Ƀă pơxá “80 hơnăm xuân ối tâng idrâp chuât ta ah ƀai hơdruê tơplâ khên tơnôu’’, Tơdroăng hơdruê xuăng pơla Khu lêng ƀă droh rơtăm, sinh viên rôh má 10 hơnăm 2024 kơpong II, tơkŭm ai 22 khu hơdruê xuăng, ƀă vâ chê 200 diễn viên dêi mâu tíu pêi cheăng, kong pơlê tung kơpong Tơdế tơnêi têa - Tây Nguyên.

Tơdrêng ƀă tơdroăng ki pơxúa troh leh tơbâ 70 hơnăm plâ Ƀlêi trâng Điện Biên Phủ, 80 hơnăm Hâi mơjiâng Khu lêng Việt Nam, 35 hơnăm Hâi Kuô̆k hô̆i tâi tâng kuăn pơlê, 49 hơnăm Hâi châ tơleăng  lĕm peăng hdroh tơnêi têa, Tơ’noăng mê vâ ‘nâi hnoăng pơkuâ ngăn, hnê mơhno cheăng dêi mâu khu tơrŭm pêi cheăng mơhnhôk tơ’noăng hơdruê xuăng tung kuăn pơlê a mâu cheăm tơring, pro tơlêi lâu, vâ mâu kơ koan, tíu pêi cheăng tung ƀă pa kong Khu lêng trâm tơpui tơno, hriâm ƀôi, hriâm túa pêi cheăng ƀă tối ‘na troăng rơhlâ mơnhông tơbrê tơdroăng mơhnhôk pêi pro túa lĕm tro hơdruê xuăng kuăn pơlê.