Rơhêng vâ tối cho hdrối nah pơlê Đăk Đê xuân hiăng ai Kuât pro tíu hôp tơdjuôm, laga châ mơjiâng rơxông nếo ƀă ki hên cho tơmeăm pro cho tơmeăm nếo, tơdrêng amê Kuât ki kuăn pơlê nếo vêh pro tiô khôi vâi krâ nah dêi mơngế Rơteăng kơvâ Hà Lăng. Châ mơjiâng pro tung pơla lối 2 khế, Kuât pơlê Đăk Đe xŏn ngiâ ‘ngêi 13 met, xŏn ngiâ hía 9,4 met ƀă kân rơdâ 5 met.

Vâ vêh pro Kuât kố kuăn pơlê tung pơlê châ tŏng kum vâ chê 100 rơtuh liăn ing Tơdroăng tơkêa bro 6, Tơdroăng pơkâ xiâm tơnêi têa mơnhông cheăng kâ – rêh ối pơlê pơla kơpong kuăn pơlê hdroâng kuăn ngo ƀă kong ngo xua Tíu chôu ‘măn tơmeăm – Tíu chô ‘măn kơxop mơ-éa kong pơlê Kon Tum po rơdâ pêi pro.

Pakĭng mê rêm rơpŏng kuăn pơle ối veăng tơlo sap ing 200 rơpâu liăn tơngi klêng ƀă veăng tơlo dêi khu râ kăn pơkuâ, khu râ, tíu cheăng ki ối tung pơlê cheăm. Tâi tâng kơxô̆ liăn vâ vêh pro Luât lối 150 rơtuh liăn ƀă hrĭng hâi pêi cheăng.

            Riên troh khế 8/2023 tung kong pơlê ai 437 tung tâi tâng 503 pơlê kuăn pơlê hdroâng kuăn ngo a Kuât. Tung mê, ai 213 Kuât tiô khôi vâi krâ nah, 224 Kuât ki ê châ mơjiâng tơdế tiô rơxông nếo ƀă rơxông nếo. Mâu hơnăm achê kố tơdroăng vêh pro Kuât tiô khôi vâi krâ nah dêi mâu hdroâng kuăn ngo a kong pơlê Kon Tum trâm hên pá puât xua kế ki vâi pro tiô khôi vâi krâ nah hiăng iâ ƀă tơdroăng ki chiâng vâ mơjiâng pro Kuât tiô khôi vâi krâ nah bu châ pơcháu ăm rơxông kơ’nâi ing tơdroăng ki veăng pro ƀă tơpui hnê tơdroăng pro ƀă rơkong dế tung pơlê rế hía rế hiá lôi.