Lối 90 hơnăm, laga ngê̆ nhân ưu tú Lò Văn Biến, hdroâng kuăn ngo Thái ối a pơlê Cang Nà, bêng Trung Tâm, pơlê kong krâm Nghĩa Lộ, kong pơlê Yên Bái rêm hâi xuân kơhnâ tá hiâm mơno hnê chư Thái ton nah ƀă mâu tơdrá xoè ton nah dêi mơngế Thái ăm kăn ƀô̆ ƀă kuăn pơlê a pơlê. Pôa tối ăm ‘nâi, tung tơdroăng pơkuâ kăch măng, pơkuâ tơdroăng mơjiâng ƀă mơnhông tơnêi têa, Đảng pin đi đo nhuô̆m ƀă mơdêk hnoăng dêi khôi túa lĕm tro.

A Hneăng hôp khôi túa lĕm tro lâp tơnêi têa tơkŭm po a khế 11/2021, pôa Nguyễn Phú Trọng - Kăn xiâm pơkuâ hnê ngăn Đảng xuân hên xôh tối rơdêi “Khôi túa lĕm tro cho xiâm kối hiâm mơno dêi pơlê pơla, khôi túa lĕm tro u ối mê hdroâng kuăn ngo u ối, khôi túa lĕm tro hía mê hdroâng kuăn ngo hía”. Hlê plĕng trâu hơngế hiâm mơno mê, tơ’nôm ƀă tơdroăng tuăn pâ, tơdroăng hâk tơngăm ‘na mâu khôi túa lĕm tro hdroâng kuăn ngo tơná, pôa hiăng mơdoh plâ rơxông ăm tơdroăng hriăn plĕng, tơbleăng tối, vêh pro mâu khôi túa lĕm tro Thái. Pôa Biến tối:

“Hiăng cho mơngế Thái mê rêm ngế thế ‘nâi hdroâng kuăn ngo tơná ai mâu tơdroăng ki má môi klâi. Mâu ngế krâ, mâu ngế ‘nâi mê thế hnê ăm rơxông kơ’nâi vâ rêm ngế hlo amê ƀă hriâm tâp’’.

Pa kĭng pôa Biến, a pơlê kong krâm Nghĩa Lộ, kong pơlê Yên Bái nôkố, a mâu pơlê ối hên mâu pâ, tăm, mâu jâ, mâu nôu hlê plĕng trâu hơngế ‘na khôi túa lĕm tro ki má môi dêi hdroâng kuăn ngo Thái, ing chư chêh troh rơhdruê, rơngêi, ting ting, tơdroăng xuăng nếo, ting ning, prôa, kơchâi kâ, mâu tơdroăng xah hêi tiô khôi vâi krâ nah ƀă hía hé. Vâi dế mơdoh hên tâi ivá vâ rak, hnê ăm mâu rơxông pơtối ƀă pói vâ mâu khôi túa lĕm mê đi đo rak troh tá ah.

A Sơn La - kơpong tơnêi ai 12 hdroâng kuăn ngo nhŏng o tơdjuôm rêh ối, hlê plĕng trâu hơngế troăng tơdjâ Pôa Hồ Chí Minh, Kăn xiâm hnê ngăn tơnêi têa hneăng apoăng ‘’Khôi túa lĕm séa troăng ăm kuăn pơlê tung tơnêi têa prôk’’ ƀă thăm pêi tiô troăng prôk dêi Đảng tung pro ăm kro mơdrŏng, mơnhông khôi túa lĕm tro Việt Nam, tung mê, krê pôa Nguyễn Phú Trọng - Kăn xiâm pơkuâ hnê ngăn Đảng hiăng hên xôh mơnhên “khôi túa lĕm tro u ối mê hdroâng kuăn ngo u ối, hía khôi túa lĕm tro cho hía hdroâng kuăn ngo’’... mâu hơnăm hiăng hluâ, khu râ kăn pơkuâ hnê ngăn Đảng, khu râ kăn pơkuâ ƀă kuăn pơlê a kố đi đo tơtrŏng rak vế, mơnhông mâu ki kơnâ khôi túa lĕm ƀă mâu tơdroăng pêi pro, cheăng pêi ki kal khât, inhên. Jâ Quàng Thị Xuyến, Kăn pơkuâ Khôi túa lĕm tro – Rêh ối pơlê pơla, Hô̆i đong Kuăn pơlê kong pơlê Sơn La tối ăm ‘nâi:

