-Hmât kơ pôa ALip! Hơniâp ro ‘nâng châ trâm êh pôa, tung “Khôi túa lĕm tro mâu hdroâng kuăn ngo Tây Nguyên” hâi kố. Ô pôa, chêng koăng ga ai kơnâ ti lâi tung tơdroăng rêh kâ ối dêi hdroâng mơngế Bơhnéa?

Pôa ALip: Ki ahdrối tâ pâ koh hmât kơ pó, rơkong koh mơnê troh vâi krâ-nhŏng o ki hmâng Rơ’jíu... Chêng koăng nôkố ga cho kal khât tung tơdroăng rêh kâ ối hiăng sap ing chal vâi krâ roh nah. Ki kơnía dêi chêng koăng ga cho tơdroăng ki xúa tung mâu hâi leh mơdĭng ki kal, môi tiah tung tơdroăng mơdâm kiâ, tung leh mơdĭng rơkâu khu xeăng, môi tiah tĭng kâ kơpôu, tĭng pleăng xêi ƀă hên hĕng mâu tơdroăng tĭng ki ê pơrá xúa chêng koăng. Hdrối nah, athế cho hngêi ki kro mơdrŏng mê nếo ai chêng koăng, rôe môi kơtum chêng koăng athế pơhlêh to lâi to kơpôu, to ro ƀă hên hĕng mâu tơmeăm ki ê. Chêng koăng châ xúa ăm tâi pơlê pơla, xua mê, ga cho tơmeăm ki kơnía tung tơdroăng xúa ƀă xuân cho kơnía tung hiâm mơno”.

-Hôm, cho ‘nâng, pôa cho ngế ki hlê plĕng nhên tơdroăng ki kơnía dêi chêng koăng, xua mê, hiăng hmâ xúa, rak chêng koăng ing ối tơxĭn nah, hiăng chiâng tơdroăng ki hâk git kơ tơdroăng rêh kâ ối tung dêi rơxông tơná?

Pôa Alip: Á hiăng hmâ ƀă chêng koăng sap ing ối tơxĭn nah, troh nôkố, idrâp chêng koăng đi đo pơtroh ăm á chôu vế troh mâu hâi leh mơdĭng tiô khôi hmâ, môi tiah lăm tâp tơnâp kiâ. Á kơnôm châ hriâm ing chal vâi krâ, jâ pôa, meh miê, nôu pâ mê khoh chiâng rơkê tŏn chêng tôu koăng, á hmâ prôk tiô vâi lăm tŏn chêng, tôu koăng tung mâu hâi khế ki mơdĭng, tĭng lôi tơnâp kiâ, hmâ tĭng ki lâi xuân kal troh chêng koăng, tŭm tơdroăng leh mơdĭng mê, á pơrá tiô kơ vâi vâ ngăn vâ hriâm.

-Tâng tiah mê, mâu leh mơdĭng, êh pôa hiăng châ chiâng tŏn chêng, tôu koăng ƀă hmâng mâu tơdrá chêng koăng ga ti lâi? Pâ phep êh pôa tối ăm ngin ‘nâi ‘na tơdroăng kố?

Pôa Alip: Mot tung rơnó leh mơdĭng, tơmâng idrâp chêng koăng mê rêm ngế kô troh tơkuăm hlối, rơtế tôu, rơtế kơhnhon xuăng, hơniâp ro păng ‘nâng, ki má lối a hâi mơdĭng lôi tơnâp kiâ, xua mê athế tơkôm troh a kơmăng dế mê nếo troh pin vâ pơtâp tôu. Apoăng kơmăng mâu ngế ki rơkê hmâ châ tŏn hdrối, xua drêng kố, mâu vâi droh dế kơhnhon xuăng, mâu vâi rơtăm vâ mơhno tối dêi tơdroăng ki rơkê tơná mê vâ hriâm tơdrêng hlối, la ôh tá khoh, athế tơkôm troh a kơmăng dế ‘nôi, hên ngế ối tơngôu tŏn chêng tôu koăng, tôu ôh tá kâi xếo, drêng kố kô ai mơngế ki troh hnê tôu chêng koăng, ing mê, pin kô châ hriâm. Ki má péa nếo, tâng ôh tá ai mơngế mê ngin athế teăng mâ troh amê lăm tôu teăng, bu chiâng phep tŏn mâu chêng ki ku kŭn, tŏn tơ’lêi hlâu tâ, to ton ing mê chiâng tôu mâu chêng koăng ki kân tâ, tôu mâu tơdrá ki pá tâ, ta troh chiâng rơkê tiah hâi kố.

-Ê, ƀă hiâm mơno hâk vâ khât ƀă kơdo mơ-eăm tí tăng hriâm xêh, tơkâ luâ to lâi hơnăm hdrối mê hía nah, thâo pôa hiăng châ hriâm rơbot hên tơdroăng ing “ki rơkê tŏn chêng, tôu koăng” tung túa ki tôu chêng koăng?

Pôa Alip: Tơná á chiâng tôu hên ƀai chêng koăng, tung mê, ai tá tơdrá ƀai chêng chal vâi krâ roh nah, lơ mâu tơdrá chal nếo nôkố. Pơtih, mâu roh ki leh mơdĭng tiô khế, mơdĭng lôi tơnâp kiâ mê athế tôu mâu chêng koăng ki ai tơdrá hơniâp ro, sôk suâ, tung mâu hâi leh rơkâu, môi tiah kâ kơpôu, kâ ro, kâ xêi mê athế tŏn mâu tơdrá chêng ki ê. Pâk kơpôu mê athế ‘no tŭm cheng koăng, ối ai tơdroăng ki rơkâu xối ƀă kuăn ro, kuăn xêi mê athế bu xúa koăng tê. Tôu chêng kâ kơpôu ga vâ môi tiah tơdroăng ki tôu chêng mơdâng klêi kuât. Tối tơdjuôm tơdrá ƀai chêng chal vâi krâ roh nah ga xuân ai hên, tơdrá ƀai chêng chal nếo nôkố mê ối tối cho ƀai chêng Jarai, ai hên túa tơdrá, troh a chât ƀai.

-Tâng tiah mê, mâu tơdrá ƀai chêng kố ôh tá kâi hía, mê êh pôa hôm ai troăng hơlâ ki lâi vâ pơtối hnê ăm rơxông kơ’nâi ah há?

Pôa Alip:Á hiăng hnê tŏn chêng koăng dâng 11 troh 12 hơnăm kố. Mâu  vâi muăn, vâi cháu ki tiô hriâm mê châ ăm hlá mơnhên tối cho mâu vâi hdrêng hơnăm ối nếo tung pơlê, ai dâng 40 ngế muăn. Nôkố, mâu vâi muăn hâk git khât tơdroăng ki veăng tôu chêng, tôu koăng a mâu hâi leh mơdĭng, tơdroăng ki mơđah hơdruê xuăng. Á đi đo rơhêng vâ mâu rơxông chal nếo pơtối rak vế đi đo mâu ƀai chêng ki kơnía git dêi pâ pôa, xua mê, á hiăng kơdo mơ-eăm hnê ‘măn ăm rơxông nếo, hnê tối ăm vâi mâu tơdrá chêng ki nhên, ki hmâ vâ vâi robot, thăm nếo ta ƀai chêng ki nếo, không lơ têng nêng.

-Hôm, mơnê kơ pôa Alip hiăng mơdoh chôu phut tơpui tơno ƀă ngin kố.