Tung 4 hâi Leh Mơjiâng tơnêi têa hơnăm kố (sap hâi lơ 30/8 – 2/9/2025), kong pơlê Dak Lak hiăng tơdah vâ chê 100.000 roh troh lăm ngăn ƀă pơtê, ƀă dâng 44.000 roh tơmối troh ối môi pơla, tung mê ai 1.000 tơmối lâp plâi tơnêi. Tâi tâng pêi lo liăn ing ôm hyô châ 160 rơtal liăn. Tơdâng ivá hbrâ tâi tâng kong pơlê châ 55%, krê mâu hngêi ăm tơmối ối pơtê, homestay kơpong achê têa kơxĭ mâu kơbong koi châ sap ing 80 -100%, pêi lo liăn tơmối troh ối môi pơla lâp kong pơlê châ lối 28,5 rơtal liăn.

Pôa Trần Hồng Tiến, Kăn pơkuâ Khu pơkuâ khôi túa lĕm tro, Tơ’noăng ivá ƀă Ôm hyô kong pơlê Dak Lak tối ăm ‘nâi, tung roh pơtê leh, kong pơlê hiăng tơkŭm po hên tơdroăng khôi túa lĕm, rơhdruê xuăng, tơ’noăng ivá ôm hyô vâ mơjiâng tíu ki rơdêi, mơhnhôk tơmối troh veăng.