“Troh nôkố, Hô̆i đong Kuăn pơlê kong pơlê Sơn La hiăng tơbleăng 05 pơkâ tơdjâk troh troăng hơlâ tŏng kum rak vế, mơnhông mâu ki kơnâ khôi túa lĕm hdroâng kuăn ngo. Ki ê nếo, mâu troăng hơlâ tŏng kum mơnhông khôi túa lĕm hdroâng kuăn ngo châ pêi pro tung tơdroăng xiâm tơnêi têa mơnhông cheăng kâ - rêh ối pơlê pơla kơpong kuăn pơlê hdroâng kuăn ngo ƀă kong ngo. Khu hnê mơhno má môi Hô̆i đong Kuăn pơlê kong pơlê xuân pơcháu mâu Khu dêi Hô̆i đong Kuăn pơlê kong pơlê pêi pro séa ngăn đi đo, rêm hneăng ƀă tơdroăng xing xoăng tơ’nôm, mơ’no liăn ngân tŏng kum ƀă mâu pơkâ tơdjâk troh khôi túa lĕm’’.

Drêng ối rêh nah, pôa Nguyễn Phú Trọng, Kăn xiâm pơkuâ hnê ngăn Đảng tơmâng troh tơdroăng rak ƀă mơnhông mâu ki kơnâ khôi túa lĕm tro hdroâng kuăn ngo, mâu ki kơnâ khôi túa lĕm ‘na tơmeăm khoăng ƀă tơmeăm ‘na hiâm mơno dêi mâu kơpong, dêi kuăn pơlê mâu hdroâng kuăn ngo, tơdjêp ƀă tơmâng xo ki rơkê khôi túa lĕm dêi rơxông ƀă pói vâ khu tuăn ngôa rơkê, văn ngê̆ sih pêi tá hiâm mơno, tuăn ngôa rơkê, ai pôu râng hnoăng cheăng rơtế mơjiâng châ tơƀrê môi khôi túa lĕm Việt Nam rơkê, pêng păm khôi túa lĕm hdroâng kuăn ngo.

A hneăng hôp Khôi túa lĕm tro lâp tơnêi têa hơnăm 2021, Kăn xiâm pơkuâ hnê ngăn Đảng hên xôh tối rơdêi: “Khôi túa lĕm cho mơhúa dêi hdroâng kuăn ngo, tối ‘na khôi túa lĕm dêi hdroâng kuăn ngo. Khôi túa lĕm ối mê hdroâng kuăn ngo u ối...’’.

Hlê plĕng tơdroăng ki mê, ngoh Thạch Sroh ối a cheăm Đôn Châu, tơring Duyên Hải, kong pơlê Trà Vinh, cho ngế pêi cheăng tung Hô̆i Văn hok Ngê̆ thuât kong pơlê tối ăm ‘nâi, khu mâu ngế rơhdruê xuăng, chiâng rơkê xah ting ning mơngế Khmer tung pơla kố nah hiăng ai hên tơdroăng veăng gum tung tơdroăng rak vế ƀă mơnhông ngê̆ thuât tiô khôi vâi krâ nah dêi hdroâng kuăn ngo. Krê ngoh, tung la ngiâ kô pơtối pleăng pêi cheăng ăm kơvâ khôi túa lĕm tro. ‘Na tơdroăng kơtê ihiâm dêi pôa Nguyễn Phú Trọng - Kăn xiâm pơkuâ hnê ngăn Đảng, ngoh Thạch Sroh tối tơdroăng ki mơjo khéa:

“Pôa Nguyễn Phú Trọng - Kăn xiâm pơkuâ hnê ngăn Đảng cho rơkê má môi, pôa tơmâng tŏng kum ‘na khôi túa lĕm tro dêi hdroâng mơngế Việt Nam tối tơdjuôm, ki rơhêng vâ tối tơmâng, mơhnhôk kuăn pơlê mâu hdroâng kuăn ngo rak ƀă mơnhông khôi túa lĕm hdroâng kuăn ngo dêi tơná. Nôkố, drêng tâng tối tơdroăng Kăn xiâm pơkuâ hnê ngăn Đảng kơtê i hiâm, á ƀă vâi krâ kuăn pơlê Khmer châi hiâm, pâ vế hnoăng kân kĭn, mâu hiâm mơno dêi pôa ƀă kuăn pơlê’’.

