Hâi lơ 8/10, tơdroăng hbrâ ăm Hâi tơkŭm xah hêi ro Khôi túa lĕm tro hdrông kuăn ngo Mông rôh má 4 hơnăm 2026 tơkŭm po thâ a Điện Biên. Mâu khu ngê̆ nhân, diên viên, ngế tơ’noăng ing 11 kong pơlê tơkŭm pơtâp, kêi đeăng mâu tơdroăng mơđah tơbleăng ngê̆ thuât, tơdrêng amê hbrâ mâu tíu chô ‘măn tơmeăm, tơmeăm ki phá tơ-ê, hbrâ tơbleăng mâu ki kơnâ khôi túa lĕm tro ƀă tơmeăm dêi kuăn pơlê Mông troh kuăn pơlê, tơmối.

Hâi tơkŭm xah hêi ro Khôi túa lĕm tro hdrông kuăn ngo Mông rôh má 4 tơkŭm po sap hâi lơ 9 – 11/10, ƀă vâ chê 800 ngê̆ nhân, diên viên, ngế tơ’noăng ivá troh ing 11 kong pơlê mê cho: Điện Biên, Tuyên Quang, Phú Thọ, Thái Nguyên, Sơn La, Cao Bằng, Lai Châu, Lào Cai, Thanh Hóa, Nghệ An ƀă Đắk Lắk. Krê Điện Biên ai 101 ngê̆ nhân, diên viên, ngế veăng mâu tơdroăng xiâm mơhno khôi túa lĕm tro ƀă 62 ngế tơ’noăng ivá veăng 6 môn tơ’noăng ƀă 35 tơdroăng xiâm.

Mâu kong pơlê djâ troh mâu tơmeăm ƀă tơdroăng rêh ối ƀă khôi túa lĕm tro Mông mâu kơpong, ing pơtâk ếo tiah hmâ, ếo pơtâk hdrông kuăn ngo, tơmeăm ki pro ƀă kŏng tiô khôi vâi krâ nah troh tơmeăm pêi lo ing chiâk deăng, tơmeăm ki má môi ƀă mâu tơmeăm gum tung tơdroăng rêh ối. Kố ôh tá xê to tíu tơbleăng tơmeăm, mê ối gum pơlê pơla kơnó inhên tâ tơdroăng hơ’muăn ‘na khôi túa lĕm tro parŏng rêm tơmeăm.