Tối ‘na cheăng ƀă kơmăi kơmok túa lĕm tro cho tối troh mâu kơvâ cheăng mơjiâng pro mâu tơmeăm ƀă kơmăi kơmok  lĕm mơnâ, ai tơmeăm ki mê mơhno ki lĕm ki kơnía; ing tơdroăng tăng xo pro mâu tơmeăm ai pơxúa mơhno ki lĕm tro rơtế ƀă mâu tơmeăm pêi pro ƀă tê mơdró tơmeăm hriăn pro lĕm, ai pơxúa tung rêh ối pơlê pơla ƀă mơhno túa ki lĕm tro vâ tê châ pơxúa tung cheăng kâ.

Vâ tơdroăng mơjiâng pro tơmeăm kơmăi kơmok mơhno túa  lĕm tro dêi tơnêi têa pin rĕng mơnhông ƀă krá tơniăn, hriăn pro ai pơxúa tơƀrê tơmeăm ki ai hlâu, ki rơdêi dêi tơnêi têa, kal ai pơ’lêh rơdêi ing hlê plĕng ƀă troh pêi pro, hơ’lêh nếo tuăn tơmiât, hriăn plĕng ki nếo tung mơjiâng pro, mơjiâng kơvâ cheăng ƀă kơmăi kơmok, mơhno túa lĕm tro Việt Nam “Hriăn plĕng ki nếo - Túa lĕm tro - Ki tơviah krê - Rơkê -  Châ tơbriât tê’’.

Ngế pro xiâm hnê ngăn tơnêi têa pơkâ thế, mâu kăn tơpui tơno, hnê tối nhên ƀă thế tối tơdrăng, tối tro hnoăng cheăng, tối nhên mâu tơdroăng ki hiăng châ pêi pro, mâu tơdroăng hâi chiâng pêi pro, mâu tơdroăng ki pro ôh tá tro, tơvâ tơvân, ki hâi hlê, ối pá tung tơdroăng cheăng ƀă kơmăi kơmok túa lĕm tro tung mâu hơnăm hdrối mê hía nah, ki xiâm ing lâi, ƀai hriâm cheăng.