Ngê̆ nhân ưu tú Lâm Xuân ối a cheăm Tân Mỹ, tơring Trà Ôn, kong pơlê Vĩnh Long tối, pôa hâk ‘nâng troăng pêi, tơdroăng pêi cheăng dêi pôa Nguyễn Phú Trọng - Kăn xiâm pơkuâ hnê ngăn Đảng, kơtăng tung tơdroăng cheăng laga rêh ối môi tiah kuăn pơlê ki ê, rêh ối achê ƀă kuăn pơlê. Ki rơhêng, pôa Nguyễn Phú Trọng - Kăn xiâm pơkuâ hnê ngăn Đảng tâi ivá tơmâng troh kơvâ khôi túa lĕm tro, mơjiâng, rak mâu ki kơnâ lĕm dêi khôi túa lĕm, kuăn mơngế Việt Nam. Kăn xiâm pơkuâ hnê ngăn Đảng kơtê ihiâm, cho tơnêi têa hía môi ngế ki rơkê, Đảng hía môi ngế đảng viên, môi ngế kăn ƀô̆ tâi hiâm mơno, tâi ivá, xua tơnêi têa, xua kuăn pơlê. Ngê̆ nhân ưu tú Lâm Xuân tối ăm ‘nâi tơ’nôm:

“Kăn xiâm pơkuâ hnê ngăn Đảng ai hiâm mơno lĕm, pâ tâi tâng kuăn pơlê hdroâng kuăn ngo, tung mê ai kuăn pơlê hdroâng kuăn ngo Khmer. Pôa tơtrŏng tơmâng tơdroăng rak ƀă mơnhông khôi túa lĕm hdroâng kuăn ngo, ôh tá lôi ăm hía lôi. Á pâ tá hiâm mơno pâ troh ƀă pâ vế hnoăng kân kĭn dêi Kăn xiâm pơkuâ hnê ngăn Đảng’’.

Pôa Thạch Si Phone, kăn pơkuâ Khu ngê̆ thuât tâi tâng Khmer Bạc Liêu tối ăm ‘nâi, cho môi ngế pêi cheăng tung kơvâ ngê̆ thuât, á tâi ivá nhuô̆m, pâ mơnê mâu tơdroăng tá hiâm mơno dêi pôa Nguyễn Phú Trọng - Kăn xiâm pơkuâ hnê ngăn Đảng ƀă tơdroăng khôi túa lĕm tro hdroâng kuăn ngo, pro tơ’lêi hlâu ăm mâu văn ngê̆ sih hmâng vâ mơjiâng pro rơkê, veăng gum hên tâ mê nếo ăm ngê̆ thuât tơnêi têa. Pôa Thạch Si Phone mơjo khéa pâ tối:

“Pôa Nguyễn Phú Trọng - Kăn xiâm pơkuâ hnê ngăn Đảng cho ngế ki nhuô̆m ‘nâng. Pôa tâi hiâm mơno xua Đảng, xua kuăn pơlê, tung mê ai kuăn pơlê hdroâng kuăn ngo ƀă hmâ ối tung mâu Hneăng hôp dêi Đảng tơdroăng po rơdâ pêi pro Pơkâ ‘na kơvâ khôi túa lĕm. Nôkố pôa lêk lôi, á tâ pâ hên ‘nâng kô pôa. Ƀă hnoăng cho môi ngế văn ngê̆ sih á khŏm mơ-eăm pêi tiô mâu tơdroăng pói vâ dêi pôa drêng ối rêh nah, cho tơmâng ƀă mơdoh hên ivá ăm tơdroăng mơjiâng ƀă mơnhông khôi túa lĕm tro hdroâng kuăn ngo Khmer’’.

Tơdroăng kơtê ihiâm lêk lôi dêi pôa Nguyễn Phú Trọng - Kăn xiâm pơkuâ hnê ngăn Đảng cho môi tơdroăng ki hía kân dêi Đảng, Tơnêi têa, kuăn pơlê pin, khu văn ngê̆ sih lâp tơnêi têa tối tơdjuôm, văn ngê̆ sih Khmer tối krê. Mơhé mê, mâu tơmeăm kơnía ƀă tơdroăng pêi tá hiâm mơno dêi Kăn xiâm pơkuâ hnê ngăn Đảng ƀă khôi túa lĕm tro hdroâng kuăn ngo xuân ối amê, tâi tâng pin thế ai hnoăng rơtế mơjiâng chiâng môi khôi túa lĕm tro Việt Nam rơkê, pêng păm khôi túa hdroâng kuăn ngo tiô hiâm mơno dêi Kăn xiâm pơkuâ hnê ngăn Đảng.