Kố cho môi tung mâu tơdroăng tơmiât pêi troh tơbâ 50 hơnăm hâi mơjiâng tơrŭm cheăng tơpui kâ Việt Nam – Nhuk (21/9/1973 – 21/9/2023). A kố, mâu kăn teăng mâ tơmối hiăng châ hlo mâu tơdroăng trâm mâ mơhno khôi túa lĕm tro, rơhdruê xuăng ki má môi. Mâu tơdroăng hơdruê xuăng ƀă mơđah tơbleăng kế xah dêi mâu hdroâng kuăn ngo a Tây Nguyên ƀă dêi kong têa Nhuk, ai tơdroăng kheăn kơdeăn ki lĕm ‘na pơlê xiâm, tơnêi têa, kuăn mơngế a rêm tơnêi têa hiăng châ mâu nghê̆ sih mơđah tơbleăng krip tâi hiâm mơno, kơdrâm phiu ro.

Kăn teăng mâ xuân veăng tiâ rơkong kơ-êng ti tăng plĕng khôi túa lĕm tro 2 tơnêi têa Việt Nam – Nhuk; lăm ngăn tíu mơđah tơbleăng tơmeăm OCOP dêi khu tê mơdró ối tung Khu vâi kơdrâi tê mơdró pơlê kong kơdrâm Ƀuôn Ma Thuột ƀă kâ kơchâi kâ kơhiâm dêi kong têa Nhuk xua mơngế Nhuk ronêu bro, pế pơchên.

Pôa Võ Tấn Tài, Kăn phŏ hnê mơhno má môi Khu tơrŭm cheăng Việt Nam – Nhuk kong pơlê Dak Lak tối ăm ‘nâi, kố cho tơdroăng ki kal mơnhên ki kal tung tơrŭm cheăng pơla 2 tơnêi têa hiăng châ mơdêk chiâng râ tơrŭm cheăng ton xŏn trâu hơngế. Tơdroăng trâm mâ kô pro tơ’lêi hlâu pơtâng tối, mơđah tơbleăng um méa tơnêi têa, kuăn mơngế pơla 2 tơnêi têa; kum kong pơlê mơnhông tơmeăm ki ai hlâu, po tơrŭm cheăng, kum mơdêk tơdroăng mot tơrŭm khôi túa lĕm tro dêi kong pơlê rế trâu hơngế ƀă krá tơniăn.