Tơdroăng kố xua Hlá tơbeăng Đại biểu Nhân dân pơkuâ tơrŭm tơkŭm po drêng tơbâ 78 hơnăm Kăch măng khế 8 ƀă mơjiâng tơnêi têa lơ 2/9, tơmiât troh tơbâ 35 hơnăm mơjiâng Hlá tơbeăng Đại biểu Nhân dân lơ 5/10.

Tơpui pơxiâm po tơdroăng kố, Ngế xiâm ‘mâi chêh Hlá tơbeăng Đại biểu Nhân dân jâ Phạm Thị Thanh Huyền tối nhên, ƀlêi trâng dêi Kăch măng khế 8 hơnăm 1945 ƀă tơdroăng ki ai mâ dei tơnêi têa Việt Nam Yân chuh Kŏng hòa, nôkố cho tơnêi têa Kŏng hoà xah hô̆i chuh ngiah Việt Nam cho môi hvêa chêng prôk ki khên tơnôu, môi tơdroăng ki hdró bâ eăng tung tơdroăng ton nah khên tơnôu dêi hdroâng mơngế; ăm tơnêi têa pin pơxiâm mot tung chal ki nếo – chal ki tơniăn krê hdroâng mơngế tơtro ƀă chuh ngiah xah hô̆i; pơkuâ djâ Kuăn pơlê pin sap ing cho ngế ki bro têk chiâng khu pơkuâ tơdroăng kal kí dei tơná.

Tơdroăng ngê̆ thuât “Nắng Ba Đình” veăng kum vêh mơhno tơdroăng ki khên tơnôu dêi mâu khế hơnăm ôh tá la lâi kâi piu; ô eăng pơlê xiâm tơnêi têa, ô eăng Đảng, Pôa Hồ, ô eăng mâu tơdroăng ki ƀlêi trâng khên tơnôu dêi Kuăn pơlê pin, xua Việt Nam khên tơnôu.