Tơdroăng mơdĭng pêi pro hên tơdroăng ‘na mâu tơdroăng vâ mơđah tơbleăng mâu kơmăi ăm chuât, on trâ eăng, Festival hiăng mơhno tơbleăng ăm hên ngế ngăn hlo môi tơdroăng mơdĭng túa lĕm tro tŏn chêng Tây Nguyên; pơ-eăng mâu ngế ki mơjiâng pro tŭa lĕm tro mê cho kuăn pơlê mâu hdroâng kuăn ngo, Jrai, Bơhnéa, Rơđế, Rơteăng, Jêh - Triêng, M’Nông ki rêh ối a 5 to kong pơlê tơbăng kong ngo, mê cho:  Kon Tum, Gia Lai, Dak Lak, Dak Nông, Lâm Đồng.

A rôh po Festival, kong pơlê Gia Lai hâk tơngăm châ tơdah xo ƀăng kơdeăn khĕn ối a râ tơmeăm khoăng kơnía dêi tơnêi têa dêi Ngế pro xiâm hnê ngăn Chin phuh ƀă tơmeăm kơnía ton nah dêi Rộc Tưng – Gò Đá ƀă pơkâ mơnhên tơmeăm khoăng ki kơnía dêi tơnêi têa ƀă tơmeăm tí tăng xo cho tơmeăm a chal ton nah Hmốu ton An Khê.

Tung “Măng tĭng mơhno Túa lĕm tro - Ôm hyô kong pơlê Gia Lai hơnăm 2023” ai lối 1 rơpâu ngê̆ nhân, vâi krâ - nhŏng o lo ing mâu pơlê cheăm, tơring dêi 5 to kong pơlê kơpong Tây Nguyên hiăng troh veăng mơđah tŏn chêng koăng drô troăng kơphô̆, tơ’mot hên ngế vâ ngăn, rơhêng vâ ngăn kuăn pơlê prôk pơtăng ƀă mâu tơmối.

Tơbleăng chêng koăng ing mâu pơlê lo a troăng kơphố, achê tâ tá ƀă kuăn pơlê xuân cho túa ki kong pơlê kơpong Tây Nguyên pêi pro vâ pơtối rak vế ki kơnía túa lĕm tro tŏn chêng koăng - tơmeăm khoăng ki kơnía dêi kuăn mơngế. Ing măng tĭng po mơdĭng kô veăng pro tíu ki tơ‘lêi hlâu vâ mơhno túa lĕm tro, thăm tơ’nôm ki môi tuăn, hlê plĕng dêi rơpó, kum dêi rơpó pơla mâu kuăn pơlê mâu hdroâng kuăn ngo tung kong pơlê Gia Lai ƀă mâu kuăn pơlê rêm hdroâng kuăn ngo ki rêh ối a mâu kong pơlê kơpong Tây Nguyên.