*Kong pơlê Kon tum nôkố ai dâng 54% pơ’leăng mâ mơngế cho hdroâng kuăn ngo ki iâ mơngế, tung mê ai 7 hdroâng kuăn ngo ki hiăng rêh ối ton hơnăm a tíu kố, mê cho Rơteăng, Jêh - Triêng, Bơhnéa, Jarai, Brâu, Rơ Măm ƀă Hrê. Pakĭng mâu tơdroăng ki vâ bố bối dêi pó, môi tiah mê rêm hdroâng kuăn ngo pơrá ai túa ki phá krê xêh vâ pro kro mơdrŏng tơ’nôm ki kơnía dêi kơdrum reăng túa lĕm tro ki hên túa, ki hên vêa vong.

Hơnăm 2023 kơnôm ing hên tơdroăng cheăng túa lĕm tro cho xua kong pơlê tơkŭm po ƀă veăng po mơjiâng, môi tiah, Hâi Túa lĕm tro, Ivá ƀă Ôm hyô mâu hdroâng kuăn ngo kơpong Tây Ngyên roh má 1 hơnăm 2023; “Roh tơ’noăng pơchên kế kâ ing nhâ loăng pơkeăng kong - Kế ki kơhiâm má môi dêi kong ngo Ngọc Linh” ƀă hên mâu roh ki ê hía, mâu tơmeăm ki kơnía túa lĕm tro dêi vâi krâ-nhŏng o châ mơđah, mơhno, tơbleăng, châ pơ-ôu. Ngoh Đinh Xuân Phóc, kăn thôn Vi Klơng, cheăm Hiếu, tơring Kon Plông tối ăm ‘nâi:

“Á hâk git ‘nâng ‘na chêng koăng, đi đo tiô vâi krâ lăm tơ’noăng a tơring, châ mơđah chêng koăng ƀă khu vâi pú. Á hiăng châ mâu vâi krâ ki rơkê pơtối hnê túa tŏn chêng, châ veăng tơ’noăng tôu chêng koăng, ing mê, á hiăng chiâng rơbot hên ƀai chêng. Hdrối vâ lăm tơ’noăng khu ngin hiăng mơhriâm a kuât vâ pơtâp, khu ngin ai dâng 20 troh 30 ngế. Khu ngin ki tôu chêng kơhnâ khât tung tơdroăng tôu chêng koăng ƀă hơniâp ro xua châ trâm mâ dêi pú, châ hriâm ing vâi krâ ki ê. Roh kố châ tơring, kong pơlê tơkŭm po, mê khu tôu chêng ngin xuân châ lăm mơđah, tâ hơniâp ro ó khât, châ tâng châ hlo mâu tơdroăng tŏn chêng tôu koăng”.

*Pôa Ding, hdroâng Bơhnéa, cho krâ pơlê H’Way, cheăm Hà Tam, tơring Đăk Pơ, kong pơlê Gia Lai tối ăm ‘nâi: Tung pơlê ai 156 rơpŏng hdroâng Bơhnéa. Hdrối Têt, khu kăn pơkuâ cheăm hiăng tơkŭm lăm pôu, êng, tơpui tơno, hbru tơmeăm Têt ăm pơlê. Ki rơhêng vâ tối ƀă mâu rơpŏng kơtiê, rơpŏng ai hnoăng tơnêi têa, khu ngế ki tro xâ rup kroăng phak nah đi đo chjâ rêm râ tŏng kum, ngăn khât. Mâu hnoăng tơmeăm Têt môi tiah phái tơxông, kơ-ƀăn, têa rơmâ ƀă liăn mâ xuân hiăng châ hbru kum tơdrêng, kum ăm rêm ngế vâi krâ-nhŏng o pơrá châ ôu kâ a hâi Têt ki phâi tơtrô, hơniâp ro. Pôa Ding, krâ pơlê phiu niu tối tiah kố:

“Drêng Têt hiăng troh, tung pơlê ai tơkŭm po trâm mâ, xah ôm hêi ƀă mâu vâi krâ-nhŏng o a thôn ki ối tâ tá, tŏn chêng tôu koăng, kơhnhon xuăng, mâu vâi droh, vâi rơtăm, ƀă tâi tâng pơlê rơtế hơniâp ro tung tơdroăng ki koh tơdah hâi Têt, hâk phiu rơnó Hơngui. A pơlê ngin ai 6 tôh, rêm tôh rôe môi pŭm chu tơkŭm po ôu kâ hơniâp ro a hâi Têt tơdjuôm, drêng kố, mâu kăn pơkuâ ngăn cheăng, Kăn pơkuâ hnê ngăn Đảng, Kăn hnê ngăn, mâu khu râ xuân hiăng tơkŭm troh akố vâ veăng hơniâp ro tơdjuôm, tŏn chêng tôu koăng, hnối kơhnhon xuăng ƀă tơrêm ngế”.

*Hdrối ai tơdroăng ki tơdjâk dêi túa rêh ối a kơphô̆, khôi túa lĕm tro tiô chal vâi krâ nah dêi Rơđế a hên pơlê cheăm hiăng vâ rế hía hiât lôi. Maluâ ti mê, mâu hơnăm hdrối mê hía nah, ƀă tơdroăng ki kơdo mơ-eăm tung hnoăng cheăng hnê tối, mơhnhôk rêm khu râ, kơvâ cheăng, khu pơkuâ ngăn cheăng kal kí, rơtế ƀă tuăn mơno ki tôu tuăn, ối kơhnâ khât tung rak vế khôi tuá, vêa vong ki ti xê iâ mâu vâi krâ, nhŏng o, kăn thôn pơlê ƀă hên mâu ngế ki ê mê nôkố hên pơlê cheăm dêi mơngế Rơđế a Dak Lak, mâu túa ki kơnía git tung túa lĕm tro tiô khôi hmâ dêi hdroâng kuăn ngo ki dế châ vâi krâ-nhŏng o pơtối rak vế ƀă mơnhông. Nâ H’Chí Mlô, ối a ƀuon Sưk, cheăm Ea Đar, tơring Ea Kar, kong pơlê Dak Lak tối ăm ‘nâi:

“Pin cho rơxông kơ’nâi la kơnôm châ hnê tối ‘na khôi túa lĕm tro mê cho ‘ló hâk tơngăm ‘na túa lĕm tro dêi hdroâng kuăn ngo. Xua ti mê, pin athế ‘nâi pôu râng hnoăng cheăng kring vế, rak ngăn. A cheăm Ea Đar ngin kố Khu pơkuâ ngăn vâi kơdrâi tơkŭm po lâm hnê tŏn chêng kơlá, lâm hriâm rơngê, ting ting vâ pơtối châ rak vế túa lĕm tro dêi jâ pôa pin nah. Á hiăng châ hmâng, châ ‘nâi khôi tuá, vêa vong lĕm tro dêi hdroâng kuăn go tơná, vâ pơtối châ hnê tối, á ‘ló hâk tơngăm hên ó khât”.