Veăng tơ’noăng roh kố ai vâ chê 600 ngế kăn ƀô̆, diên viên dêi 15 khu ngê̆ thuât kuăn pơlê troh ing mâu Ƀơrô khôi túa lĕm tro ƀă tơdroăng kal, Tíu xiâm khôi túa lĕm tro mâu tơring, pơlê krâm, pơlê kong kơdrâm ƀă Khu xiâm pơkuâ Mô đô̆i kong pơlê Dak Lak.

82 ƀai hơdruê, xuăng, xah tiê rêi prôa ƀă mâu tơdroăng ngê̆ thuât mơđah tơbleăng a tíu tơ’noăng cho mâu tơdroăng ki má môi châ rah ing mâu hneăng tơ’noăng, hneăng mơđah tơbleăng a mâu tíu tơkŭm po. Tơdroăng xiâm cho kheăn kơdeăn Đảng hâk phiu ro, Pôa Hồ, tơdroăng tuăn pâ pơlê xiâm tơnêi têa, tơdroăng rêh ối lĕm a kơpong tơnêi kân rơdâ Dak Lak; mâu tơdroăng châ tơƀrê kân dêi kăch măng Việt Nam ƀă tơdroăng pơ’lêh nếo tơnêi têa lối 35 hơnăm hiăng hluâ; tối tơdroăng loi tơngah dêi kuăn pơlê tung pơkuâ hnê mơhno dêi Đảng, khŏm mơ-eăm mơjiâng ƀă gak kring Tơnêi têa Việt Nam xah hô̆i chuh ngiah.