Tung 2 khế mơ’nui hơnăm, kong pơlê Lâm Đồng kô tơkŭm po hên tơdroăng ki kal mơjiâng tơdroang phiu ro, mơhnhôk tơmối tung tơnêi têa ƀă kong têa ê ƀă tíu ki má môi cho Leh tơbleăng tôu Chêng koăng  Đông Nam Á hơnăm 2025, Leh tơbleăng Chế lâp plâi tơnêi, Leh tơbleăng koh hơnăm nếo 2026...

Rơtế ƀă amê kong pơlê xuân mơdêk tơdroăng mơhnhôk mơ’no liăn cheăng, tơbleăng tơdroăng ôm hyô ing mơđah tơbleăng tung kŏng ngê̆ tíu troh, po rơdâ tơrŭm cheăng lâp plâi tơnêi ƀă veăng mâu tơdroăng ki kal ôm hyô kân.

Tung mê, tơdroăng kal Leh tơbleăng Chế Lâp plâi tơnêi – (Wuôr Thi Fes) World Tea Fest 2025 po kân, roh apoăng châ tơkŭm po a Việt Nam, tơkŭm po a Lâm Đồng sap hâi lơ 11/11 troh lơ 07/12/2025, tiô tối hdrối mơhnhôk dâng 20.000 roh tơmối tung tơnêi têa ƀă kong têa ê. Akố, hên tơdroăng po râ lâp plâi tơnêi kô châ tơkŭm po môi tiah: Mơđah, tơbleăng tơmeăm chế ƀă kŏng ngê̆ têng, uâ bro tơmeăm tiô rơxông nếo; Hneăng hôp tơpui ‘na troăng pêi cheăng ton xŏn mơdêk râ inâi chế Việt; Trâm mâ mơhno, tơpui tơno dêi pó ‘na chế dêi nhŏng o ƀă kăn teăng mâ ƀă tơmối lâp plâi tơnêi; Hâi xeh hêi ro troăng kơphô̆ ƀă khôi túa lĕm tro ‘na chế; troăng prôk ôm hyô ngăn loăng pơlái kong kế ‘na chế; rơtế ƀă mâu tơdroăng ngê thuât. Pôa Nguyễn Văn Lộc, Kăn pơkuâ Khu ngăn ‘na Khôi túa lĕm tro, Tơ’noăng Ivá ƀă Ôm hyô kong pơlê Lâm Đồng tối ăm ‘nâi:

‘’Ngin kô pơtối tơkŭm po tơdroăng ki kal kân vâ mơhnhôk tơmối ôm hyô. Rơtế ƀă amê ngin pêi cheăng ƀă Khu tơrŭm ôm hyô ai mâu tour, troăng prôk ôm hyô, ai tơdrong mơhnhôk, kơdroh yă hngêi pơtê kâ koi xuân môi tiah mâu tíu ối pơtê vâ tơdah tơmối tung roh mơ'nui hơnăm, Tĭng kân  Noel, Têt Yương lĭt. Mâu tơdroăng kal mơhno khôi túa lĕm tro, tơ’noăng ivá ƀă ôm hyô tơkŭm po cho hên xôh, hên roh a mơ’nui hnăm’’.

