Tung mâu hơnăm hiăng hdrối, kơnôm ai tơdroăng tơmâng ngăn dêi Đảng ƀă Tơnêi têa tung mâu kơvâ cheăng mê tơdroăng cheăng kâ, rêh ối pơlê pơla dêi kuăn pơlê Chăm tung kong pơlê ai hên tơdroăng mơnhông. Pôa Đặng Hồng Sỹ, Phŏ Kăn pơkuâ hnê ngăn cheăng Đảng kong pơlê Lâm Đồng mơnhên mâu hnoăng veăng 'no dêi kuăn pơlê Chăm tiô khôp Bàlamôn tung mơnhông cheăng kâ, kơdroh kơtiê, veăng mâu tơdroăng tơ'noăng pâ nhuô̆m tơnêi têa ƀă mơjiâng kong pơlê.

Tơdrêng amê hlối púi vâ, mâu ƀok phop, jâ phop ƀă kuăn pơlê Chăm pơtối mơnhông hnoăng cheăng, tơdjâk ki lĕm tro tung pơlê pơla; thăm tơrŭm môi tuăn, tŏng kum dêi rơpó mơnhông pêi cheăng kâ, kơdroh kơtiê, veăng 'no hnoăng mơjiâng khu tơrŭm môi tuăn tâi tâng kuăn pơlê. Klăng roh kố, khu kăn ki pêi dêi hnoăng cheăng dêi Khu pơkuâ ngăn Đảng hiăng diâp kơxuô tơmeăm ăm mâu ƀok, jâ chĭng ƀă mâu ngế ki kuăn pơlê loi tơngah tung pơlê pơla Chăm Bàlamôn ƀă rơkâu vâi krâ nhŏng o Chăm tơdah Leh mơdĭng Katê hơnăm 2026 tơniăn ro.