Tung rôh trâm mâ pơla mâu sih quan hơnăm ối nếo Mố đô̆i tơkăng kong Việt Nam ƀă sih kuan hơnăm ối nếo kŏng an Lếo, a Hngêi mơhno túa lĕm tro tơkŭm hôp pơla Việt Nam - Lếo - Kul a thôn Tà Ka, cheăm tơkăng kong Pờ Y, tơring Ngọc Hồi, kong pơlê Kon Tum pêi hên tơdroăng cheăng ai pơxúa  khât  thăm tơrŭm pơla mâu sih kuan hơnăm ối nếo péa tơnêi têa.

Akố mâu sih kuan hơnăm ối nếo Việt Nam - Lếo tơkŭm po hneăng hôp hnê tối, tơbleăng ‘na luât ăm Kuăn pơlê kơpong tíu tơkăng kong péa tơnêi têa. Mâu sih quan hơnăm ối nếo Việt Nam - Lếo xuân châ xo hnoăng liăn hriâm “Mơdêk hvêa chêng o troh hngêi trung’’ ăm 40 ngế hok tro, tung mê ai 20 ngế hok tro Việt Nam ƀă 20 ngế hok tro Lếo ki xơpá, rơpŏng hngêi kơtiê xơpá; rơtế pêt loăng tơrŭm dêi rơpó tung kơdrum Hngêi mơhno túa lĕm tro tơkŭm hôp mê vâ hdró hâi leh ƀă pro ăm lĕm hyôh kong prâi.