Dó inâi ‘’Tơdrá pơlê xiâm’’, Tơ’noăng mơhnhôk 15 tíu cheăng dêi mâu kong pơlê Dak Lak, Dak Nông ƀă Lâm Đồng veăng tơ’noăng. Rêm tíu mơđah tơbleăng sap ing 3 troh 5 tơdroăng, tá rêi hơdruê, kơhnhon xuăng ƀă mơđah tơbleăng rêi mâu prôa, khiê̆n, rơvŏng hlŭm, kế xah dêi mâu hdroâng kuăn ngo peăng Kơnhŏng.

Vâ chê 70 tơdroăng châ hbrâ nhên, ai tơdroăng xiâm cho kheăn kơdeăn Đảng kơnía, Pôa Hồ kân ki rơkê khât; khôi túa tơplâ xâ dêi kăch măng, tơdroăng pâ nhuô̆m pơlê xiâm tơnêi têa, kuăn mơngế; tơbleăng tối tơdroăng ki loi tơngah dêi kuăn pơlê tung tơdroăng pơkuâ dêi Đảng, mơdêk hiâm mơno rŭm môi tuăn, rơtế dêi pó mơjiâng pơlê xiâm ƀă hía hé.

Pakĭng mê mâu ƀai châ hiăng hbrâ chêh mê mâu khu ối mơhno ki tơmiât pêi rơkê tung tơdroăng pro rơkong krếo tơtro djâ tơdroăng ki nếo ai.