Păng ‘nâng koh phiu ro leh tơbâ 85 hnăm Hâi mơjiâng Đảng ƀô̆ kong pơlê Dak Lak 23/11, Hâi xah hêi ro Tơrŭm kân môi tuăn tâi tâng hdroâng mơngế (18/11), leh tơbâ 20 hơnăm Hâi Tơmeăm kơnía khôi túa lĕm tro Việt Nam (23/11), kong pơlê Dak Lak tơkŭm po Măng tĭng Tơmeăm kơnía khôi túa lĕm mâu hdroâng mơngế kong pơlê Dak Lak hơnăm 2025 ƀă dó inâi ‘’Chuât ro tơniâ chêng koăng - tơdjêp pơlê pla”, tơkŭm po sap hâi lơ 18/11 troh hâi lơ 23/11/2025, a Tíu chôu ‘măn tơmem khoăng ron ton nah khôi kong pơlê Dak Lak (bêng Buôn Ma Thuột) ƀă Tíu chôu ‘măn tơmeăm khoăng roh nah Phú Yên (bêng Tuy Hòa). Măng tĭng Tơmeăm kơnía git khôi túa lĕm cho khu mâu tơdroăng pêi cheăng ki kơnâ trâu hơhngế, vâ pơ-ôu pơ-eăng mâu ki kơnâ ki má môi dêi mâu tơmeăm kơnía khôi túa lĕm tro tung kong pơlê Dak Lak tối tơdjuôm ƀă tơmeăm kơnía git Tíu mơhno khôi túa lĕm chêng koăng tối krê; mơnhông tơdroăng ki hâk tơngăm, hlê plĕng hnoăng cheăng dêi pơlê pơla tung tơdroăng rak vế ƀă mơnhông ki kơnía khôi túa lĕm tro roh vâi krâ nah; tơdrêng amê tơbleăng um méa Dak Lak - kơpong tơnêi kân rơdâ, tíu tơkŭm khôi túa lĕm ƀă tơdroăng pói vâ xông mơ-eăm kum mơdêk mơnhông ôm hyô khôi túa lĕm krá tơniăn, po rơdâ roh tơ’lêi hlâu, tơrŭm ƀă mơjiâng cheăng pêi ăm pơlê pơla a pơlê ing mâu tơdroăng mơhno khôi túa lĕm tro – ngê̆ thuât – ôm hyô ki má môi. Kố xuân cho roh leh tơbâ 20 hơnăm Tíu mơhno khôi túa lĕm tro chêng koăng Tây Nguyên châ UNESCO chêh inâi cho tơmeăm ki má môi rak vế tiô hnê dêi pó ƀă rơkong ƀă Tơmeăm kơnía khôi túa lĕm tro ‘na hiâm mơno teăng mâ kuăn mơngế.

Măng tĭng leh tơkŭm po mâu tơdroăng ki ro, ki má môi cho Tơ’noăng mơhno khôi túa lĕm tro ‘na Chêng koăng ƀă tơdrá tiô khôi vâi krâ nah mâu hdroâng kuăn ngo Dak Lak, ƀă veăng amê ai mâu khu ngê̆ nhân troh ing mâu cheăm, bêng tung kong pơlê, vêh mơhno mâu tơdroăng leh, leh hô̆i tiô khôi vâi krâ nah ƀă po pêi pro tơmeăm kơnía Chêng koăng. Tơdrêng amê cho Famtrip troăng pêi ôm hyô ‘’Tơdjêp Tơmeăm kơnía - Tơdjêp pơlê pơla’’, tơbleăng mâu tour châ hlo châ tâ, ti tăng plĕng khôi túa lĕm tro pơlê, mâu tơdroăng pêi pro ki phá tơ-ê dêi pơlê pơla mâu hdroâng mơngế, ti tăng plĕng mâu khu khôi túa lĕm vâi krâ nah tung kong pơlê.

Ƀă a mâu kong pơlê Khánh Hòa, Khu tơrŭm cheăng Ôm hyô pêi pro Roh tơ’noăng Hlá tơbeăng ƀă Video clip ‘na ôm hyô hơnăm 2025 ƀă dó inâi ‘’Ôm hyô Khánh Hòa hên mơngiơk’’. Kố cho tơdroăng pêi ối tung tơdroăng mơhnhôk, tơbleăng ôm hyô dêi kong pơlê. Klêi kơ’nâi tơmot chiâng môi tíu pêi cheăng pro mơ-éa cheăng kâ rêh ối ƀă tơnêi têa, tíu ôm hyô dêi kong pơlê Khánh Hòa châ po rơdâ, pro um méa ôm hyô chiâng ‘’hên mơngiơk’’ ôh tá la lâi tâi. Pakĭng mâu tíu troh ki hmâ môi tiah kung king Nha Trang – môi tung mâu kung king lĕm má môi, rơlố Cam Ranh ƀă hngêi ối pơtê ki krip, thôt Bà Ponagar, tíu ối pơtáu roh nah Diên Khánh lơ mâu show mơđah tơbleăng ngê̆ thuât, tơdroăng ki ai mâ dêi tíu a Ninh Thuận ton kum um méa ôm hyô Khánh Hòa ai tơ’nôm hên mơngiơk ki lĕm.