Tung dế mơngiơk ki drêh lĕm dêi kong kế Nâm Nung, idrâp xí hiu ing xí Leng Ôm Rveh chuât rơtok tung dế kong kế, ngo ngối trối rơkong krếo khĕn tơmối lăm mot ngăn kơpong tơnêi ki kro mơdrŏng, gok gâ khôi túa, vêa vong dêi mơngế M’Nông. Ngoh Y Kruế, Ngế pơkuâ ngăn khu ki hmâ lăm prôk tung kong kế dêi Khâu Ôm hyô pơlê pơla Yôk Nâm Nung, cheăm Nâm Nung, kong pơlê Lâm Đồng ai tối tiah kố:

“Tiô rơkong ki hơ’muăn tối dêi mâu vâi krâ hmâ tơbâ ăm kuăn cháu, roh ton vâi krâ nah, a kơpong kố ai môi to rui tro klêh tung xí têa klêi mê hnối hlâ amê. Kơ’nâi mê iâ, ing rui ki hlâ mê hiăng tâ xú ŭm, mê kuăn pơlê nếo châ ‘nâi. Kuăn pơlê akố xo tơdroăng ki hơ’muăn tối mê, khoh chiâng krếo  “Ôm Rveh” nâl M’Nông tối tiah mê, nâl Rơteăng cho Xú ŭm rui. Drêng tối troh a khu tơmối ki ôm hyô, ngin hmâ tối ro tiah kố “Xú ŭm rui” vâ tơmối chôu vế hên tâ. Rơnó kố prôk lăm xah ôm hêi akố ro ‘nâng, hyôh kong prâi rơngiâp lĕm, têa hnăng tơngói, tung kong kế, nhâ loăng ối hên mâu hdrê loăng ki kơnâ, xua kong kế lĕm krip mê tơmối khoh chiâng hâk vâ lăm troh, ôm hêi hên akố”.

Tơdroăng hơ’muăn tối roh vâi krâ nah, ga pơtối ing rơxông ki kố troh a rơxông ki ê, pro ăm tơmối ki troh pôu ngăn, ôm hyô a tíu kố thăm rế hơniâp ro, mê ối cho túa ki vâ mơngế M’Nông châ pơtối rak vế khôi túa, vêa vong dêi pơlê pơla, cheăm bêng. Ing mâu tơdroăng ki kơnía mê, hơnăm 2022, kuăn pơlê a mâu pơlê Ja Răh, Yôk Yu ƀă R’Cập hiăng rơtế mơjiâng Khu ngăn ‘na Ôm hyô pơlê pơla Yôk Nâm Nung ƀă pói rơhêng vâ djâ khôi túa, vêa vong dêi kuăn ngo troh achê tâ ƀă tơmối. Dế nôkố ai lối 40 ngế ki cheăng tung khu, vâi xing xoăng dêi pó pêi pro mâu hnoăng cheăng túa lĕm tro tiô chal vâi krâ nah, homestay, châ lăm ngăn, lăm hlo kong kế, nhâ loăng ƀă châ kâ kế kơchâi ki kơhiâm dêi hdrông kuăn ngo a tíu kố. Rêm ngế pơrá xo râng vế xêh môi hnoăng cheăng, ing mê, mơjiâng chiâng tơdroăng ki ôm hyô pơtroh hiâm mơno dêi hdrông mơngế M’Nông.

Troh a Yôk Nâm Nung, tơmối ôh tá xê to châ ngăn, châ hlo mâu kong ilâng ki chiâng xêh, mâu hno têa, thông têa, xí hdrok ki krip tơdrŏm mê ối châ ‘nâi nhên ‘na túa rêh ối cheăng kâ ki tơniăn lĕm dêi pơlê pơla, cheăm bêng, ƀă hnối tí tăng ‘nâi plĕng ‘na khôi túa kăch măng a Tíu ki tơbâ tơdroăng roh nah dêi tơnêi têa a kơpong Lăm pro kăch măng B4-ối krếo cho Kơpong 4 Nâm Nung. Ki rơhêng vâ tối, a mâu roh leh mơdĭng  trối nâl M’Nông tối “Tăm Blang M’Prang Ƀon” nâl Rơteăng “Pêt7 loăng Pleăng kring vế pơlê” lơ mơdĭng rơkâu pâ kong mêi, tơmối kô châ mot tung khôi túa, vêa vong ki lĕm tro dêi M’Nông ing mâu idrâp chêng koăng, ing mâu tơdrá rơngê ting ting, ing túa tĕn mơjiâng ếo pơtâk, jiâ rơmoăng, tơdroăng tĕn mơjiâng kế tơmeăm ƀă hên hĕng mâu tơdroăng ki ê. Tơdrêng amê, tơmối ối châ kâ mâu kơchâi ki kơhiâm tiô khôi hmâ dêi vâi krâ roh nah, trối kơchâi trŏng xăng, kơchâi prông ing hơpôe ƀă kơchâi khí, mâm í ki pôh a khâng on, tơxông prông, kơchâi pôm loăng kơ-óu ƀă hơ’nêh rơmâ, ká khăng, drôu xiâm ƀă hên mâu kơchâi kâ ki ê hía. Jâ H’Thương, Phŏ ngăn ‘na Túa lĕm tro-pơlê pơla cheăm Nâm Nung, Ngế pơkuâ ngăn Khu Ôm hyô pơlê pơla Yôk Nâm Nung tối ăm ngin ‘nâi:

