Rôh tơ’noăng chêh hlá tơbeăng lâp tơnêi têa rôh má 16 hơnăm 2024 ôh ti xê cho Hâi mơdĭng dêi mâu ngế cheăng tơpui pơchuât, chêh hlá tơbeăng mê ối po tung rôh mâu kong pơlê tung lâp tơnêi kơhnâ tơbleăng hnoăng cheăng hbrâ rơnáu po Hneăng hôp kân Đảng rêm râ, pêi pro troh Hneăng hôp kân lâp tơnêi têa rôh má 14 dêi Đảng ƀă tơmiât troh tơbâ 100 hơnăm hlá tơbeăng Kăch măng Việt Nam.

Ƀă inâi “Hlá tơbeăng tơpui tung Rơ’jíu Việt Nam – hên túa tung hơ’lêh kơxô̆”, Rôh tơ’noăng chêh hlá tơbeăng lâp tơnêi têa rôh má 16 hơnăm 2024 mơnhên, hơ’lêh kơxô̆ tung hlá tơbeăng tối tơdjuôm ƀă tơpui pơchuât tung rơ’jíu tối krê ôh ti xê hơ’lêh ‘na kong ngê̆, ‘na túa pê, mê ki kal tâ, mê cho hơ’lêh ‘na túa tơmiât, túa ki hlê plĕng, ing râ pơkuâ, troh mâu khu, mâu túa cheăng dê túa pơkâ mơ’no ƀă klâ xoăng mâu tơdroăng cheăng hlá tơbeăng.

Kố cho troăng hơlâ ki mơnhông tơƀrê, ai pơxúa khât rơtế kal khât troh tơdroăng ki ai mâ ƀă tơdroăng mnhông dêi mâu kơ koan chêh hlá tơbeăng tối tơdjuôm ƀă tơpui pơchuât tung rơ’jíu tối krê tung chal nếo.