Kong pơlê Gia Lai ai tơmeăm mơnhông kân vâ mơnhông ai hên mâu tơdroăng ôm hyô ngăn loăng pơlái kong kế, khôi túa lĕm tro, pơlê pơla, ... Kong pơlê ai khôi túa lĕm tro hên, ai khên khu tôu chêng koăng, Kơpong ai loăng pơlái kong kế, chêm chok, xí têa kong ngo Kon Hà Nừng, rơtế tơdroăng pêi chiâk deăng hên tơmeăm ƀă ai hên xí têa lĕm mơnâ mâ ngăn, kong prâi rơngiâp  lĕm, hên kơpong chôu ‘măn tơmeăm khoăng ton nah bă tíu ai hmốu lĕm mơnâ mâ ngăn sap ing ton nah...

Tiô pơkâ pêi mơnhông ôm hyô hneăng hơnăm 2021 – 2025 dêi Vi ƀan kong pơlê Gia Lai, kong pơlê mơ-eăm troh hơnăm 2025, ôm hyô chiâng kơvâ cheăng kâ ki xiâm, ƀă hên tơdroăng ki pêt mơjiâng tơmeăm, pêi rơkê, dâi lĕm. Hneăng kố, kong pơlê xing xoăng lối 500 rơtal liăn kơxô̆ liăn mơ’no liăn cheăng tơnêi têa vâ pêi pro 9 tơdroăng tơkêa bro hngêi trăng, troăng klông pro xiâm kối mơnhông ôm hyô. Rêm hơnăm, kong pơlê tơkŭm po hên tơdroăng ki kal khôi túa lĕm, tơ’noăng ivá; thăm tơbleăng tơmeăm khoăng ki ai hlâu ‘na ôm hyô.

Laga, nôkố, nếo ai 3/9 tơdroăng tơkêa bro ‘na hngêi trăng, troăng klông pêi kêi đeăng. Kong pơlê Gia Lai tá hâi mơhnhôk khu tê mơdró kong têa ê, khu tê mơdró rŭm mơdró tơdjêp ‘na ôm hyô; dâi lĕm, tơmeăm ôm hyô tá hâi pro tơmối hâk vâ, tá hâi ai tơdroăng ki kêi đeăng păng ‘nâng. Pôa Nguyễn Tấn Thành – Kăn hnê ngăn Khu pơkuâ ôm hyô kong pơlê Gia Lai tối:

“Pin kal vêh séa ngăn: Tơnêi têa hiăng mơjiâng tíu mơ’no liăn cheăng phuâng, hâi pro tơmối hâk vâ há, tŭm ivá mơhnhôk khu mơ’no liăn cheăng há? Kơxô̆ liăn ai hên ƀă pro khu mơ’no liăn cheăng hâk vâ, laga vâ pro chiâng tơmeăm ôm hyô mê kal ai tơdroăng mơ’no liăn tơtro, rah tơtro. Tíu ki lâi tơ’lêi hlâu, ai ivá chiâng mơnhông tâ mê mơ’no liăn hdrối, tiô pơkâ, mê tơmối nếo ‘nâi troh, kuăn pơlê nếo ai pêi lo liăn’’.

A hneăng hôp, jâ Nguyễn Thị Thanh Lịch – Kăn phŏ hnê ngăn Vi ƀan kong pơlê Gia Lai pơkâ thế mâu tơring, khu cheăng, kơvâ cheăng séa ngăn, pơtối mơdêk pêi pro mâu tơdroăng tơkêa bro mơ’no liăn hngêi trăng, troăng klông cho xiâm kối mơnhông ôm hyô; vêh séa ngăn mâu tơmeăm ôm hyô vâ mơnhông ki xiâm; pêi pro tơdjêp troăng, kơpong ôm hyô; mâu tơring ƀă kơvâ khôi túa lĕm tro pơtối pêi pro mâu tơdroăng mơhno khôi túa lĕm tro, leh hô̆i, thăm mơđah tơbleăng ƀă mơjiâng tơ’lêi hlâu vâ djâ tơmeăm pêi lo ing chiâk deăng dêi kuăn pơlê troh ƀă tơmối ôm hyô.

Jâ Nguyễn Thị Thanh Lịch pơchân tối thế tơtrŏng ‘na tơdroăng mơnhông ôm hyô pơlê pơla tiô troăng rơkê, krá tơniăn:

“Pơcháu Khu pơkuâ ‘na mơhno khôi túa lĕm tro Tơ’noăng ivá ƀă ôm hyô hnê mơhno tơdroăng pêi cheăng ‘na ôm hyô pơlê pơla. Drêng tơkŭm po châ ôm hyô pơlê pơla, ƀă ôm hyô pêi chiâk deăng, mê ki kố cho krá tơniăn. Ai tơdroăng ki veăng dêi pơlê pơla, ing kố kô rak vế châ khôi túa lĕm tro. Xua djâ ăm tơdroăng pêi cheăng lo liăn ăm kuăn pơlê mê kuăn pơlê hâk vâ ƀă gak kring krá tơniăn’’.