Ai lối 250 ngế cho mâu droh rơtăm phô̆m xông kân ƀă ngê̆ nhân ối nếo a mâu pơlê a pơlê kong kơdrâm Ƀuôn Ma Thuột veăng tơ’noăng. Tơ’noăng mơhnhôk dêi 14 khu, 60 ƀai ƀă hên túa: xah môi khu kế xah, xah hên khu kế xah hdroâng kuăn ngo, hơdruê, rơngêi, ting ting, kơhnhon xuăng.

Mâu khu tơ’noăng hiăng djâ troh mâu tơdroăng ki má môi, mơhno khôi túa lĕm tro vâi krâ nah dêi mâu hdroâng kuăn ngo Rơđế ƀă Mường. Mâu tơdroăng tôu chêng hlái, chêng kơlá, kế xah ing kơlá, pơlái châ xúa rơkê xua mâu vâi droh rơtăm phô̆m xông kân hiăng djâ troh tíu tơ’noăng kơdrâm phiu ro. Mơgêi tơ’noăng, khu tơkŭm po hiăng diâp 18 pri A, B, C ƀă pro mơhnhôk ăm mâu tơdroăng ki má môi. Diâp pri má môi ăm khu pơlê Kmrơng Prong A, cheăm Ea Tu, pơlê kong kơdrâm Ƀuôn Ma Thuột.