“Khu ki ngăn ‘na ôm hyô pơlê pơla ngin pơla hdrối kố nah nếo koh tơdah hên khu tơmối lo ing kong têa Italia, Pơlê kong kân Hồ Chí Minh, Hà Nội. Malối tung pơla mâu hâi leh, tơmối troh lăm pôu ngăn kơdrâm ó ‘nâng. Ai hên tơmối ing kong têa ê hâk rơtế vâ ối ƀă kuăn pơlê vâ tí tăng hlê plĕng ‘na khôi túa, vêa vong ƀă tơdroăng rêh kâ ối dêi kuăn pơlê. Ngin pro ôm hyô pơlê pơla ối tơrŭm ƀă Ƀuôn Choah, cheăm Nam Đà há. Amê, ai hên kong kế, ngo ngối ki lế lĕm, ngin ai khu ki mơđah hơdruê xuăng tiô khôi hmâ chal vâi krâ nah hmâ mơđah, rơngê ting ting, tôu chêng tôu koăng ăm tơmối i ngăn, i hmâng. Pakĭng koh tơdah tơmối lăm ngăn akố, mê ngin ối châ mâu Kăn ngăn ‘na tíu ôm hyô trối Dray Sap krếo thế lăm mơđah vâ ăm tơmối châ ngăn, châ hlo”.

Jâ Trần Kim Tuyền, Phŏ Hnê ngăn Mơhno túa lĕm tro-Rêh ối pơlê pơla cheăm Nâm Nung tối ăm ngin ‘nâi, cheăm dế kơdôu mơ-eăm pơtối mơnhông hnoăng cheăng ‘na lăm ngăn mâu tơmeăm khoăng tung kong kế, ngo ngối, ‘na túa cheăng kăch măng roh nah ƀă mơhno túa lĕm tro vâ mơnhông kơvâ ôm hyô. Ki nhên, Đảng ủi, Khu kăn hnê ngăn cheăm dế pơtối po troăng hơlâ vâ mơnhông kơvâ ôm hyô hnối tơrŭm ƀă Kơpong lăm pro kăch măng B4-Cho Kơpong 4 Nâm Nung, tơdrêng amê, hnối tơrŭm cheăng ƀă mâu tíu ôm hyô ƀă pơlê pơla ki ối tâ tá achê mê vâ mơjiâng chiâng mâu kế tơmeăm ki dâi lĕm.

“Dế nôkố, Khu ngăn’na ôm hyô pơlê pơla Yôk Nâm Nung ai 42 ngế. Cheăm mơnhên tối, troăng hơlâ ki mơnhông kơvâ ôm hyô pơlê pơla hnối tơrŭm ƀă Kơpong B4-Cho Kơpong 4 dêi Nâm Nung cho tơmeăm khoăng chal krâ nah dêi tơnêi têa. Hên mâu vâi pú a cheăm kố xuân hiăng tơveăng gum, djâ mâu tơmối trekking, nâl pin tối cho prôk chêng tung kong kế, hếo ngo ngối, mot tung thông trâu vâ tí tăng ‘nâi plĕng mâu tơdroăng kong kế, ngo ngối, xí têa ƀă hên mâu tơdroăng cheăng ki vâ mơnhên. Pakĭng Khu ôm hyô pơlê pơla Yôk Nâm Nung mê, cheăm xuân ối pơkâ po troăng hơlâ mơnhông kơvâ ôm hyô a thôn Quảng Hà dêi kuăn pơlê hdrông Dao ƀă tơkŭm po mâu roh po kơchơ tê kế kâ vâ tơdjêp ƀă tơdroăng ôm hyô pơlê pơla dêi ƀon Ja Răh”.

Tung dế tơdroăng rêh ối chal nếo nôkố, mơngế M’Nông a Yôk Nâm Nung, cheăm Nâm Nung, kong pơlê Lâm Đồng xuân ối rak vế krá kâk idrâp chêng, rak vế mâu tơdrá rơngê ting ting, hnoăng cheăng ƀă mâu túa rêh kâ ối dêi pơlê pơla. Ôm hyô pơlê pơla ôh tá xê po ăm roh ki vâ mơnhông pêi cheăng kâ mê ối chiâng kông ki tơdjêp vâ mâu tơdroăng, kế tơmeăm ki kơnía dêi mơngế M’Nông châ pơtối rak vế, lân lĕng rơdâ rơdih.