Tây Nguyên cho kơpong tơnêi ki gok gâ mâu tơmeăm khoăng ki chiâng ai xêh ƀă ai hên khôi túa, vêa vong ki lĕm tro, tíu ki rêh ối dêi 47 hdroâng kuăn ngo, tung tơná ai hên mâu tơmeăm ki kân, môi tiah: Tơdroăng mơđah tŏn chêng koăng Tây Nguyên, tơdroăng ki hnê mơhno ‘măn ăm tơmeăm khoăng ƀă tơmeăm túa lĕm tro dêi kuăn mơngế; mâu leh mơdĭng tơ’noăng rui, mơdĭng lôi tơnâp kiâ, tĭng kâ báu nếo ƀă hên hĕng mâu tơdroăng leh mơdĭng ki ê dêi mâu hdroâng kuăn ngo.

Ƀă tơdroăng hôp ki dó inâi “Môi hdroh lăm, hên tíu troh”, mê kơvâ ngăn Ôm hyô mâu kong pơlê Gia Lai, Dak Lak ƀă Kon Tum hiăng tơbleăng tối troh mâu khu râ, kơvâ cheăng, khu mơdró kâ a Hải Phòng mâu tíu ki ai hlâu vâ mơnhông ôm hyô dêi mâu kong pơlê, ai hên tíu ki troh châ ô eăng, mâu tour ki tơdjêp tung tơdroăng ki kum ăm tơmối ôm hyô Tây Nguyên ki lĕm ro. Pôa Nguyễn Đức Hoàng, Kăn phŏ ngăn ‘na tuá lĕm tro, Ivá ƀă Ôm hyô kong pơlê Gia Lai tối ăm ‘nâi:

“Ƀă mâu túa lĕm tro ki phá krê xêh, kế kâ ki krê xêh pơla Hải Phòng ƀă mâu kong pơlê kơpong Tây Nguyên, ki rơhêng vâ tối cho Gia Lai mê á loi tơngah tiah kố, mâu kuăn pơlê a Gia Lai xuân rơhêng hâk vâ drêng lăm ôm hyô a Hải Phòng, ƀă kuăn pơlê a Hải Phòng xuân rơhêng vâ troh a Gia Lai. Ngin kô tơdjêp tơrŭm pơla mâu khu mơdró kâ, pơla peá kong pơlê vâ pro ti lâi mơjiâng chiâng ai khu ki lăm ôm hyô châ ‘nâi, châ tơrŭm, ti xê to mâu tour mê ối cho mâu khu hok tro, kŏng nhân, mâu lêng hơnăm hiăng krâ ƀă hên hĭn khu ki ê. Á tơmiât kố cho tơdroăng cheăng ki ai pơxúa kân khât ƀă tơƀrê”.

Mơhno tối mâu tơdroăng ki ai hlâu, ki tơ’lêi, ki plĕng tung mơnhông tơdroăng ôm hyô dêi Hải Phòng, pôa Vũ Huy Thưởng, Kăn phŏ ngăn ‘na Ôm hyô Pơlê kong kân Hải Phòng tối tiah kố, hneăng hôp tơrŭm cheăng vâ mơnhông ôm hyô kố cho tơdroăng ki ai pơxúa khât vâ thăm mơdêk tơrŭm mơnhông hên kơpong, chôa ‘lâng mơdêk tơdroăng ki pêi lo liăn ngân, mơnhông ôm hyô châ tơƀrê, tơniăn ton.

“Hâi kố, ngin tơdah 3 kong pơlê troh a kố, hôp tơpui tơno ‘na tơdroăng mơnhông ôm hyô, ing mê, xuân vâ tơbleăng mơhno mâu tơmeăm khoăng dêi ôm hyô ki krê phá xêh ăm mâu nhŏng o ing mâu kong pơlê kơpong Tây Nguyên. Kố cho môi tơdroăng cheăng ki tơ’lêi hlâu ƀă tơdroăng pêi pro kố thăm rế châ mơdêk tung la ngiâ ah, ti xê to ƀă Tây Nguyên mê ƀă mâu kơpong ki ê tung lâp tơnêi têa, mơjiâng chiâng mâu tour, mâu tíu, mâu tơmeăm ki vâ troh ngăn, ôm hyô ăm nhŏng o”.

A roh hôp kố, Kăn pơkuâ ngăn ‘na Ôm hyô Pơlê kong kân Hải Phòng, Khu kăn pơkuâ ngăn ‘na Túa lĕm tro, Ivá ƀă Ôm hyô dêi 3 kong pơlê kơpong Tây Nguyên hiăng kĭ tơkêa hên mâu tơdroăng ki vâ mơnhông ôm hyô ki nếo ƀă  troăng hơlâ thăm mơdêk tơrŭm cheăng vâ ing mê, thăm mơdêk ăm kơvâ ôm hyô châ mơnhông, mơjiâng mâu tơmeăm ôm hyô ki nếo. Tơdrêng amê, cho thăm mơdêk tơdroăng tối tơbleăng, mơhno, mơđah, po roh hôp, pêi pro, mơjiâng inâi, thăm mơdêk tơbleăng mơđah tơdroăng ôm hyô dêi 3 kong pơlê Dak Lak, Gia Lai, Kon Tum troh a Pơlê kong kân Hải Phòng ƀă 3 kong pơlê kơpong Tây Nguyên.