kơhnâ hnê ăm vâi rơxông nếo”.

Chêng koăng ƀă mơngế Rơđế ti xê to tơmeăm ki vâ pro pơro, mê ối cho tơmeăm ki hơ’lêh vâ xo hên mâu kơpôu, ro, cho tơmeăm tĭng dêi rơpŏng hngêi. Idrâp chêng koăng chuât mơngối plâ rơxông kuăn mơngế, dêi mâu vâi droh, vâi rơtăm hdroâng Rơđế, ing hâi ki kot mâ tá troh a hâi ki hía a rŏng tơnêi kố. Pôa Y Dŭ Êban ai tối ‘na tơdroăng vâ idrâp chêng koăng đi đo ối veăng tơjuôm ƀă vâi krâ-nhŏng o tung pơlê ƀă khu râ.

“Tâng lôi bu ai môi rơpŏng á vâ hnê mơhno ăm chal rơxông nếo mê kô ôh tá rak vế idrâp chêng koăng dêi hdroâng kuăn ngo tơná. Athế ai tơdroăng ki veăng vâ môi tuăn dêi kăn pơlê, khu râ pơkuâ. Ai tơdroăng ki veăng môi hiâm mơno dêi pơlê pơla ƀă mâu vâi krâ môi tiah ngin. Ngin pói rơhêng vâ pó vâi muăn, vâi cháu kô ‘nâi, ƀă mơjo git dêi khôi túa, vêa vong kuăn ngo tơná”.

Ƀă tơdroăng ki hlê plĕng ‘na tơdrá chêng, ‘mâi rơnêu idrâp chêng ƀă kơnôm ai tơdroăng ki veăng vâ môi tuăn tung rak vế, kring ngăn, pơtối mơdêk idrâp chêng koăng dêi mơngế Rơđế, mê pôa Y Dŭ Êban hiăng châ hên ƀâng kơdeăn khĕn dêi rêm khu râ. Mê cho mâu tơdroăng ki mơhá tơxâng khât, vâ idrâp chêng koăng pơtối châ rak vế, mơngối đi đo ton tá ah.