Bo cheăng mê vâ mơhno tơbleăng pơ-eăng ing rui, kuăn ki vâ pơtih dêi Dak Lak. Bo cheăng peăng Mâ hâi Lu pơlê kong kơdrâm Ƀuôn Ma Thuột châ pro a troăng kân kơxô̆ 1, tơdjêp pơla bêng Thành Nhất ƀă cheăm Ea Nhuôl, tơring Ƀuôn Đôn. 2 to trăng bo cheăng cho péa to rui mơngiơk prâp meăm pro ƀă ƀê tông meăm thĕp pro rui dế xông tâng.

Ko rui ƀă kơnô̆m rui têk tơngi ‘ngêi klêng, pro pơtâ bo cheăng ƀă meăm thĕp mơngiơk klôa xŏn 14 met, xŏn ngi klêng 8,5met. Bo cheăng peăng mâ Hâi Lu Ƀuôn Ma Thuột châ krâ ƀă điê̆n tưh péa pâ ngiâ, xúa bo cheăng kŏng ngê̆ ai on led full ăm chư kơtâu. Tâi tâng kơxô̆ liăn pro mê lối 5,5 rơtal liăn.

 Tiô pôa Trần Đức Nhật, Kăn phŏ hnê ngăn Vi ƀan pơlê kong kơdrâm Ƀuôn Ma Thuột tối, bo cheăng peăng Mâ hâi Lu pơlê kong kơdrâm ôh tá xê to pêi tro tiô mâu pơkâ ki lĕm mơnâ mâ ngăn mê ối krá, ối gum mơhno túa lĕm tro, kong kế ƀă kuăn pơlê a kong pơlê, mơhnhôk pơtối rak túa lĕm tro ƀă rak rui. Kố cho tơmeăm khoăng mơjiâng pro vâ tơbâ 120 hơnăm mơjiâng kong pơlê Dak Lak ƀă 120 hơnăm Ƀuôn Ma Thuột mơjiâng ƀă mơnhông tơƀrê.