Ƀă tơdroăng pơxá “Pơtối rak vế ƀă tơbleăng túa lĕm tro, vêa vong mâu hdroâng kuăn ngo iâ mơngế”, hâi leh hiăng veăng ‘no hên hnoăng mơdêk tơrŭm mâu hdroâng kuăn ngo;  pơ-eăng, pơtối rak ki kơnía túa lĕm tro ton nah dêi mâu hdroâng kuăn ngo pá xôp 10 rơpâu ngế tung lâp tơnêi têa tối krê ƀă khôi túa, vêa vong ton nah dêi 54 hdroâng kuăn ngo Việt Nam tối tơdjuôm.

11 khu dêi 11 kong pơlê ai kơxô̆ pơ’leăng mâ mơngế pa xôp 10 rơpâu ngế hiăng djâ troh hâi leh mâu túa um, Hên túa lĕm tro, ƀă tuăn tơmiât tro kih thuât ƀă mâ ngăn ki lĕm pơrá phá dêi rơpó tối ‘na vêa vong lĕm tro ton nah, khôi túa rêh ối krê dêi mâu hdroâng kuăn ngo.

Mơhé mơđah ki lĕm ôh tá pro kân krip, la xuân hiăng mơhno tŭm mâu túa pêi pro tiô tơlá ki lĕm tro ton nah ƀă veăng ai khu ki vâ xối xeăng, mâu ngê̆ nhân, rơtế tơbleăng mơhno hên mâu tơmeăm, hlối rơngêi ting ting, xuăng tiô tuăn mơno tơmiât, pơtối tơbâ tơdroăng pro mơdĭng, rơkâu xối xeăng tung rêh ối ƀă mơhno ki tơrŭm môi tuăn dêi rơpó pơla mâu hdroâng kuăn ngo.