Hlê klê nhên tuăn mơno Hồ Chí Minh, ‘nâi tơmiât rơkê tơdroăng cheăng, hnoăng pêi ki kal túa lĕm tro: Cho mơhúa xiâm dêi hdroâng mơngế’’, “Túa lĕm tro u ối hdroâng mơngế xuân ối”, pôa Nguyễn Phú Trọng - Kăn xiâm pơkuâ hnê ngăn Đảng hiăng mơdoh hên chôu tơchĕng tơmiât pêi cheăng mơjiâng túa lĕm tro rơkê, ai hên vêa vong kuăn ngo, cho xiâm tuăn ngôa dêi pơlê pơla, cho ivá rơdêi ing hiâm mơno tơmiât vâ, kal mơ-eăm mơnhông tơnêi têa. Drêng pơkuâ hneăng hôp tung lâp tơnêi têa, tơbleăng pêi tơdroăng pơkâ kơxô̆ 23 rak tơniăn tơdroăng cheăng lêng, kring vế tơniăn kơpong Tây Nguyên troh hơnăm 2030, mâ ngăn tuăn tơmiât pêi troh hơnăm 2045, pôa Nguyễn Phú Trọng - Kăn xiâm pơkuâ hnê ngăn Đảng hiăng tối nhên tơdroăng kal mê:

“Mơjiâng túa lĕm tro Tây Nguyên tơƀrê tro túa, vêa vong kuăn ngo, tơrŭm môi tuăn dêi rơpó tung hên túa. Nhuô̆m mâu tơmeăm khoăng ki kơnía túa lĕm tro pơrá phá pơla mâu hdroâng kuăn ngo, ngăn mê cho xiâm kối ki vâ mơ-eăm mơnhông ƀă vâ tơrŭm ƀă lâp plâi tơnêi. Pêi ahdrối ‘na rak vế, pơtối ‘măn chôu, ‘mâi rơnêu ƀă pơtối rak ki kơnía túa lĕm tro, ki kơnía ton nah, túa lĕm tro vêa vong dêi mâu hdroâng kuăn ngo, malối cho mâu tơdroăng pro mơdĭng, tôu chêng koăng Tây Nguyên. A vâ tối nhên tiah kố, mê cho túa lĕm tro. Tơpui tơno tro Tây Nguyên pin ai khôi túa, vêa vong, túa vêa vong ki tơviah lĕm krê, pó hôm hâi mơ-eăm tăng ‘nâi plĕng há? Kố ôh tá xê to túa lĕm tro vâ xah hêi ro tê, kố cho vâ rak vế túa lĕm tro hdroâng kuăn ngo, dêi hdroâng mơngế, ƀă kố cho Ƀâng ki pin pêi cheăng kâ tung rơxông tơmot chal nếo nôkố”.

Ối chôu pâ 13 hơnăm hdrối nah, drêng  pôa Nguyễn Phú Trọng - Kăn xiâm pơkuâ hnê ngăn Đảng lăm pôu ngăn tơring Mường Lát, kong pơlê Thanh Hóa, pôa Lầu Minh Pó - Kăn phŏ hnê ngăn Đảng hneăng hdrối tơring Mường Lát xuân châ tâng mâu rơkong tối pơchân dêi Pôa tơdroăng thế tah lôi túa tơlá ton nah ki oh pá tro ƀă thế pơtối rak vế khôi túa, vêa vong ton nah ki lĕm tro dêi hdroâng kuăn ngo. Nôkố kuăn ngo Mông a Mường lát hiăng tah lôi túa tơlá tâng lơ ai ngế hlâ ôh tá ăm tâ ếo tung poăng, mê hiăng pơtối rak túa vêa vong ton nah ki lĕm tro:

“Túa tơlá, vêa vong drêng troh pôa tối, mơhé vâ ti lâi mê hdroâng kuăn ngo ki lâi xuân thế pơtối rak dêi túa tơlá lĕm tro dêi kuăn ngo tơná, xua mê, mơngế Mông nôkố xuân ối rak túa lĕm tro, malối cho hơdruê, rơngê tung hâi pơkoăng. Kuăn kơdrâi drêng hiăng xông droh xo dôh thế kơhnâ, mê cho túa tơlá, vêa vong ki lĕm tro dêi kuăn ngo Mông. Ki kố nếo cho hlŭm khiê̆n, hlŭm rơvŏng, pơtêi liâ dêi kuăn ngo Mông dế mơ-eăm pơtối  vêh tơbâ nếo’’.

Ngoh Đinh Ply, mơngế Bơhnéa lo ing Gia Lai lăm rêh ối a hngêi tơdjuôm dêi 54 hdroâng kuăn ngo (a pơlê Túa lĕm tro Ôm hyô mâu hdroâng kuăn ngo Việt Nam, Đồng Mô Sơn Tây - Hà Nội), pơtối rak vế tơbâ tơdroăng ton nah rơkong pơchân dêi Kăn xiâm hnê ngăn ‘na pơtối rak túa lĕm tro:

“Pôa hiăng tối rak túa lĕm tro ton nah dêi hdroâng mơngế Việt Nam tối tơdjuôm xuân môi tiah mâu hdroâng kuăn ngo pro ti lâi pin vâ hmâ tơrŭm ƀă, rơtế môi tuăn, rơtế ƀă dêi rơpó mơjiâng pơlê tơná mơnhông dêi tơnêi, pro tơ’lêi hlâu ăm dêi rơpó châ mơnhông tơƀrê cheăng kâ, xuân môi tiah gum dêi rơpó drêng trâm pá, hriâm ing dêi rơpó ‘na túa lĕm tro. Pơtối rak hnoăng pêi pro mê, a mơ-eăm tơmâng xo vâ pơtối rak vế tiô rơkong Pôa hnê, xuân hiăng hnê pơchân xuân môi tiah hdrối kố nah hiăng troh xo hlá mơ-eá Pôa, hiăng pơtroh ăm mâu hdroâng kuăn ngo. Kơxop hlá mơ-éa mê cho mâu tơdroăng tơmiât, rơkong dêi Pôa chêh ‘măn vâ pơtối rak vế túa lĕm tro mâu hdroâng mơngế Việt Nam xuân môi tiah hdroâng kuăn ngo Bơhnéa dế pơtối rak vế tung Pơlê túa lĕm tro tối tơdjuôm, ‘ló tro ai pơxúa kal khât ƀă hdroâng mơngế Việt Nam pin”.

A hneăng hôp tơpui ‘na Túa lĕm tro tung lâp tơnêi têa 2021, pôa Nguyễn Phú Trọng - Kăn xiâm pơkuâ hnê ngăn Đảng tối nhên: Túa lĕm tro cho túa tơlá, vêa vong dêi hdroâng kuăn ngo, hdroâng mơngế, túa lĕm tro u ối mê hdroâng mơngế xuân ối, túa lĕm tro hía hdroâng mơngế xuân hía”.  Tơdroăng hnê tối ki kal mê hiăng ƀă dế djâ hnê mơhno tơdroăng ki nếo, ngiâ méa nếo a mâu pơlê hơngế hngo dêi tơnêi têa. Thăm nếo, túa lĕm tro mâu hdroâng kuăn ngo châ pơtối rak, hiăng pơtối rak ki rơdêi vâ tah túa tơlá ton nah ki ôh pá tro, tah kơtiê xơpá, plong kol, tơbâ mơnhông mâu kơpong tơnêi, pêi mâu tơdroăng cheăng tơƀrê tung la ngiâ ah.