Veăng ai mâ a rôh leh ai ngế teăng mâ Khu xiâm ngăn túa lĕm tro, Tơ’noăng ivá ƀă Ôm hyô; mâu khu ki rơkê, khu ki hriăn túa lĕm tro rơtế ƀă hên hĭn kuăn pơlê tíu ki ‘nâi ai proâ tơnĭng Dak Sơn. Proâ tơnĭng Dak Sơn châ hlo a hơnăm 2014 a cheăm Nam Xuân, tơring Krông Nô, kong pơlê Dak Nông hdrối nah (nôkố cho cheăm Dak Săk, kong pơlê Lâm Đồng), ai 16 kơtó hmốu, tung mê ai 11 kơtó xuân ối tŭm 5 to, djâ ki kơnía tơviah ‘na séa ngăn tơmeăm ton nah ƀă túa lĕm tro.

Proâ tơnĭng Dak Sơn cho proâ ton nah, mơhno ăm tơdroăng rêh ối rơkê plĕng hiâm mơno dêi kuăn pơlê a tíu kố rôh apoăng, tối rơdêi xiâm kối tơnêi tơníu ki lĕm tơviah dêi kơpong Tây Nguyên. Tơpui a rôh leh, teăng mâ Khu séa ngăn tơdroăng ton nah Việt  Nam, Phŏ Yăo sư – Tiê̆n sih Bùi Văn Liêm, phŏ kăn hnê ngăn Khu séa ngăn tơdroăng ton nah Việt Nam, Ngế cheăng tung Hô̆i đong kế tơmeăm túa lĕm tro tơnêi têa tối rơdêi, Lâm Đồng cho kơpong tơnêi ai tíu ối kal, tơkŭm kong kế, nhâ loăng hên, tơdrêng amê hlối ai hên tơdroăng ton nah, túa lĕm tro ton hơnăm ƀă hên ƀăng tơnêi séa ngăn, inâi kong kế nhâ loăng ki lĕm, tíu rêh ối dêi hên hdroâng mơngế.