Pa kơdâm long rơchôa têa Mỹ Lâm, cheăm Hoà Thịnh, rêm kơxê măng hâi tơdrốu rêm măng tĭng, idrâp guitar rơtế ƀă mâu rơkong hơdruê ki hơniâp ro, tơniâ châ chuât xơtó… rơtế ƀă idrâp chêm, idrâp khía… Akố ôh tá ai plông xah hêi ƀă on tơhrik ki eăng lĕm. Akố ai môi mơngiơk drêh ki ngiât khât dêi nhâ loăng rơtế ƀă mâu kuăn mơngế ki lĕm tơdrăng, hơniâp ro, tơniâ môi tiah tơná kơpong pơlê Hoà Thịnh. Akố, idrâp chuât châ mơjiâng ing tơná mâu kuăn pơlê ki hâk git kơ idrâp hơdruê, ƀă mơhnŏng pleăng dêi hnoăng cheăng, ivá tơná ăm pơlê pơla. Ƀă sap ing mê, tíu kố hiăng chiâng tíu tơkŭm dêi ôh tá 'nâi to lâi ngế. Pin rơtế tơmâng tơdroăng ki hlo dêi kuăn pơlê ƀă tơmối troh akố châ tâ:

“Kơdrâ, mơnhông mơdêk ‘nâng! Kong kế a kố lĕm, lối lĕm ‘nâng. Hlo môi tiah kố rế ro rế tơtro”.

“Kuăn pơlê sôk ro. Gá mơjiâng môi tíu xah hêi vâ kuăn pơlê kô troh veăng a rêm kơxê hâi Tơdrốu, cho lĕm ‘nâng. Mê cho môi tơdroăng ki ro’’.

Túa pêi pro tơ'lêi hlâu la dế pro chiâng môi tơdroăng ki nếo ăm tơdroăng rêh ối mơhno túa lĕm tro a kơpong pơlê Hoà Thịnh – tíu ki hiăng vêh mơnhông rơdêi ing klêi kơ'nâi têa kân lân lu khế 11 hơnăm nah. Ngoh Nguyễn Hữu Đồng, môi ngế kuăn dêi pơlê xiâm Hoà Thịnh, môi ngế ki pleăng dêi hnoăng cheăng hnê mơhno mâu khu ki pleăng dêi hnoăng cheăng kum kuăn pơlê 'mâi mơnhông klêi kơ'nâi têa kân lân lu. Ƀă mâu hâi ki kố, ngoh đi đo ai mâ a mâu rôh trâm mâ Mỹ Lâm vâ hơdruê mâu ƀai hơdruê ki tơná hâk vâ ăm tơná vâi krâ-nhŏng o, pú hmâ tơmâng. Ƀă ngoh châ veăng mê cho tơdroăng ki sôk ro, hơniâp ro.

“Á xuân môi tiah mâu nhŏng o ki hmâ ‘nâi môi tuăn tơdroăng kố. Klêi kơ’nâi kăn pơkuâ pêi pro mâu tơdroăng kố, á hlo pơlê xiâm á chiâng lĕm tâ; vâi krâ kuăn pơlê ai cheăng pêi, tơdroăng rêh ối hiâm mơno xuân lĕm tro tâ”.

Klêi kơ'nâi 4 măng tĭng tơkŭm po, tơdroăng tơrŭm hơdruê xuăng pơlê pơla trâm mâ Mỹ Lâm đi đo ai mâ môi ngế ngê̆ sih 70 hơnăm la kơpeăng kŏng rơkê khât - pôa Phạm Duy Binh a bêng Tuy Hòa. Rêm kơxê măng hâi tơdrốu rêm măng tĭng pôa ing Tuy Hòa tơkâ to lâi chât km vâ troh Hòa Thịnh pleăng dêi hnoăng cheăng ăm mơngế hâk vâ hơdruê xuâng ƀă tá hiâm mơno. Pôa Binh tối:

“Drêng châ 'nâi Hòa Thịnh tơkŭm po tơdroăng hơdruê xuăng Hồ Mỹ Lâm, á – môi ngế ki 'nâi rêi prôa guitar ƀă 'nâi hơdruê – hlo tơdroăng kố gá phá tơ-ê. Ngin hbrâ rơnáu veăng ƀă hiâm mơno kơhnâ khât. Á hlo tơdroăng mê cho kơnía.’’

Pakĭng trâm mâ Mỹ Lâm, mâu kơmăng hơdruê xuăng ối châ tơkŭm po a mâu tíu a troăng prôk tơkâ luâ mâu klâng báu. Tơdroăng kố ai tơdroăng veăng kum xua mâu ngế pleăng hnoăng cheăng hơnăm ối nếo púi vâ po rơdâ tíu mơhno túa lĕm tro ăm kuăn pơlê kơpong thôn pơlê cheăm Hoà Thịnh. Tơdroăng tơkêa hơdruê xuăng pơlê pơla kố xua pôa Phương Văn Lành, Kăn pơkuâ hnê ngăn Đảng ủi cheăm Hoà Thịnh pơxiâm ƀă châ tơbleăng tung hiâm mơno pleăng hnoăng cheăng. Ôh tá tê vĕ ƀă châ tơkŭm po a kơxê măng hâi tơdrốu rêm măng tĭng. Ngế ki 'nâi chiâng xah kơđơn mê veăng rêi kơđơn. Ngế ki 'nâi hơdruê veăng hơdruê. Ƀă ngế ki lâi vâ hơ'muăn hdrôu xuân chiâng vâ veăng. Pôa Phương Văn Lành, tối ăm 'nâi, klêi kơ'nâi to lâi khế tơkŭm po, túa ôm hyô "Trâm mâ Mỹ Lâm", hiăng pro tơdroăng ki hơniâp ro phá tơ-ê xêh:

“Tơdroăng châ tơƀrê apoăng ngin pêi pro pơla kố nah hiăng mơhnhôk hên tơmối tung cheăm ƀă cheăm pakong, thăm nếo pakong kong pơlê troh veăng, rơtế trâm mơđah tơbleăng ƀă kuăn pơlê a pơlê cheăm. Kố cho môi ƀâng ki lĕm vâ pin mơđah tơbleăng um méa pơlê xiâm troh ƀă pú hmâ ƀă tơmối tung, pakong cheăm xuân môi tiah tung kong pơlê, kong pơlê pakong’’.

Sap ing long têa Mỹ Lâm, troh kong loăng hngó Bầu Đá, sap ing Làng Sen troh Suối Lạnh ƀă tá mâu ƀăng klâng báu ki kân rơdâ tơkâ luâ mâu pơlê pơla ki hơniâp ro… hiăng mơjiâng chiâng um méa pơlê Hòa Thịnh ki hơniâp ro, rế hía rế tơ'mot hên ngế vâ tí tăng lăm ngăn, châ hlo.